Read Vaiphei THIAMPUTE LEKHABU 16 Bible Online

THIAMPUTE LEKHABU 16 - Vaiphei bible

THIAMPUTE LEKHABU 16

¹Chun, LALPA âng ah a thillat lai tak ua a la thi ta Aron chapa panite thi’nung in Mosi kiang in LALPA chun thu a hun gen a;

²Mosi kiang ah LALPA chun: La u Aron kiang in zia gual hin gen in: mâichâm chung ah um, ja’ngaina chutpha umna puanjak sung, mun thiangtho ah chun bangtik hun hilehle hung lût kin; chutilochun, thi mai ding la hi: ja’ngaina chutpha chung ah sûmpi’n hung kilâk ding ka hi’ngâl in.

³Zia gual hin Aron mun thiangtho in a lût sek ding ahi: Gitlo thoina thillat ding bawngchal tuai khat tawh, hâlmang thillat ding belamchal pakhat tawh;

⁴ama chu puan malngat thiangtho ah kivan intin; chuleh, a taksa chung ah puan malngat tawkanuai nei intin; puan malngat kawnggâk ah kigâk intin; chuleh, puan malngat dialkop a kop ding ahi. Ziate hi a sil leh chên thiangthote chu a hiu. Tui ah kisil in, ziate ah chun a kivan ding ahi.

⁵Chun, Israelte gitlo thoina thillat ding kelno pani tawh, hâlmang thillat dingin belamchal pakhat a hun lak ding ahi.

⁶Chun, Aron in ama gitlo thoina thillat dingin bawngchal chu lân intin, zia chu ama leh a Inkuante â dinginle kitatna hi’n a.

⁷Kêlcha pani chu la’n tin, kikhopna biakbûk kotbul ah chun, LALPA âng ah hun chawi intin;

⁸Aron in kêl panite chung ah chun âisân intin, khat chu LALPA â ding hi’ntin; a khat zawk chu Azazel â ding hi hen.

⁹Aron in LALPA âi ah ke’zaw chu la’n tin, gitlo thoina dingin lân in a.

¹⁰Ahi’n, Azazel âi ah ke’zaw kêlcha chu, kitatna bawlna ding ah Azazel â ding ah gamthip ah hingsua dingin LALPA kiang ah a hing ah lat ding ahi.

¹¹Aron in ama gitlo thoina thillat ding bawngchal chu lân intin, zia chu ama leh a Inkuanpite â ding ah tatna a bawl ding ahi; chun, ama â ding ah gitlo thoina bawngchal chu a thalup ding ahi.

¹²LALPA âng ah mâichâm ah kipat in mei lâkna kuang, meiâm ah dim hun la’n tin; gimtui gawtnelsa a khut dim a chawi in puanjak sung lam ah chawi lut in;

¹³thuthung thingkuang chung ah ja’ngaina chutpha chu meikhu’n a tuam theina ding leh a thi’lona dingin, gimtui chu LALPA âng ah mei chung ah chun a koi ding ahi.

¹⁴Bawngchal thisan chu la’n tin, a khutzung in ja’ngaina chutpha mai lam chu the’khum intin; chuleh, ja’ngaina chutpha ma lam chule sagivei a the’khum ding ahi.

¹⁵Chuleh, mipite gitlo thoina kêlcha chu that in, a thisan chu puanjak sung lam ah chawi intin; chun, zia thisan chu bawngchal thisan a bawl gual ma khan, ja’ngaina chutpha ma lam leh a chung chu a the’khum ding ahi.

¹⁶Tichun, Israelte thiamlona leh a buaknateu leh a thil hi’khialnateu zosia ziakin Mun Thiangtho pen hithianna a bawl ding ahi. Zia gual ma chun, a buaknau lak ah um, kikhopna biakbûk â dinginle a bawl ding ahi.

¹⁷Israelte leh ama leh a Inkuanpite â ding ah tatna bawl ding ah a lût sung in, a hung pawt kit masangsia kikhopna biakbûk sung ah kuama a umlo ding uh ahi.

¹⁸LALPA âng ah um mâichâm lam ah kipat in hung pawtdok intin, zia â ding ah chun tatna bawl in a. Chun, bawngchal thisan tawh kêlcha thisan chu la’n tin, mâichâm ningbawkte a nu kîmvêl ding ahi.

¹⁹A khutzung in thisan chu sagivei the’khum in, hithiang intin; Israelte buakna ah kipat in Mun Thiangtho chu lân in, a hithiangtho ding ahi.

²⁰Chun, kikhopna biakbûkte, Mun Thiangtho leh mâichâmte latna a bawl zaw phat leh, kêlcha hing na lai chu pui intin;

²¹Aron in kêlcha hing nalai luchung ah a khut teni ngat in, Israelte sukkhialna zosia, a gitlonau zosia leh a thil hi’khial zosiau chu puang in ah; tichun, a thak mang ding ah guat ah umpa chun gamthip lam in a vathak mang ding ahi.

²²Kelcha chun mi umlona gamthip ah chun a gitlona zosiau pawmang intin; gamthip ah chun a tha’suak ding ahi.

²³Chun, kikhopna biakbûk sung ah chun Aron hung lut kit intin, Mun Thiangtho ah a lut lai ah a puanmalngat sil leh chênte chu liptha’n tin, zia tak ah chun nusia in a.

²⁴Mun Thiangtho ah chun kipumsil intin, a kicheina ngai ngai ah kichei kit in a; hung pawtdok intin, ama tawh mipite â dingin hâlmang thillat chu lân intin, tichun, kitatna a bawl ding ahi.

²⁵Gitlo thoina gan sathaute chu mâichâm chung in hâltum in a.

²⁶Kêlcha Azazel â ding ah vathak mangpa khan le a puante sawp in, ama le kipumsil intin; ziazaw chuleh giamun sung in a lût bep ding ahi.

²⁷Gitlo thoina bawngchal leh kêlcha, a thisan uh Mun Thiangtho ah gitlo tatna ding ah kilân pen chu, a vun tawh a sa chu a êk pum ah giamun pawlam ah pawdok in, mei ah a hâltum ding ahi.

²⁸A hâl ah pangpa chun a puante sawp in, kipumsil intin, ziazaw chuleh giamun ah a lut bep ding ahi.

²⁹Zia hi la kumtuang dan ding ua guat chu ahi: Tha sagi’na, a ni sawm ni chun la kisukgenthei ding uh ahi; nanghaw hileh, la lak ua malzinte’nle na la sep lo ding uh ahi.

³⁰Zia ni chun LALPA âng ah la thiantho theina ding ua hun hi’thiangtho dingin, thiampu’n tatna hun bawl piak ding ahi ngâl a.

³¹Nanghaw â dingin Sabbath ummit ni ahi’n, anngawl ah la kisukgim ding uh ahi; zia chu kumtuang ah dan ding ah guat ahi ngâl a.

³²A pa thatheng ah thiampu nasêm ding ah sathaunu’ ah hithian ah um pen pen in, tatna bawl dingin thiampu van thiangthote ah chun a kithuam ding ahi.

³³Ama chun mun thiangtho â ding, mipite â ding, kikhopna biakbûk â ding, mâichâm â ding, thiampute â ding leh kikhopna mun ah mipi zosia â dingin tatna a bawl ding ahi.

³⁴Zia hi Israelte gitlona zosia tatna ding ah kum khat ah khatvei la bawl ding uh chu ahi, a tia. Tichun, Mosi’n LALPA thupiak gual in a bawl tai.