Read Vaiphei THIAMPUTE LEKHABU 23 Bible Online

THIAMPUTE LEKHABU 23 - Vaiphei bible

THIAMPUTE LEKHABU 23

¹Mosi kiang in LALPA‘n,

²Israelte kiang ah zia gual hin gen in: Ziate hi LALPA â ding ah Kût, khawmpi thiangtho ah la puan ding, ka kût bîkte chu ahi, a ti’n:

³Ni guk sung in la sep ding cheng uh zo thiang unla, a ni sagi ni chu sabbath ni, khawmpi thiangtho chu ahi; zia ni hin na la sep lo ding uh ahi: La chênna zosiau ah, LALPA â ding ah sabbath ni chu ahi.

⁴A hunbî chiat ah la ze’chan ding uh, khawmpi thiangtho, LALPA Kûtte chu ziate hi a hiu:

⁵Tha khatna, a ni sawm leh li ni, nitâk chu LALPA Chiakân kithoina hun chu ahi;

⁶zia tha ma ma, a ni sawm leh nga ni chu LALPA â ding ah Thawi panglo Kût bawlna ding ni chu ahi: Ni sagi sung thawipanglo vaithum la nêk ding uh ahi.

⁷A ni masa pen chun khawmpi thiangtho nei unla; zia ni chun na la sep lo ding uh ahi.

⁸Ni sagi sung LALPA kiang ah mei ah thillat la lat ding uh ahi; a ni sagi ni chu khawmpi thiangtho hi’ntin: Na la sep lo ding uh ahi, ti’n a gen a.

⁹LALPA chun Mosi kiang in:

¹⁰Israelte kiang in zia gual hin gen in: La kiang ua ka piak gam sung la hung tun ua, bu la hun lâk phat ua leh, la bu lâknau ah ga masa phal khat thiampu kiang in la hun choi ding uh ahi.

¹¹Nang uh â ding ah pom a hitheina dingin LALPA âng in buphal chu a pei ding ahi; sabbath ni jing leh thiampu’n a pei ding ahi.

¹²Buphal la pei phat ua leh, LALPA kiang ah hâlmang thillat dingin belamno a chal khat, demna bei la hun kai ding uh ahi.

¹³Zia chu tawh an la latkhawm ding uh chu chângbuang nêl pha tak, ephah te’na dim khat se’sawm ah sua a se’ni, sathau helsa, LALPA â ding ah gimtui a hi’theina ding ah mei ah lat ding ahi; chuleh, zia chu tawh dawn ding la latkhawm ding uh chule uain, Hin khat se’li sua ah se’khat hi hen.

¹⁴La Pathian kiang ah la hun lat masang sia chu, vaithum ah huan a hem, kanthaw a hem leh a sial ah la nêk lo ding uh ahi: Ziate hi la chênnau taphot ah la suan zosia tiang ua, la kumkhaw dan ding uh chu ahi.

¹⁵Chun, Sabbath ni zaw jing ah buphal la pei uh thillat la hun ken niu ah kipat in hapta sagi sim to unla,

¹⁶sabbath ni sagi’na zaw, zia chu a ni sawmnga tin ni tiang chu sim to unla; zia ni chuleh LALPA kiang in anthak latna la bawl ding uh ahi.

¹⁷La chênnau zosia ah kipat in pei thillat dingin vaithum tâng ni, ephah khat mun sawm ah khen a mun ni gêl ah kisiam hun la’n la tin; zia chu chângbuang nêl pha tak ah kisiam hi’ntin, thawi tawh kihel, LALPA âng ah ga masa thillat ah lat ding ahi.

¹⁸Vaithum tawh, belamno a chal sagi demna bei ngen, kum khat ah upa; chuleh, bawngchal tuai pakhat tawh, belam chalting pani la hun kai ding uh ahi; ziate chu LALPA kiang ah hâlmang thillat tawh, an latna leh dawn ding latna tawh, LALPA kiang ah mei ah thillat gimtui hiding a hiu.

¹⁹Chuleh, gitlo thoina dingin kêlchal pakhat hun lân in la tin uh, kichamna thillat dingin belamno a chal pani, kum khat ah upa gêl la hun lat ding uh ahi.

²⁰Thiampu chun belamno pani chu tawh LALPA âng ah pei thillat ding in ga masa vaithum chu tawh a pei ding ahi: Ziate chu thiampute an ding ah LALPA kiang ah kilân thiangtho hiding a hiu.

²¹Zia ni chu khawmpi thiangtho ahi ti ah puang in mang unla, na la sep lo ding uh ahi. Zia hi la chênnau zosia ah la khang zosiau â ding ah dan thu guat chu ahi.

