Read Vaiphei THIAMPUTE LEKHABU 18 Bible Online

THIAMPUTE LEKHABU 18 - Vaiphei bible

THIAMPUTE LEKHABU 18

¹Mosi kiang in LALPA chun:

²Israelte kiang in zia gual hin gen in: Keima hi LALPA la Pathian uh ka hi.

³La la chênnau Aigupta gam ah mite bawl dan gual ah la bawl lo ding uh ahi; ka hun puilûtna ding Kanaan gam ah chêngte bawl gual inle la bawl lo ding uh ahi: A dan bawlteu le la zui lo ding uh ahi.

⁴Ka thuguatte la nit ua, ka dan bawlte hi la zui ua, la vop ding uh ahi: Keima hi LALPA la Pathian uh ka hi.

⁵Ka dan bawlte leh ka thuguatte la zui uh chun hing in lau: Keima hi LALPA chu ka hi.

⁶La lak ua kuama’n la chanau kinaipiu, a zamaw la hawkdaw lo ding uh ahi. Keima hi LALPA chu ka hi.

⁷La pa mualphona dingin la nu zamaw la hawkdaw lo ding ahi; ama chu la nu ahiziak in a zamaw la hawkdaw lo ding ahi.

⁸La pa ji zamaw la hawkdaw lo ding ahi; zia chu la pa mualphona ahi ngâl a.

⁹La pa chanu a hem, la nu chanu a hem, In mun ah piang hihenla, gam dang ah piang hiziang taleh, la suapi ahiziak in a zamaw la hawkdaw lo ding ahi.

¹⁰La chapa chanu a hem, la chanu chanute a hem, a zamawu la hawkdaw lo ding ahi; nangma mualphona ahi ngâl a.

¹¹La pa ji chanu, la pa’n a hinpiak chu, la suapi ahiziak in a zamaw la hawkdaw lo ding ahi.

¹²La pa suapinu zamaw la hawkdaw lo ding ahi; ama chu la pa chanau kinaipi ahi ngâl a.

¹³La nu suapinu zamaw la hawkdaw lo ding ahi; ama chu la nu chanau kinaipi ahi ngâl a.

¹⁴La pa suapipa ji sukha dingin a zamaw la hawkdaw lo ding ahi; ama chu la nuneu ahi ngâl a.

¹⁵La mo zamaw la hawkdaw lo ding ahi; ama chu la chapa ji ahi’n, a zamaw la hawkdaw lo ding ahi.

¹⁶La suapipa ji zamaw la hawkdaw lo ding ahi; la suapipa mualphona ahi ngâl a.

¹⁷Numei khat tawh a chanu zamaw la hawkdaw khawm lo ding ahi; a chapa’ chanu a hem, a chanu’ chanu a hem zamaw le la hawkdaw khawm diak lo ding ahi; amau chu la chanau kinaipi ahi ngâl un; zia chu thil kidak um tak ahi ngâl a.

¹⁸La ji a dam sung in a suapinu ji’n la neikop lo ding ahi’n, la luppi diak lo ding ahi.

¹⁹Chun, numei a nîk buak nei sung ah, la luppi lo ding ahi.

²⁰La Invêngte ji luppi in la kisukbuak lo ding ahi.

²¹La Pathian min hi’tempot dingin la suante lak ah mi him him Molekh ho’na ding ah la lat lo ding ahi: Keima hi LALPA chu ka hi’ngâl a.

²²Numei gual in pawsal la luppi lo ding ahi; zia chu thil ki’dak um ahi.

²³Kua’nle numei hin pawsal hileh, ama leh ama kisubuak dingin gancha tawh a tatsual lo ding ahi; zia chu gitlona huaisia ahi ngâl a.

²⁴Zia thilte ah hin kisubuak kiu in, zia thilte ziak ah hin la ma-âng ua ka nawdaw ding namte kha a la kisubuak ta’ngâl un.

²⁵Chuleh, gam nasan a buak ah, a a thianlona ziakin ka gawt ta’n, gam inle a kam ah kipat in a sung ah chêngte a lawdok tai.

²⁶Nanghaw leh la lak ua namdang mi umte’n le ka dan bawl leh ka thuguatte vop pha’n, zia thil ki’dak umte him him, hi la bawl lo ding uh ahi;

²⁷(zia thil ki’dak um zosiate hi la ma-âng ua um, a gam ah mite’n a la bawl ziak un gam chu a la hi’buak tau ahi.)

²⁸La masang ua umte a gam in a la luakdaw gual ah, gam chu la hi’buak ua, a hun luak dawlona dingin.

²⁹Kuale zia thil ki’dak um tak bawlte him him chu, a mite lak ah kipat nawdaw ding ahi.

³⁰Chun, la masang ua umte chîndan ki’dak um takte hi la bawl lo ding uh ahi; zia thilte ah hin kisubuak kiu inla, ka dan bawlte hi zui zing un; Keima hi LALPA la Pathian uh ka hi, ti’n gen in, a tia.