Read Vaiphei THIAMPUTE LEKHABU 19 Bible Online

THIAMPUTE LEKHABU 19 - Vaiphei bible

THIAMPUTE LEKHABU 19

¹LALPA chun Mosi kiang in,

²Israelte kiang in zia gual hin gen in, a tia: La thiantho ding uh ahi, Keima LALPA la Pathian uh ka thiangtho ngâl in;

³mi tin in a nu leh a pateu a ja ding uh ahi: chuleh, ka sabbath nite a chan ding uh ahi: Keima hi LALPA la Pathian uh ka hi.

⁴Milim ho kiu inla, milim ah kisung pathiante le kibawl diak kiu in; Keima hi LALPA la Pathian uh chu ka hi.

⁵LALPA kiang ah Chamna thillat kithoinate la lat phat leh, nangma thasâng ah pom hiding in la lat ding uh ahi.

⁶La thillat uh chu la lat niu leh a jing tiang in la nêk ding uh ahi: A ni thum ni tiang ah la nêkbang uh chu la hâltum ding uh ahi.

⁷A ni thum ni tiang ah nêk ahi nâk lai chun, a buak ahi tâk ziak in, pom hita pua’n a.

⁸Kua’nle zia chu a nêk chun, LALPA chan thiangtho hi’buak ahi tâk ding ziakin, a maw kipuak ta’n a; zia gual mi chu a chipite lak ah kipat paithâk ding ahi.

⁹La lou ua bu la ât phat ua leh, a themnên tiang in la lâk thian lo ding uh ahi; a lêpte le la lâk khawm lo ding uh ahi.

¹⁰Chuleh, la grep ga lêp leh a pul zosia chule la luak khawm lo ding uh ahi; migentheite leh gam dang mite â ding ah la nutsia piak ding uh ahi: Keima hi LALPA la Pathian uh chu ka hi.

¹¹Gu kin la, dik lo tak in bawl kiu inla, zuau in kithêmtua kiu in.

¹²Diklo tak ah ka min ah kitiam in, la Pathian min uh hi la hi’buak lo ding uh ahi: Keima hi LALPA chu ka hi.

¹³La Invêngte la lepbawl kin la, la gûk lo ding ahi; la mi gawina thaman chu la jan giaksak lo ding ahi.

¹⁴Bengngong chu hânsia lawkhum kin la, mitthûm kisuina dingle bawl diak kin: La Pathian la lau ding ahi: Keima hi LALPA chu ka hi.

¹⁵Vai la hawm phat leh, diklo tak in thu tan kin la, a genthei simmaw in, a hausate jabawl diak kin la dik tak in vaihawm in.

¹⁶Zuau gen ah mi lawttua in vak lumlet kin la, la Invêngte manthaina dingle hawl diak kin, Keima hi LALPA la Pathian ka hi’ngâl a.

¹⁷La lungthim ziang inle la chanau kinaipi la huat lo ding ahi; la Invêngte diklona chu hil tei tei in: Achutiloleh, nang thiamlo chang ding la hi.

¹⁸Phuba him him la lâk lo ding uh ahi, la mipite lak ah le thangsiatna gûk la vop him him lo ding uh ahi: Nangma la kihepi gual in la Invêngte la hepi ding a hizawi: Keima hi LALPA chu ka hi.

¹⁹Ka thuguatte la vop ding uh ahi. La ganchate le gancha dang tawh chi suansak kin; la lou ah le thâichi kihelkhawm chîng kin la, pat chi chuam chuam ah puan kigat inle kivan kin.

²⁰Suak numei khat, pawsal khat in a hualsa, tatna man a piak kim nai lo chu kua a hem khat in a luppi chun, ama chu tatdaw ahi nai lo ziakin, a thu dawpchian masang in amau chu thalup lo ding a hiu.

²¹Kikhopna biakbûk kotbul ah LALPA kiang ah, ama bawlkhial kithoina thillat dingin belamchal khat a pawsal chun a hun kai ding ahi.

²²Chuleh, a bawlkhialna tatna ding thiampu’n belamchal khat in LALPA kiang ah kithoina a bawl piak ding ahi; tichun, a gitlona ngaidam hung hita’n a.

²³Gam la hun luau ah, nêk ding ah thing chitinte la hun phû tak uh leh, a ga chu a zek ah la ngai ding uh ahi: Kum thum sung chu a zek ah la koi ding uh ahi.

²⁴A kum li’na chun LALPA choihoina dingin a ga zosia chu la latdaw ding uh ahi.

²⁵Himaleh, kum nga a tin phat leh, nang uh â ding ah a ga a tam sem theina dingin la nêk ding uh ahi; Keima hi LALPA la Pathian uh ka hi’ngâl a.

²⁶A thisan tawh a sa la nêkkhawm lo ding uh ahi; dawi leh âi bangma la bawl lo ding uh ahi.

²⁷La biang multe la mêt lo ding uh, la khamul le la phêk lo ding uh ahi.

²⁸Mithi â ding ah la taksau ki-âtliam in la kizik pawl lo ding uh a hi: Keima hi LALPA ka hi.

²⁹La gam uh chu a hung pawlche ah, nunsiatna a hung dimlona ding in, la chanu chu nawchizuak in kisubuaksak kin.

³⁰Ka sabbath ni chang unla, ka Mun Thiangtho le la ja ding uh ahi: Keima hi LALPA ka hi.

³¹Nangma kihibuakna dingin, dawi leh âisân thiamte dot leh ho in nei kin; Keima hi LALPA la Pathian uh ka hi’ngâl a.

³²Têksete leh la sâng ah upa zaw te la jabawl ah, la Pathian la lau ding ahi: Keima hi LALPA chu ka hi.

³³Gam dang mi, la gam sung ah hung chêngte chu a siatna ding uh la bawl lo ding ahi.

³⁴Nanghaw le Aigupta gam ah malzin ah um la hi tâk ziak un, la chênkhawmpiu gam dang mite chu, la lak ua piang gual tuk ah a um ua, nangmau la kihepi gual ua la hepi ding uh ahi: Keima hi LALPA la Pathian uh ka hi.

³⁵A gik leh a jang bûkna, a chom leh a sau te’na leh a tam leh a tawm te’na chun, mi la lepbawl lo ding uh ahi.

³⁶Bûkna dik, te’na dik, ephah dik leh Hin dik tak la mat ding uh ahi: Keima hi LALPA la Pathian uh, Aigupta gam ah kipat hun puidokpa chu ka hi’ngâl a.

³⁷Ka dan bawlte la zui ua, ka thuguatte la mat ding uh ahi: Keima hi LALPA ka hi, ti’n a gen a.