Read Vaiphei THIAMPUTE LEKHABU 15 Bible Online

THIAMPUTE LEKHABU 15 - Vaiphei bible

THIAMPUTE LEKHABU 15

¹Mosi leh Aron kiang in LALPA chun,

²Israelte kiang in zia gual hin gen un, a tia: Mi kuale ama taksa ah kipat thil pawt a um chun, a thil pawt ziak ah chun a buak ding uh ahi.

³Amau ah kipat thil pawt ziak ah a buaknau ziak chu: A taksau ah kipat a la pawtsa leh pawt talo ahi inle a buak ta him him hi.

⁴Thil pawt nei in a lup khum taphot chu a buak ngâl ah, a chut khum taphot chule a buak ahi.

⁵Kuale a lupna khoikha taphot chun a puan uh a sawp ua, a kisil ding uh ahi; nitâk lam masia a buak ding uh ahi.

⁶Thil pawt neipa chutna kichu kha tapo chunle a puan uh sawp in, a kisil ding uh ahi; nitâk lam masia a buak ding uh ahi.

⁷Thil pawt neipa taksa sukha taphot chunle a puan uh sawp in, a kisil ding uh ahi; nitâk lam masia a buak ding uh ahi.

⁸Kuale a thiang himaleh, thil pawt nei in a chil a sek khum chun, a puante sawp in, a kisil ding ahi; nitâk lam masia a buak ding ahi.

⁹Thil pawt neite chuanna taphot chule a buak ding ahi.

¹⁰Chuleh, ama nuai ah thil um sukha tapo chule nitâk lam masia a buak ding ahi: Zia gual thil pawt tapo chunle a puan uh sawp in, ama le a kisil ding ahi; nitâk lam masia a buak ding ahi.

¹¹Thil pawt nei in a khut sawp lo ah a khoikhâk taphot in a puante sawp in, a kisil ding ahi; nitâk lam masia a buak ding ahi.

¹²Thil pawt nei in leibêl a sukkhak taphot chu, khet phel ding ahi; thing ah kisiam ûm leh bêl zosia chu tui ah dia ding ahi.

¹³A thil pawt nei chu a thian phat leh, a ze’thianna dingin ni sagi bituk hi’ntin; chuleh, a puante sawp in, tui thiang ah kisil in, a hung thiang bep ding ahi.

¹⁴Ni giat a tin phat leh, vakhu pani a hem, vapâl pani a hem hun chawi in, kikhopna biakbûk kotbul ah LALPA âng ah hung in, thiampu kiang in a hun piak ding ahi.

¹⁵Thiampu’n a khat pen chu gitlo thoina thillat dingin, a khat zawk chu hâlmang thillat dingin a lat ding ahi: Chun, thiampu’n a thil pawt ziak ah chun ama â dingin LALPA âng ah tatna bawl piak in a.

¹⁶Pawsal kuale ama ah kipat a chi a pawt daw chun, kipum sil intin, nitâk lam masia a buak ding ahi.

¹⁷A chi pawt in a sukkhak puan leh savun thil zosia chule sawp ding hi’ntin; nitâk lam masia a buak ding ahi.

¹⁸Numei tawh pawsal a lup khawm ua, a chi’u a pawt chun, a pani un a kisil ding uh ahi; nitâk lam masia a buak ding uh ahi.

¹⁹Numei in a thasin thipût a nei chun, ni sagi a buak ding ahi, kuale ama sukha taphot chu nitâk lam masia a buak ding ahi.

²⁰A ze’chan hun sung ah a lupna zosia chu a buak hi’ntin, a chutna taphot chule a buak hita’n a.

²¹A lupna sukha taphot chun a puan sawp in, a kisil ding ahi; chun, nitâk lam masia a buak ding ahi.

²²A chutna sukha taphot chun a puan sawp in, kisil intin; nitâk lam masia a buak ding ahi;

²³a lupna a hem, a chutna a hem, a khoikha taphot chu nitâk lam masia a buak ding ahi.

²⁴Pawsal kua a hem khat in numei khat, a thasin thipût lai tak ah a luppi khâk ah, a nik buak in a sukkhak chun, zia mipa chu ni sagi sung a buak ding ahi; a lupnau jalkhun chule a buak ta ding ahi.

²⁵Chuleh, numei khat in a thinei hun sung hilo in thisan pawtna a nei a hem, a thinei dan vântâng sâng ah sawtzaw ahi chun, zia hun sung chu a buak hi’ntin; a thianlo hun sung gual ma khan ze’ a chang ding ahi.

²⁶A lupna taphot chule a buak hun ah, a lupna gual hi’ntin; banghitaleh, a chut khum khak taphot chule a buak dan ngai gual khan buak in a.

²⁷Kuale zia thilte sukha taphot chu a buak hi’n a: Chun a puan uh sawp in, a kisil ding uh ahi; nitâk lam masia buak in a.

²⁸Ahi’n la, a thian ni kipat ni sagi nung chuleh thiang ta’n a.

²⁹Ni giat a tin phat leh, vakhu a hem, vapâl a hem pani hun keng in, kikhopna biakbûk kotbul ah thiampu kiang in a hun choi ding ahi.

³⁰Thiampu’n vacha khat chu gitlo thoina ding leh vacha khat zaw chu hâlmang thillat dingin lân in a. Thiampu’n ama â dingin LALPA âng ah a thil pawt ah kipat a thianna dingin tatna bawl piak in a.

³¹A lak ua um ka biakbûk supawlche ah, a buaknau ziak ah a thi’lona ding un, ka mipi Israelte chu a buaknau la hi’thiantho ding ahi, a tia.

³²Zia dan hi thil pawt nei tapo â ding leh, amau ah kipat chi pawt ziak ah kisubuak khate â ding leh,

³³numei, a thianlona ziak ah damlo â ding leh, pawsal hi’n, numei hitaleh, a chi a pawt ziak a hem, numei a thianlo lai tak ah a luppi ziak ah kihibuakte â ding ah kisiam ahi.