Read Vaiphei THIAMPUTE LEKHABU 22 Bible Online

THIAMPUTE LEKHABU 22 - Vaiphei bible

THIAMPUTE LEKHABU 22

¹Mosi kiang in LALPA chun,

²Aron leh a chapate zia gual hin thu hil in: Israelte’n thil thiangtho kei â ding ah a hun lat uh ei piak khawmteu chu, chingthei tak in enkol uh hen, ka min thiangtho ah a kisukbuak lo’na ding un: Keima hi LALPA chu ka hi.

³A kiang un zia gual hin gen in: La suante lak ah kuanle a thianlo pet un LALPA kiang ah Israelte thil thiangtho hun piak khawmte a khoikhâk uh chun, zia mihing chu ka âng ah kipat in nawdok ding ka hi: Keima hi LALPA chu ka hi.

⁴Aron suan ah kua hileh phâk a hem, thil pawt nei a hem chun a thian masangsia thilzek thiangthote a nêk lo ding ahi. Chun, ama ah chipawt a hem, mithi ziak ah thianglo ahi’pet in, thil thiangtho a khoi ah,

⁵ama hi buak thei, a bok ah vâk him him a hem, mihing ama subuak thei a sukkhak a hem chun, thil pawt nei taphot chun,

⁶zia gual sukha mi chu nitâk lam masia a buak ding ahi; a kisil masia thil thiangthote chu a nêk lo ding ahi.

⁷Nisa a tum phat leh thiangtho ta’n tin, zia nung chuleh thil thiangthote nethei in ah, a an ahi ngâl a.

⁸A pûl thi a hem, sapêlup a hem chu a nêk lo ding ahi, kisubuak kha’n ah; Keima LALPA chu ka hi.

⁹Ka thupiak hi a vop ding uh ahi; tichun, ka Mun Thiangtho hi hi’buak ah, thiamlo chang ah a thi lona ding un; Keima hi amau hi’thiangthopa LALPA chu ka hi.

¹⁰Mi vântang thiampu In ah zintung hi hen la, thiampu suakte hiziang leule thil thiangthote chu a nêk lo ding uh ahi;

¹¹himaleh, thiampu’n sum ah a chawk, a suakte leh, a In ah piangte chun nethei in au.

¹²Thiampu chanu’n mi vântang a kichenpi chun, thillat thiangthote chu a nêkthei lo ding ahi.

¹³Himaleh, thiampu chanu chu meithâi a hem, mi nolsa a hem, cha bei a hem, a khangdawng lai gual ah a pa In ah hung kit ahi chun, a pa an chu nethei in ah; mi vântang in chu a nêk lo diu ahi.

¹⁴Mi kua a hem khat in he lo ah thilzek a nêk khâk pal chun, a man hisap in, a mun nga ah khen munkhat belap in, zia chu thiampu a piak ding ahi.

¹⁵Israelte chun LALPA kiang ah thilzek thiangtho a hun piak khawm uh chu kuama’n ahi’buak lo ding uh ahi;

¹⁶zia thilzek te chu a nêk ua leh, thiamlo chang intin uh, gitlo kithoina a bawl uh hung ngai ding ahi: Keima LALPA hi amau hithiangthopa chu ka hi’ngâl ah, a tia.

¹⁷LALPA chun Mosi kiang in:

¹⁸Aron leh, a chapate tawh, Israelte kiang in zia gual hin a gen sak ah: Israel Inkuan a hem, Israelte lak ah nam dangte a hem in thilpiak a lat ding a hem, a kitiamnau dungzui ah thillat ding hitaleh, LALPA âng ah hâlmang thillat ding a hun choi phot chun;

¹⁹bawngchal a hem, belam a hem, kêlcha hitaleh a chal, demna bei la hun lat ding uh ahi.

²⁰Demkâi him him la hun lat lo ding uh ahi, nang uh thasâng ah pom piak hilo ding ahi ngâl a.

²¹Kua a hem khat in LALPA kiang ah, a thutiam dungzui a hem, ama kiphalna dungzui a hem ah, kichamna thillat a piak ding chun, bawng hon lak a hem, belam hon lak a hem leh kêl hon lak ah kipat ahi inle, pom a hitheina dingin pha bukim leh demkai lo hi hen.

²²Gancha mitthûm a hem, piangsual a hem, meima nei a hem, phâk nei a hem, phulip nei a hem chu LALPA â ding ah mâichâm ah mei ah la lat lo ding uh ahi.

²³Bawngchal a hem, belam a hem lak ah piangsual chu nangma kiphalna thu ah thilpiak in pia thei in la tin; himaleh, kipautiamna thilpiak in vang pom piak thei hipua’n a.

²⁴Bang gancha hiziang leh le a tilchang thidup hileh, kikhenkêk hileh, a sia hileh, a kiget hitaleh, LALPA kiang ah la lat lo ding uh ahi; zia gual chu la gam sung ua kithoina la mat lo ding uh ahi;

²⁵gam dang mite gancha him him chu la Pathian hona dingin mang kin. Zia gual ganchate chu demkâi a hiziak un pom hilo ding ahi, ti’n gen in, a tia.

²⁶LALPA chun Mosi kiang in:

²⁷Bawng a hem, belam a hem, kêlcha a hem a pian phat leh ni sagi sung chu a pi tawh la khen lo ding ahi; ni giat a tin ni’ kipat in LALPA kiang ah mei ah thillatna mat dingin pom thei hita’n a.

²⁸Ahi’n la, bawngpi hihen la, belampi hitaleh, a pi tawh a no chu ni khat sung in la thalup khawm lo ding ahi.

²⁹LALPA kiang ah kipakna thilpiak la lat phat leh, a dan dungzui tak in lân sek in: Tichun, pom piak hiding la hi.

³⁰A sa chu a nikhua ma ma ah la nêk zaw ding uh ahi; a jing tiang ah a khing khêk lo ding ahi: Keima hi LALPA chu ka hi.

³¹Tichun, ka thupiakte hi la vop ua, la zui ding uh ahi: Keima hi LALPA chu ka hi.

³²Israelte lak ah choihoi ah ka umtheina dingin, ka min thiangtho hi’buak kiu in: Keima hi LALPA, nanghaw hi’thiangthopa chu ka hi’n,

³³la Pathian uh hiding ah Aigupta gam ah kipat puidokpa chu ka hi’ngâl a: Keima hi LALPA chu ka hi, ti’n a gen a.