Read Vaiphei THIAMPUTE LEKHABU 25 Bible Online

THIAMPUTE LEKHABU 25 - Vaiphei bible

THIAMPUTE LEKHABU 25

¹Sinai tâng ah LALPA chun, Mosi kiang in,

²“Israelte kiang ah zia gual hin gen in, a tia: Gam ka piak ding chu la hung tun phat ua leh, gam in LALPA â dingin chol kum a nei sek ding ahi.

³Kum guk lou ah thâi chîng inla tin uh, kum guk sung grep huan thohâ in la tiu in; a gate chu la lâk khawm ding uh ahi;

⁴ahi’n, a kum sagi’na chu gam â ding ah sabbath kum ahiziak in, LALPA sabbath kum hi’n ah: La lou ua thâichi la chîn lo ding uh ahi, la grep huan uh le la thawhâ diak lo ding uh ahi.

⁵A likekte chu la lâk lo ding uh ahi, la thawhâ lo uh grep chule la lâk lo ding uh ahi: gam â ding ah sabbath kum hiding ahi.

⁶Gam sung â ding ah sabbath chol kum hun sung ah chun, nanghaw leh la suak pawsal leh numeite, la migoite leh la kiang ua um gam dang mite â ding leh,

⁷la gan honte leh la gam ua gamsa um zosiate, chuleh, a gam gate zosia chu la nêk ding uh ahi,” a tia.

⁸Kum sagi ngen, sagivei sim to unla, kum sawmli leh kua hung tung intin;

⁹a tha sagi’na, a ni sawm tin ni, Tatna ni ah chun pengkul ngai tak in mût in la tin; chuleh, la gam sung pumpiu ah le pengkul la va mûtsak ding ahi.

¹⁰A kum sawmnga’na chu chang in la tin uh, gam sung ah chêng zosia â ding ah zalenna la puan ding uh ahi. Zia chu nang uh â ding ah jubili hi’ntin: Mi tin a thil nei zosiau le’kit in la tiu in, mi tin a In lam chiat un la sawl kit ding uh ahi.

¹¹Zia kum sawmngana chu nang uh â dingin jubili hi’n ah: Thâichi la chîn lo ding, ât le la ât lo ding uh, a likekte le la lâk diak lo ding, la grep likekteu ga le la lâk lo ding uh ahi;

¹²jubili ahi ngâl ah; nang uh â dingin a zek thiangtho hiding ahi: la lou ua piang bep chu la nêk ding uh ahi.

¹³Zia jubili kum ah hin mi tin a thil neiteu la le’kit chiat ding uh ahi.

¹⁴La Invêngteu kiang ah la zok thil him him a hem, la Invêngteu khut ah la chawk thil him him unle la kilepbawl lo ding uh ahi.

¹⁵Jubili nung ah kum um ding jat dungzui in, la Invêngte lou mun chaw’n la tin, a ga chu a kum dungzui ah hisap in a zawk ding ahi.

¹⁶A kum tam dungzui in a man tam sak in la tin, a kum tawm dungzui in a man la kiamsak ding ahi; a kum zat dungzui in a ga chu zok ding ahi ngâl a.

¹⁷Kilepbawl tua kiu inla, la Pathian uh la lau ding uh ahi: Keima hi LALPA la Pathian uh ka hi’ngâl a.

¹⁸Ka thuguatte hi bawl unla, ka dan thupiakte le vop in la zui ding uh ahi; gam sung ah bit tak ah la um zing theina ding un.

¹⁹Gam chun a ga sua intin, vâ tak in ne’n la tin uh, bit tak in um ding la hiu.

²⁰A kum sagi’na hun sung ah bangma chîng lo leh lakhawm lo ah um ziang ding chu, bang ne leh dawn ah um ding I hi tam? Ti la um khâk uh chun,

²¹a kum gukna hun sung ah khan maljawlna thupi tak hun pia’ng ka tin; tichun, kum thum sung hial la nêkkhop ding un ga hun piansak ding ka hi.

²²Chuleh, a kum giatna thâi la chîn phat unle, bului chu ne nalai in la tin uh; a kum kuana ga thak a tun hun tiang in bului chu ne nalai ding la hiu.

²³Gam chu kum sawt â dingin la zokdaw him him lo ding uh ahi; gam chu kei â ahi ngâl ah: nanghaw hi kei â ding a mikhual leh lou bawl mai mai la hi’ngâl un.

²⁴La gam chan zosia chu a gam neitu ma ma’n a tat kit thei ding ahi ti la het zing ding uh ahi.

²⁵La suapi hung genthei in, a gothil khenkhat zuakdok taleh; a chanau kinaipi khat hung in, a suapi’n a zoksa chu a hung tatdaw kit ding ahi.

²⁶A gothil tatdaw piak thei ding mi a nei lo chun, a hung khawsak thei deu phat leh, ama’n a kitat kit thei ding ahi;

²⁷zia nung ah chun, a zokna kum sim intin, a zokna pa kiang in, a man khêl ah a piak belap ding ah kilawm a sak jat chu piak belap intin, a thil nei chu a chan kit ding ahi.

²⁸Himaleh, a tat kit thei lo chun, jubili kum tiang in a chawpa khut in um ta’n ah; jubili kum a tun phat leh a neipa kiang in pedok kit intin, a neipa ma ma a chan kit ding ahi.

