Read Vaiphei THIAMPUTE LEKHABU 27 Bible Online

THIAMPUTE LEKHABU 27 - Vaiphei bible

THIAMPUTE LEKHABU 27

¹LALPA chun Mosi kiang in,

²Israelte kiang ah zia gual hin gen in, a ti’n: Mi khat in kitiamna chuam a bawl phat leh, a kitiamna tawh kigûn chu LALPA â ding ah la sak jat dungzui hi’ntin;

³la bithiak ding dan chu: Pawsal kum sawmni ah kipat kum sawmguk kikâlte chu, Mun Thiangtho ah shekel dungzui in dangka shekel sawmnga hi hen la;

⁴numei ahileh shekel sawmthum hisak in.

⁵Kum nga kipat kum sawmni tiang kikâl mi, pawsal ahileh shekel sawmni bituk inla; numei ahileh, shekel sawmkhat la bituk ding ahi.

⁶Tha khat ah kipat kum nga kikâl ah upa pawsal chu, dangka shekel nga hi’ntin; numei chu dangka shekel thum la hisak ding ahi.

⁷Kum sawmguk ah kipat a chung lam chu pawsal ahileh, shekel sawm leh nga hisak in la tin, numei chu shekel sawm hi’n a.

⁸Kuale la bituk jat pezo lo khat a la um chun, ama chu thiampu kiang ah hun pui in la tin, thiampu’n ama â ding ah bituk bawl piak hen: Amau kitiamna dungzui ah, a piak thei ding dawl uh thiampu’n bituk thak a siam piak ding ahi.

⁹Chun, gancha LALPA kiang ah lat ding ah mite’n a hun choi taphot chu, LALPA ma ah a lat thiantho ding ahi.

¹⁰Ama chun a pha chu a phalo a hem, a phalo chu a pha a hem ah thentua lo ding ahi; gancha a thentua ding chu, a thenna tawh, a paniu in a zek gêl hiding a hiu.

¹¹Gancha thianglo chu LALPA â ding ah lat lo him him ding ahi, zia gual gancha chu thiampu piak mai ding ahi.

¹²Thiampu’n a pha hi’n, a phalo hileh, a man ding bithiak bawl in a; a bithiak dungzui chun a um mai ding ahi.

¹³Ama’n a kitat kit ding leh, a man a bithiak zat se’nga sua ah se’khat a belap ding ahi.

¹⁴Kua’nle a LALPA â ding ah In lat thiantho ding a ti chun, a pha hileh, a sia hileh thiampu’n a man ding a bithiak dungzui himai ding ahi.

¹⁵Chuleh, a In lânpa chun a tat kit nop leh, a man bithiak zat a se’nga sua ah se’khat belap in chang kit thei in a.

¹⁶Kua’nle a gam luana mun LALPA â ding ah a lat ding chun, a lei ah buchi kithe jat ah kipat in a man ding chu bithiak hi’n ah; barli buchi homer khat chîn theina mun chu, dangka shekel sawmnga ah bithiak ding ahi.

¹⁷Chun, a lou chu jubili kum ah kipat a man la bithiak dungzui ah a lat chun, a man la bithiak jat kha hizing in a;

¹⁸ahi’n, jubili kum nung ah a lat ahi chun, a kum dungzui in a man chu sût in la tin, jubili kum tiang in la kat jat ah kipat in hi’kiam ding ahi.

¹⁹Chun, lou lântu chun a tat kit nop leh, a man bithiak jat se’nga sua ah se’khat belap intin, a neitu masa chu chang kit intin;

²⁰tan kit lo ah, a lou chu mi dang kiang ah zok a la hi chun, tan kit thei ta pua’n a.

²¹Ahi’n, jubili kum a gâlkâi kit leh, lou chu LALPA â ding ah lou thiangtho hita’n tin, thiampute chan ding hita’n a.

²²Chuleh, mi khat in ama nei hilo, mi dang lou a la chawksa chu LALPA â ding ah a lat chun,

²³jubili kit tiang chan ding ah a man kihun tawk chu thiampu’n sût intin: LALPA â ding ah thil thiangtho gual in a piak ding ahi.

²⁴Jubili kum a chun lou chu a nei masa penpa kiang ah piak kit ding ahi.

²⁵A man zosia chu Mun Thiangtho shekel dungzui ah bithiak hi’ntin: Gerah sawmni chu shekel khat tawh kituk ding ahi.

²⁶Gancha a piang masa pen chu LALPA â ding ahi; kuama’n a lat lo ding ahi: bawng hihenla, belam hitaleh, LALPA â ahi.

²⁷Gan thianglo ahi chun, a man bithiak dungzui ah tat ding ahi; a man se’nga sua ah se’khat belap in a tat kit ding ahi: a neipa’n a tat lo chun a man bithiak dungzui ah zok ding ahi.

²⁸Kuama’n mihing hihenla, gancha hihenla, a gam hiziang ta leh, LALPA â ding ah a lat thiantho chu a zuak in, a tan kit thei talo ding uh ahi; LALPA â ding ah thil kilân doksa zosia chu thilzek thiangtho pen a hita ngâl a.

²⁹Mihing sukmang ding ah latdaw ah um sa chu tatkit thei a hita puai; thalup tei tei ding ahi.

³⁰Gam sung ah sawm ah khat zosia, lou ah thâi ga hihenla, thing ah gate hitaleh, a leng in LALPA chantum ahi: LALPA â ding ah thil zek thiangtho ahi.

³¹Kua’nle a sawm ah khat piaksa chu a tat kit nop chun, a se’nga sua ah se’khat belap in tan kit thei in a.

³²Huang ah vul gancha lak ah sawm ah khat ding chu gan chinna mol nuai ah lût ah a sawm tinna pen chiat chu LALPA â ding ah zek thiangtho ahi.

³³A siat leh a phatle en se se ki’hen la, a thatheng dingle a bawl lo ding ahi: a then him him ding ahi inle, a thenna tawh a then pen chu a zek gêl a hi’tâk ding ziak un, tat kit thei hita lo ding ahi, ti’n a gen a.

³⁴Ziate hi Sinai tâng ah Israelte â ding ah LALPA‘n Mosi kiang ah a thupiakte chu ahi.