Read Vaiphei THIAMPUTE LEKHABU 3 Bible Online

THIAMPUTE LEKHABU 3 - Vaiphei bible

THIAMPUTE LEKHABU 3

¹Kua’n le kichamna thillat a hem la bawlna ding ah bawng hon lak ah kipat pakhat la hun piak ding chun, a nu hi’n, a chal hitaleh, LALPA ma ah demna bei hi hen.

²La thillat ding luchung in la khut nga’n la tin, kikhopna biakbûk kotbul ah chun that inla; chuleh, Aron chapa thiampute chun gancha thisan chu mâichâm a the’ kîmvêl ding uh ahi.

³Chuleh, kichamna thillat chu LALPA kiang ah mei ah la lat ding ahi; a sungthau tawh, a sung ah thau bek zosia chu tawh,

⁴a kãlte ni tawh, a kãl chung ah a thau um zosia tawh, a phûkthau zosia tawh, a thin chung ah a thau um zosia chule la lakdaw ding ahi.

⁵Chuleh, Aron chapa thiampute chun, ziate chu mâichâm chung ah hâlmang thillat dingte pum in, mei chung ah thing kisia khawm chung ah chun LALPA â ding ah gimtui, mei ah thillat hiding in a hâl tum ding uh ahi.

⁶Kichamna ding ah LALPA kiang ah la thillat ding chu belam hon lak ah kipat a hiding chun, a nu’ hi’n a chal hileh, demna bei hi hen.

⁷Belam lân ding la hi chun, LALPA kiang in hun kai inla;

⁸la thillat luchung ah la khut ngat in. Zia chu kikhopna biakbûk paw lam ah la thâlup ding ahi; tichun, Aron chapa thiampute chun a thisan chu mâichâm a the’ kîmvêl ding uh ahi.

⁹Chutia, kichamna thillat LALPA kiang ah mei ah lat ding la hun piak phat leh, a thau zosia, a sungthau hileh, a meibul thau hileh, a gil ah thau um zosia tawh, a sung ah thau um zosia, a bawn in LALPA kiang ah kithoina dingin la hun piak ding ahi;

¹⁰a kãlte ni tawh, a chung ah thau um zosia tawh, a phûkthau zosia chule la khawdaw ah, la pansak ding ahi.

¹¹Chuleh, thiampu’n zia chu mâichâm chung ah hâltum intin; zia chu LALPA kiang ah mei ah an thillat chu hi’n a.

¹²La thillat ding chu kêlcha a hiding chun, LALPA âng ah hun kai in;

¹³a luchung ah la khut nga’n la, kikhopna biakbûk mai ah chun la thâlup ding ahi; Aron cha thiampute’n a thisan chu mâichâm a the’kîmvêl ding uh ahi.

¹⁴Chutia, LALPA kiang ah mei ah thillat ding ah la piak ding chu: A sung thau zosia, a gil tuam ah thau zosia tawh,

¹⁵a kãlte ni ah a thau bek zosia pum ah, a thin tawh, a kãlte ni le la khaw thâk ding ahi.

¹⁶Ziate chu thiampu’n mâichâm ah chun mei ah gimtui an thillat hiding in hâltum ta’n a. Athau zosia chu LALPA chantum ahi.

¹⁷Zia hi khoi gam ah chêngleu chinle, la khang tin ua la bawl zing ding ua dan kisiam chu ahi: Sathau a hem, sa thisan a hem la nêk him him lo ding uh ahi, a tia.