²⁹Chuleh, kuale khawpi kulbâng nei sung ah a In a zok chun, a zok nung ah kum khat sung in tan kit thei in ah; tat kit theina ding hun chu kum khat sung ahi ngâl a.

³⁰Kum khat sung ah a tat kit zaw lo chun, khawpi kul nei sung ah In chu a chawpa’n a suante khang tiang in a chang den ta’n ah: Jubili kum inle a piakdaw kit tâk lo ding ahi.

³¹Ahi’n la, kulbâng nei lo khawneu ah Inte chu thingtâng gam gual ah simkhawm hi’ntin, tat kit thei hi’n ah; chun, jubili kum phat leh a piakdaw kit ding ahi.

³²Ahi’n, Levite chênna khawpi taphot chu amau in a nop hun hun un tan kit thei in au.

³³Mi kua’nle Levite khawpi sung ah In zok a chawk chu, a hung tat kit tâk lo inle, jubili kum phat leh a piak kit tei tei ding ahi; zia khawpite chu Israelte lak ah kipat Levite gochan ahi ngâl a.

³⁴Ahi’n, a khawpi dâi kiang ah loute chu zuakdok thei pua’n au; kumkhua a gochan uh ahi ngâl a.

³⁵La suapipa a genthei ah, la lak ua a khawsak maw chun la kaitua ding uh ahi; mikhual gual in la kaitua ding uh ahi.

³⁶Ama ah kipat a pung la kin la, ama ah kipat lawkna le hawl diak kin; la Pathian uh lau zaw un, la suapiu la kiang ua a khawsak theina dingin.

³⁷A pung dingin la dangka a kiang in la piak ding ahi puai, a lawk dingin la bu la thung lâksak ding ahi diak puai.

³⁸Keima hi LALPA la Pathian uh ka hitheina ding ah Aigupta gam ah kipat hun puidokpa, Kanaan gam hun pepa chu ka hi’ngâl a.

³⁹La suapi la kiang ah chêng a hung genthei ah, la kiang ah a hung kizok chun, suak gual ah la bawl lo ding ahi.

⁴⁰Ahi’n la, goi thaw a hem, kilaw a hem gual in la kiang ah a um ding ahi. Jubili kum tiang in la na sêm hen.

⁴¹Zia nung chuleh, ama tawh, a chate tawh, nangma ah kipat in a pawt ding uh ahi; a Inkuante kiang in la kile’kitsak ding ahi: tichun, a pu leh pate go mun lam in a kile’kit ding uh ahi.

⁴²Amau chu keima suak hiding ah Aigupta gam ah kipat ka puidaw ahi ngâl un: Suak gual ah zokmang lo ding ahi.

⁴³A chung ua nunsia tak ah thu la nei lo ding ahi; la Pathian la lau ding ahi.

⁴⁴Suakpa leh suaknu ding chu, la chênna gam tuam ah mite lak ah kipat hin la kichawk ding uh a hizaw ngâl a.

⁴⁵La gam sung ua gam dang mi chêngdente lak leh la gam ua piangte lak ah kipat in la suak ding uh chaw thei in la tin uh; zia gual ah la kichawkteu chu nang uh â hiden ta’n au.

⁴⁶Amau chu la nung ua la chateu go dinginle la lâk thei uh a hiu, go in a luaden ding uh a hiu. Amau chu kumkhua’n la suak uh hi’n au; ahi’n la, la suapiu Israel mite chu nunsia tak in thu la nei khum lo ding uh ahi.

⁴⁷Nanghaw ziakin gam dang mi a hem, mikhual a hem chu hung hausa ta hen la, la suapiu, la kiang ua chêngte chu hung genthei tau hen la, la kiang ua gam dang mi a hem, mikhual a hem kiang ah chun vakizuak in, gam dang mi Inkuan ah chun pûk lut taleh,

⁴⁸ama a va kizok nung ah chun tatdaw thei hi’ntin, a Inkuanpite lak ah khat in a tatdaw ding ahi;

⁴⁹a paneu ahiloleh, a paneu chapa’n tandok thei in ah; ahiloleh, ama chanau kinaipi him him in tan thei in ah: Chuleh, ama leh ama le kitan zo ding ahi chun, kitan thei in a.

⁵⁰Ama tawh a chawpa’n ama a kizok ah kipat jubili hun kit ding tiang a hisap ding uh ahi. Ama tatdawna ding man chu zia hun sau dan ah chu a bithiak ding uh ahi. Ama chawpa kiang ah a um sung kha sum thalaw ah um gual ah ngai hi’n a.

⁵¹A um nâk lai ding kum tam in a vât nâk lai chun, a kitatna man ding chu tam mai ding ahi.

⁵²A um kum chu a tawm ah, jubili kum ting lo ahi chun, ama tawh, a sum chu kum dungzui in tatna man chu a piak kit ding ahi.

⁵³Ama chu kum si’n ah suak kilaw gual in a kiang in a um ding ahi; la mit mu ah midang in a chung ah nunsia tak in thu a nei khum lo ding ahi.

⁵⁴Zia kumte ah hin, ama chu tatdaw ahilo chun, ama tawh, a chate tawh jubili kum in a pawt tho tho ding uh ahi.

⁵⁵Kei â dingin Israelte chu suak a hiu a: Aigupta gam ah kipat ka puidaw, ka suakte chu a hiu: Keima hi LALPA la Pathian uh chu ka hi, ti’n a gen a.