Read Vaiphei THIAMPUTE LEKHABU 26 Bible Online

THIAMPUTE LEKHABU 26 - Vaiphei bible

THIAMPUTE LEKHABU 26

¹Thing leh suang leh thil dang milim siamkawm leh dawi khuam la kisiam lo ding uh ahi; zia tawhbang milimte chu la ho’lo him him ding uh ahi: Keima hi LALPA la Pathian uh ka hi’ngâl a.

²Ka sabbath nite la chan ua, ka Mun Thiangtho la ja ding uh ahi: Keima hi LALPA chu ka hi.

³Ka dan bawlte la zui ua, ka thupiakte vop ah la zui uh chun,

⁴a hun tak in gawtui hun pia’ng ka tin, gam in a ga sua intin, lou ah thingte’n le a gau sua ding a hiu.

⁵La buvok hun uh grep law hun in lap intin; la grep law nau in a chi the’ kit hun tiang hun lap kit in ah; la vaithum uh vâ tak in ne’n la tin uh, la gam sung ua bit tak in chêng in lau.

⁶Chuleh, gam sung muanna pia’ng ka tin, lum hiat hiat in la tin uh, kuama’n hun sulau pua’n au: Gam sung ah kipat in gamsa gilote del mang ing ka tin, la gam un chemjam kilek diak pua’n a.

⁷La mêlmateu del in la tiu in, la âng ua chemjam in pûk in au.

⁸Mi panga’n za khat del in la tin uh, la lak ua za khat in sang sawm naw jak ding la hiu; la mêlmateu la chemjam un pûk in au.

⁹Ka doisakna’n hun entha zing ing ka tin, ga tam tak sua ah hun siam in, nasa tak in hun hi’pung ding ka hi: Chuleh, la kiang ua ka thuthung hi’det ding ka hi.

¹⁰Bu lui sawtpi pi kikoi khawmte ne’n la tin uh, buthak koina dingin buluite chu sungdok hial ding la hiu.

¹¹La lak un chêng ing ka tin, hun kiheimangsan ta pua’ng ka.

¹²La lak un chêng ing ka tin, la Pathian uh hita’ng ka ti’n, nang uh le ka mite hita’n lau.

¹³Keima hi LALPA la Pathian uh, a suak ua um kit talo ding ah Aigupta gam ah kipat hun puidokpa chu ka hi: la ngawngkolteu hi’bong ah, jang tak ah hun chiasak pa chu ka hi.

¹⁴Himaleh, ka thu la ngai lo ua, zia ka thupiak zosiate hi la zui lo ua a hem,

¹⁵ka dan bawlte musit ah, ka dante la ningtel ua, ka thupiak zosia bawl lo ah, la baw siat uh chun;

¹⁶ke’nle la chung un zia gual hin hun bawl ding ka hi: La chung un thil lau um hung tung intin, sukdam kit theilo natna leh luchang natna, la mit hi’thûm ding leh la hin nau chawpkang ding hivei hun lênsak ding ka hi. La thâichiteu la mêlmateu in nek zaw piak ding a hiu.

¹⁷Nang uh do dingin ka mai le’hei ing ka tin, la mêlmateu thâgam in hung um in lau: La mêlmateu in la chung un vaihawm intiu in, kuama del lo inle jam in lau.

¹⁸Zia gual tiang a hile ka thu la ngai diak lo ua leh, la gitlonau chu a le’sagi’n hun thuk ding ka hi.

¹⁹La kisuanpiu la thil hi’theinau hi’sia’ng ka tin; nang uh â dingin van chu thîk gual in tâksak ing ka tin, lei chule sum-eng gual in châksak ding ka hi.

²⁰La hatnau a thawn in sêng in la tin uh, la louteu in ga sua pua’n tin, gam ah thingte’n le ga sua diak pua’n au.

²¹Ka doi lo gual ah la umzing ua, ka thu la ngai lo uh chun, la gitlonau chu a le’sagi’n hun thuk ding ka hi.

²²Gam sahângte hun sawl ing ka tin, la lak ua la chateu hun tokmang in, la ganchateu hun ne zo in, nang uh hun hi’kiam intin, la lamlianteu le nutsia hung hita’n a.

²³Zia gual ah gawtnate ziak ahi keima lam hun nga diak lo ah, la huhel zing uh chun,

²⁴ke’nle nang uh hun do zing ing ka tin: La gitlonau chu a le’sagi’n keima ngei ngei in hun thuk ding ka hi.

²⁵Ka thuthung phuba lâkna dingin, la chung un chemjam hun lênsak ing ka tin: La khawpi sung ua bitna hawl ah la taikhawm phat ua leh le, la lak un hipi hun lênsak ing ka tin: Chuleh, la mêlmateu khut ah piak in um ding la hiu.

