Read Vaiphei THIAMPUTE LEKHABU 20 Bible Online

THIAMPUTE LEKHABU 20 - Vaiphei bible

THIAMPUTE LEKHABU 20

¹Mosi kiang in LALPA chun:

²Israelte kiang in zia gual hin la gen ding ahi, a ti’n: Israelte lak a hem, a lak ua gam dang mi chêngden a hem in, Molekh ho’na ding ah ama suante lak ah mi pia taphot chu tha ngei ngei ding ahi; a gam ah mipite’n suang in a se’lup ding uh ahi.

³Zia mihing chu ângngat in do ding ka hi; ka min thiangtho hi’buak ding leh ka mun thiangtho subuak ding ah a chisuan lak ah mi Molekh ho’na ding ah a piak ziakin, a chipite lak ah kipat in ama chu nawdok ding ka hi.

⁴La lak ua kua a hem khat in Molekh ho’na ding ah a suante lak ah mi a piak chu la kimulosak ua, la hinghoi uh chun;

⁵zia mihing leh a Inkuante chu ângngat in do ing ka tin, tichun, Molekh ho’na ziak ah kisubuak zosia tawh ama chu a chipite lak ah kipat paitha ding ka hi.

⁶Dawithiam lam ah kihei leh bum thiam zui ah thanghuaite chu do dingin ângngat ing ka tin; a chipite lak ah kipat paitha ding ka hi.

⁷Tichun, kikoi thiangtho unla, thiangtho tak in um un; Keima hi LALPA la Pathian uh ka hi.

⁸Ka dan bawlte zui in la mat ding uh ahi: Keima hi LALPA, a hun hi’thiangthopa chu ka hi.

⁹Kuale, a nu a hem, a pa a hem, hânsia lawkhum taphot chu tha ngei ngei ding ahi; a nu leh a pa a sapsiat ziakin a thisan maw kipuak in a.

¹⁰Kuale, a Invêngpa ji tawh ângkawm chu, a ângkawmnu leh a ângkawmpa chu thalup gêl ding a hiu.

¹¹Mi a pa ji tawh lumkhawm tapo chu, a pa hi’mualpho ahi. Ângkawmte gêl chu thalup gêl ding a hiu; a thisan mawu amau in kipuak in au.

¹²Kua’nle, a chapa ji a luppi chun, a pani un tha gêl ding a hiu. Thil kidak um tak bawl a hiu ah, a thisan mawu a kipuak ding uh ahi.

¹³Pawsal in numei a luppi gual ah pawsal a luppi chun, thil ki’dak um tak bawl a hiu ah, a pani un tha gêl ding a hiu. A thisan mawu kipuak in au.

¹⁴Kua’nle nuchân ji’n nei kop ta leu, zia chu tatlêkna ahi. A pawsal chu numei teni chu tawh mei ah hâllup ding a hiu; la lak ua tatlêkna a umlo’na dingin.

¹⁵Kua a hem khat in gancha luppi taleh, ama chu la tha ngei ngei ding uh ahi; gancha chule la tha ding uh ahi.

¹⁶Numei in gancha a luppi chun, a numei tawh gancha chu la tha gêl ding uh ahi. A thisan mawu kipuak ta’n au.

¹⁷Mi khat in a suapinu a hem, a pa chanu a hem, a nu chanu a hem, ji ding ah a nei ah, a luppi chun thil jachâk um tak ahi. Zia gual mi chu a chipite mit mu in gawt ding ahi; a suapinu hi’mualpho ahi ziakin a gitlona chu gawt tâk mawng ahi ngâl a.

¹⁸Pawsal khat in numei a nîk buak nei lai tak ah a luppi chun, a zamaw a hawkdaw khâk ah, a thipawtna a mu chun, a thipawtna hawkdaw a hiziak in a pani un a chipiteu lak ah kipat paithâk ding a hiu.

¹⁹Kua’nle a nuneu a hem, a ni a hem a luppi lo ding ahi; zia chu a chanau kinaipi sukmualphona ahiziak in, a maw a kipuak ding uh ahi.

²⁰Pawsal kuale a paneu ji luppi chu, a paneu sumualpho ahiziak in, a gitlo mawu kipuak intin uh, suan leh pâk bei ah a um ding uh ahi.

²¹Kuale a suapipa ji lâkpiak chu, thil pawlche tak bawl ahi; a suapi hi’mualpho ahiziak in, suan leh pâk bei ah a um ding uh ahi.

²²La umna ding ua ka hun puilûtna ding gam hin a hun luak dawlona dingin, ka dan bawlte leh ka thuguat zosia la zui ding uh ahi.

²³La masang ua ka paithâk ding namte bawl dan la zui lo ding uh ahi. Zia a thil bawlteu ziak ah hin amau chu ka huat ahi ngâl a.

²⁴“A gam uh bawngnawi leh khuaizu luanna gam ngei chu, keima’n la gochan ding ua la lua ding un hun pia ding ka hi,” ti ah ka la gen tâk gual ah khan. Midangte lak ah kipat hun khendanpa LALPA la Pathian uh chu ka hi.

²⁵Ziaziakchun, sa thiang leh thianglo, vacha a thiang leh thianglo la khendan ding uh ahi. Sa thianglo nêk ziakin kisubuak kiu inla, vacha a hem, a thianglo ah ka khendan simsên lo ganhing zosiate ziak inle kisubuak kiu in.

²⁶Kei â dingin la thiangtho ding uh ahi; Keima LALPA chu ka thiangtho ngâl ah, nang uh kei â hiding in midangte zosia lak ah kipat in ka hun khenchuam la hiu hi.

²⁷Phunsân leh dawi thu mang numei hi hen la pawsal hileh, tha ngei ngei ding a hiu; suang ah se’lup ding a hiu: A thisan mawu kipuak ta’n au, ti’n a gen a.