Read Vaiphei THIAMPUTE LEKHABU 4 Bible Online

THIAMPUTE LEKHABU 4 - Vaiphei bible

THIAMPUTE LEKHABU 4

¹Mosi kiang in LALPA chun:

²Israelte kiang ah: LALPA‘n bawl lo ding ah thu a piakte, chanpal ah la bawl khâk hiziang ta hen la;

³chuleh, sathaunu’ ah um thiampu’n mipi thiamlo channa ding ah thil a bawlkhial khâk pal chun, a thil bawlkhial thoina dingin LALPA kiang ah bawngchal tuai, demna bei, lân hen.

⁴Bawngchal chu kikhopna biakbûk kotbul ah LALPA ma ah hun kai hen la, a luchung ah a khut ngat in, that hen.

⁵Sathaunu’ ah um thiampu’n, bawngchal thisan bang jat a hem hun la’n, kikhopna biakbûk sung ah hun chawi lut intin;

⁶thiampu’n gan thisan lak ah a khut dia in, them khat chu LALPA ma-âng ah, mun thiangtho puanjak bul ah sagivei a the’ ding ahi.

⁷Thiampu’n LALPA ma ah kikhopna biakbûk sung ah gimtui hâlna mâichâm ningbawkte chun gan thisan bang jat a hem tât intin; chuleh, bawngchal thisan dang zosia chu kikhopna biakbûk kotbul ah hâlmang kithoina mâichâm bul in sungtha ta’n a.

⁸Gitlo thoina bawngchal thau zosia tawh a sung thau leh a gil ah thau um zosia ladok intin,

⁹a kãl panite leh a phûk ah thau um leh a thintuam ah umte leh a kãlte ni nasan le a lâkdaw ding ahi;

¹⁰kichamna ding ah kithoina bawngchal ah kipat lâkdaw ahi gual ah khan a bawl ding ahi. Thiampu’n hâlmang kithoina mâichâm chung in hâltum in a.

¹¹Chuleh, bawng vun, a sa zosia, a luchang, a keng, a sung sa leh a êkte,

¹²a taksa pumpi natiang in, giamun pawlam ah mun thiangtho ah vut paikhawmna mun ah pawdok intin, thingkhua chung ah chun hâl tum in, vut paikhawmna mun ah chun hâltum ta’n a.

¹³Chun, Israelte’n a bawlkhial khâk pal ua, mipi’n a het lo uh ahi ah; LALPA‘n bawl lo ding a tite lak ah bang pen a hem khat hitaleh, thiamlo chang a hi tho tho tau a;

¹⁴a thilbawlkhial uh hetdaw a hung hi’phat leh, mipite’n gitlo thupha choina dingin bawngchal tuai khat a lat ding uh ahi; kikhopna biakbûk kotbul ah hun kai uh hen.

¹⁵Mipi lak ah upate’n bawng luchung ah a khut uh nga’n tiu in, bawngchal chu LALPA âng in a that ding uh ahi.

¹⁶Thiampu ding ah thau nu’ ah umpa chun, bawng thisan bang jat a hem kikhopna biakbûk ah hun chawi intin;

¹⁷bawng thisan lak ah a khut dia intin, puanjak bul ah LALPA ma ah sagivei a the’ ding ahi.

¹⁸Gan thisan chu kikhopna biakbûk ah, LALPA ma ah mâichâm ningbawkte ah a tât ding ahi; a dang cheng chu kikhopna biakbûk kotbul ah hâlmang thillat mâichâm bul ah chun sunthâk hita’n a.

¹⁹A thau zosia ladok in, mâichâm ah hâltum ta’n a.

²⁰Gitlo thupha choina bawngchal gual ma khan zia hile a bawl ding ahi: chutichun, thiampu’n kichamna bawl piak intin, ngaidam hi’thei ta’n au.

²¹Bawngchal chu giamun paw lam ah pawdok in, bawngchal masa gual ma khan a hâltum ding ahi; zia chu mipite â ding ah gitlo thoina ahi.

²²Vaihawmpa chun LALPA a Pathian in bawl lo ding ah thu a piakte lak ah khoipen a hem chanpal ah a bawl khâk ziak ah thiamlo a chan chun,

²³a thil bawlkhial a hetdaw phat leh, a bawlkhial thoidamna ding in kêlchal khat, demna bei hun kai intin;

²⁴kêlchal luchung in a khut nga’n tin, LALPA ma ah hâlmang thillat kithâna mun in a that ding ahi: zia chule gitlo thoina ahi.

²⁵Thiampu’n gitlo thoina thisan neukhat a khutzung ah la’n, hâlmang thillat mâichâm ningbawkte nû intin, a dang cheng chu hâlmang thillatna mâichâm bul ah sungtha ta’n a.

²⁶A thau zosia kichamna thillat kithoina sathau a hâltum gual in mâichâm ah hâltum ta’n tin: Tichun, a gitlona chung thu ah thiampu’n tatna bawl piak intin, ngaidam hita’n a.

²⁷Mipi vantang lak ah kua a hem khat in, LALPA‘n bawl lo ding ah thu a piakte lak ah bang pen a hem a bawlkhial khâk ziak ah thiamlo chang ahi chun,

²⁸a gitlona a hung kihiatdaw tak leh, a bawlkhial ngaidamna ding ah a thillat dingin, kêlpi khat demna bei, a hun kai ding ahi.

²⁹Gitlo thoina ding gan luchung ah a khut nga’n tin, hâlmang thillatna mun ah gitlo thupha choina dingin a that ding ahi.

³⁰Thiampu’n thisan neukhat a khutzung ah la’n, hâlmang thillatna mâichâm ningbawkte ah tât intin, thisan dang cheng chu mâichâm bul in sungtha ta’n a.

³¹A thau zosia kichamna thillat gancha thau a lakdaw gual ah khan ladok intin; chuleh, thiampu’n LALPA â ding ah gimtui dingin mâichâm ah hâltum ta’n a. Tichun, thiampu’n tatna bawl piak intin, ngaidam hita’n a.

³²Gitlo thoina thillat ding ah belam a hun kai ding chun, a nu’ khat demna bei hi hen.

³³Kithoina ding gan luchung in a khut nga’n tin, hâlmang thillat kithâna mun ah gitlo thoina dingin a thâlup ding ahi.

³⁴Thiampu’n gitlo thoina gan thisan chu a khutzung ah neukhat la’n tin, hâlmang thillatna mâichâm ningbawkte ah tât intin, a thisan dang cheng chu mâichâm bul in sungtha ta’n a.

³⁵A thau zosia, kichamna thillat ding ah belamno thau la lakdaw gual in ladok in la tin; thiampu’n LALPA â ding ah mei ah thillat gual in mâichâm ah hâltum ta’n a. Tichun, thiampu’n a thil bawlkhialte chung thu ah kitatna bawl piak intin, ngaidam hita’n a.