Read Vaiphei THIAMPUTE LEKHABU 17 Bible Online

THIAMPUTE LEKHABU 17 - Vaiphei bible

THIAMPUTE LEKHABU 17

¹Mosi kiang in LALPA chun:

²Aron tawh a chapate leh Israelte kiang in zia gual hin gen in, a tia: Zia hi LALPA thupiak chu ahi.

³Israel Inkuan ah mi him him in, bawngchal a hem, belamno a hem, kêlcha a hem, giamun sung hileh a paw lam hitaleh, a thâlup him him uh chun;

⁴kikhopna biakbûk kotbul ah, LALPA biakbûk ngei ah, LALPA âng ah lat ding a hun chawi lo chun, zia mi chu thisan sua ziak ah bawlkhial ah ngaw hi’n ah: Thisan a sua ta ngâl a. Zia mi chu a mipite lak ah kipat in nawdaw ding ahi.

⁵Israelte’n gam lak ah a gan thâlup uh chu LALPA kiang ah a hun lat ding uh ahi. Kikhopna biakbûk kotbul ah, thiampu kiang ah hun chawi intin, ama’n kichamna thillat dingin LALPA kiang ah a lat ding ahi.

⁶Chun, thiampu’n mipi kikhopna biakbûk kotbul ah, LALPA mâichâm chu a thisan the’khum intin; chuleh, a thau chu LALPA kiang ah gimtui dingin hâltum ta’n a;

⁷tichun, thithate kêlcha kiang ah kithoina a piak ua, nawchi ei zoksan tâklona ding ua, a khang zosiau ah a zui ding uh dan chu ahi.

⁸Chuleh, amau kiang ah la genbe ding chu: Israel Inkuan lak ah mi hi’n, gam dang mi la lak ua chêng hitaleh, kithoina a hem, hâlmang thillat a hem lân tapo chun,

⁹LALPA kiang ah lat ding ah kikhopna biakbûk kotbul ah hun chawi lo tapo chu, a chipite lak ah kipat paithâk ding ahi.

¹⁰Kuale, Israel Inkuan lak ah mi a hem, gam dang mi la lak ua chêng a hem in, thisan a nêk khak chun, zia mihing chu do ing ka tin, ama chu a mite lak ah kipat in paitha ding ka hi.

¹¹Taksa hinna chu thisan ah um ahi ziakin, zia chu la hinnau tatna dingin mâichâm ah ka pia ta hen; thisan chun hinna a tan ta ngâl a.

¹²Ziaziakchun, nanghaw leh la lak ua gam dang mi a chêngdente kuama’n, thisan la nêk lo ding uh ahi, ti’n Israelte kiang in ka la gen ta ngâl a.

¹³Israelte a hem, la lak ua mikhual chêngdente a hem khat chu, gamvâk in, sa ahiloleh vacha, sa nêk thiang vaman kha taleh, a thisan chu sungtha’n, leivui a buak khum ding ahi.

¹⁴Taksa zosia hinna thu ah chun, thisan chu a hinna ahi ngâl a: Ziaziakchun, Israelte kiang in, bang sa le a thisan la nêk lo ding uh ahi; a ziak chu, a hinna chu thisan ahi ngâl ah, ti’n ka la gen ta ahi; kuale thisan nekha taphot la lak ua kipat paithâk ding ahi.

¹⁵La gam sung ua chêng zosia leh mikhual chêngden kuale, sapûl a hem, sameklup a hem a nêk khâk chun, a puante sawp in, ama taksa le a kisil ding ahi; nitâk lam masia buak intin, ziazaw chuleh thiang ta’n a.

¹⁶A puan sawp lo ah, ama le kisil lo chun, a gitlo man chu ama’n a kipuak ding ahi, ti’n a gen a.