²⁶La bu In teu ka suksiat phat leh, numei sawmkhat in thuk pakhat ah vaithum kang khawm thei ta’n tin uh, te’ chit chiat in la vaithum ding uh hun pia ta’n tin uh, zia chu ne zo in la tin uh, vâ in, tai diak pua’n lau.

²⁷Hiti zozai ziak ah hin ka thu ngai diak lo ah, ka tilo dan dan ah la kihei tei tei nâk lai uh chun;

²⁸lungna tak in nang uh lang in umzing ing ka tin, la gitlonau a le’sagi’n hun thuk ding ka hi.

²⁹La chapateu leh la chanuteu sa hun ne ding la hiu.

³⁰La thoimualteu khênchim ing ka tin, la gimtui mâichâmte uh le hi’chim ding ka hi; la luangteu chule la milimteu chung in siavum ding ka hi; ziaphat chuleh, hun ki’dak ta’ng ka.

³¹La khawpiteu giauchang in siam ing ka tin, la mun thiangteu le mun thip chansak ing ka tin, la gimtuiteu le a la hîp ta pua’ng ka.

³²La gam uh hisia dim dem ing ka tin, zia tak ah chêng ding ah hung la mêlmateu nasan in lamdang sa’n au.

³³Chuleh, namtin lak ah hun thejak ing ka tin, la nung uh chemjam in hun delzui pek nalai ding ka hi. La gam uh nutsia in um intin, la khawpiteu le man lo suak ta’n a.

³⁴Chun, nang un la mêlmateu gam ah um ding ah la gam uh la nutsia sung un, gam in sabbath kum a la nei intin; zia sung ah chun gam chu a la chawldam ding ahi.

³⁵Gam chu la pawtsan sungsiau a la kichawldam ta’n ah, nanghaw um sung in zia gual ah kicholdamna hun chu a la nei paw’ngâl a.

³⁶Hing leh dam ah suakcha, a mêlmateu gam ah umte chung ah chun lungthim ah lauthawngna tunsak ing ka tin; hui in hampa a mût git mai mai le lau ah, chemjam in a del gual ah tai in, kuama’n a del lo inle kipal pâi hial in tai in au.

³⁷Kuama’n a del lo inle chemjam in a del gual ah tai in, nanghaw leh nanghaw kiphu pâi hial in tai in la tin uh; la mêlmateu do dingin hatna him him nei pua’n lau.

³⁸Chuleh, namtin lak ah mangthai ta’n la tin uh, la mêlmateu gam in hun val zo ta’n a.

³⁹La lak ua suakcha sunte chule nangmau gitlo ziak leh, la pu la pateu gitlona ziakin la mêlmateu gam ah chun lungthim chinchai bei in um in au.

⁴⁰Himaleh, keima ei kalnateu, a pu a pateu gitlona tawh amau gitlonate leh, keima ei dodâl ah ei kalnateu leh a vâkmanna teu a kipuan ua;

⁴¹ke’nle amau ka la do zing ah, a mêlmateu gam ah ka la puinateu, chuti nung ah le a lungthim bil viloteu a khiak niam ua, a gitlonateu ziak ah ka gawtnate a hetthiam phat ua leh,

⁴²ziaphat chuleh, Jakob kiang ah ka thuthung hezing ing ka tin, Isak kiang ah ka thuthung tawh Abraham kiang ah ka thuthungte le hezing ta’ng ka tin, gam hile hezing ta’ng ka.

⁴³Ka vaihawmnate a pom lo ziak leh, ka thuguatte a la huat tâk ziak ua, a sukkhialnau zosia ah kipat a kisiamphat kit sung un gam chu nutsia ah um in, a sung ah chêngte umlo kâl in a la kichawldam ta’n a.

⁴⁴Zia gual ah chun bawl in, a gâlteu gam ah vaum ziang maleu, amau chu paimang theng ziang pua’ng ka tin; amau tawh ka thuthung botsia ding leh amau hi’mangthai ziang dingin muda diak pua’ng ka: Keima hi LALPA a Pathian uh ka hi’ngâl a.

⁴⁵Himaleh, a Pathian uh hiding ah, nam tinte mit mu ah Aigupta gam ah kipat ka puidaw, a pu leh a pateu thuthung kha amau ka doisakna ziakin hezing ing ka; Keima hi LALPA chu ka hi, ti’n a gen a.

⁴⁶Ziate hi, Sinai tâng ah Mosi kiang ah Israelte â ding ah, LALPA‘n amau tawh a kikâl ua dante, thuguatte leh thuthung a siamte chu ahi.