Read Vaiphei THIAMPUTE LEKHABU 24 Bible Online

THIAMPUTE LEKHABU 24 - Vaiphei bible

THIAMPUTE LEKHABU 24

¹LALPA chun Mosi kiang in

²Thaumei a vâk zing theina dingin, meivak tui ding a Oliv thau kithitthiang hun la dingin Israelte thu pia’n la.

³Kikhopna biakbûk sung hetpina puanjak pawlam ah; LALPA âng ah nitâk ah kipat jingkal tiang ah la vak zing ding uh ahi ti, Aron in thu a piak ding ahi: Zia hi la suanteu tiang ah la bawl zing ding dan uh chu ahi.

⁴LALPA âng ah sana thaumei koina thiangtho chung in, thaumeite chu koi zing dingin thu la piak ding ahi.

⁵Chângbuang nêl pha tak la’n la tin, pei sawm leh ni kang min in la tin; pei khat chu ephah se’sawm sua ah se’ni chiat hiding in.

⁶LALPA âng ah sana dawkan thiangtho chung ah gual khat ah paguk jel um dingin gual ni’n la tian ding ahi.

⁷A gual chung chiat ah chun gimtui la koi ding ahi, LALPA â ding ah thillat etsakna ding vaithum a hitheina dingin.

⁸Sabbath ni si’n leh LALPA âng ah Aron in a thak in a then jel sek ding ahi; Israelte â dingin kumkhua a thuthung ding uh ahi.

⁹Zia chu Aron tawh a chate â ding hi’ntin, Mun Thiangtho sung in a nêk ding uh ahi: Zia chu kumkhaw dan dungzui ah, LALPA kiang ah mei ah thil kilânte lak ah amau chantum thiangtho pen chu ahi ngâl a, a tia.

¹⁰A nu Israel mi numei khat leh a pa Aigupta mi pawsal khat chapa, Israelte lak in a hung pawtdok ah, zia pa chu Israel mi khat tawh giabuk in a kina tau a.

¹¹Israel nu chapa chun, LALPA min a hun dem ta’n. Ziapa chu Mosi kiang in a hun pui tau ah; a nu min chu Dan nam ah mi Dibri chanu Shelomith ahi’n;

¹²zia pa chu suangkul in a khum tau ah; tichun, LALPA‘n bang gual ah thutan ding a hem ti a lungthim ua a hun hiatsak ding chu a ngâk tau a.

¹³LALPA chun Mosi kiang in,

¹⁴“Hânsia ei lawkhumpa chu giamun pawlam ah puidok unla; a thu hetpi zosia chun a luchung in a khut uh nga chiat uh hen la, mipite chun ama chu suang in seplum uh hen.

¹⁵Chuleh, nang in Israelte kiang in: Kuale a Pathian min gensia taphot in a gitlo man a kipuak ding uh ahi.

¹⁶LALPA min gensia taphot chu thalup ngei ngei ding a hiu: Mipi zosia’n suang in a se’lup ding uh ahi: gam dang mi le a gam ah mi gual in LALPA min a gensiat leh tha ngâl ding ahi.

¹⁷Mihing that him him chu tha ngei ngei ding ahi.

¹⁸Kuale gancha that chun, a gancha sik in gancha pha a piak thuk ding ahi.

¹⁹Kua’nle a Invêngte a sukliam chun, ama le zia gual ma chu bawl ding ahi.

²⁰Gu thasâng ah gu, mit thasâng ah a mit, ha thasâng ah a ha; mi a hi’nat gual in ama chung ah le bawl ding ahi.

²¹Kua’nle, gancha a tha chun a dit ding ahi: Mihing that chu ama le tha ngei ngei ding ahi.

²²Gam dang mite â ding leh nangmau gam sung ah mite â dingin dan pakhat, a kibang la nei ding uh ahi: Keima hi LALPA la Pathian uh ka hi’ngâl a,” ti’n gen in, a tia.

²³Zia gual chun Mosi’n Israelte kiang in a gen tai. Hânsia sua’pa chu giamun pawlam in a puidok ua, suang in a seplum tau a. Tichun, LALPA‘n Mosi kiang ah thu a piak gual ngei in Israelte’n a bawl tau hi.