²²Chun, la gam ua bu la ât phât uh leh, loubân tiang ah la lâk thian lo ding uh ahi; chuleh, bulêpte le la lâk lo ding uh ahi; migentheite leh gam dang mite â ding ah la nutsia piak sek ding uh ahi: Keima hi LALPA la Pathian uh ka hi, ti’n a gen a.

²³LALPA chun Mosi kiang in

²⁴“Israelte kiang ah zia gual hin gen in: Tha sagi’na, a ni khat ni phat leh, kichawl dam unla, pengkul mûtna hun ah kipat in khawmpi thiangtho la mat ding uh ahi.

²⁵Zia ni chun na la sep lo ding uh ahi: himaleh, LALPA kiang ah mei ah thillat la lân ding uh ahi,” ti’n a gen a.

²⁶LALPA‘n Mosi kiang in,

²⁷“Zia tha sagi’na, ni sawm ni’ chu Tatna ni hi’ntin; kihigimthei unla, LALPA kiang ah mei ah thillat la lat ding uh ahi;

²⁸zia hun sung ah chun na la sep lo ding uh ahi; LALPA la Pathian kiang ua nang uh kitatna bawl ni, Tatna ni chu ahi ngâl a.

²⁹Zia hun sung ah kisugim lo chu, kua hiziang leh le a chipite lak ah kipat paithâk ding ahi.

³⁰Chun, kua hitaleh zia hun sung ah nasem chu, zia mi ngei chule a chipite lak ah kipat hi’mangthai ding ka hi.

³¹Na la sep lo ding uh ahi: la chênna zosiau ah la suanteu chan ah la kumkhaw dan ding ua ka guat chu ahi.

³²Nang uh â dingin sabbath ni hi’ntin, la kisukgenthei ding uh ahi; zia tha a ni kuana nitâk lam ah kipat a nitâk kît chan in la sabbath niu chu la chan ding uh ahi,” ti’n a gen a.

³³LALPA chun Mosi kiang in,

³⁴“Israelte kiang in zia gual hin gen in, a ti’n: Zia tha sagi’na ni sawm leh nga ni’ kipat chun, LALPA â ding ah Biakbûk Kût ni sagi la mat ding uh ahi.

³⁵A ni masa pen chu khawmpi thiangtho hi’ntin: zia ni chun na la sep lo ding uh ahi.

³⁶Ni sagi sung LALPA â dingin mei ah thillat thiangtho lân in la tin uh, a ni giat ni chu nang uh â dingin ni thiangtho hiding ahi: khawmpi thiangtho hi’n ah; zia sung ah chun na la sep lo ding uh ahi,” a tia.

³⁷LALPA chun Kût bituk ah nei ah a guatte hi la bawlna ding un khawmpi thiangtho bawl ding ah puang in, LALPA kiang ah hâlmang kithoinate, an ah kithoinate, kithoina him him leh dawn thei chi ah kithoinate a ni guat dungzui chiat ah la bawl ding uh ahi.

³⁸Zia la kithoinateu hi LALPA sabbath nite, thilpiakte, la kitiamnateu, ngam tawk kithoinate LALPA kiang ah la piakteu bân ah la bawl ding uh ahi.

³⁹Tha sagi’na, ni sawm panga ni ah thâigate la lakkhawm phat uh leh, LALPA â dingin ni sagi Kût la mat ding uh ahi; a ni khat ni chu sabbath ni tawh kituak intin, a ni giat tin ni chule sabbath ni tawh a kituak kit ding ahi.

⁴⁰Ni khat ni chun sêkchângte, tûmthing bâkte, thingbawkte leh huisûmte hun la’n la tiu in, LALPA la Pathian âng in ni sagi lim tak in la um ding uh ahi.

⁴¹Kum khat sung in LALPA â ding ah ni sagi Kût la bawl ding uh a hi; a tha sagi’na la mat sek ding uh ahi: Zia hi la suanteu tiang ah la kumtuang dan ding uh chu ahi.

⁴²Bawk In ah ni sagi vachêng in la tiu in, Israel mi ah piang zosia bawk In ah a chên ding uh ahi;

⁴³la suanteu in, Israelte Aigupta gam ah kipat ka puidaw lai in, sawlbawk ah a la chêng ui ti a hettheina ding un: Keima hi LALPA la Pathian uh ka hi, ti’n a gen a.

⁴⁴Tichun, Mosi’n le Israelte kiang in LALPA hun guat Kût hunbî dingte chu a puang tai.