Read Vaiphei THIAMPUTE LEKHABU 5 Bible Online

THIAMPUTE LEKHABU 5 - Vaiphei bible

THIAMPUTE LEKHABU 5

¹Vaihawmna mai ah thu dot ding ah ko la hi ah, la thil mu a hem, la thil hiatsa a hem le ahi gual tak ah la gen nop lo chun, a mawpaw ding la hi.

²Chuleh, kuale thil buak him him, gamsa thiang lo saluang a hem, gan thiang lo luang a hem, a bok ah vâk ganhing thiang lo luang a hem, chanpal ah la suk khak chun, la kisubuak ta’n, thiamlo chang ding la hi.

³Ahiloleh, mi a buak pêt a hem, mi buak a hitheina ding ah kisubuak kha a hem, chanpal ah la sukkhak chun, la hun hetdaw phat leh, thiamlo chang hi’ngâl ding la hi.

⁴Chuleh, kua hileh thilpha leh phalo hilehle tup nei ah kipau tiamna a nei chun, kipau tiamna kam a thâdaw lam he’pha talo maleh, a hung hetdaw phat leh thiamlo chang sa ahi ngâl hi.

⁵Zia gual ah thiamlo a channa chu a hung kihiatdaw phat leh, a thil bawlkhial chu kipuanna a bawl ding ahi.

⁶A thil bawlkhialna ziak ah kithoina ding ah lat dingin: gan hon lak ah belampi a hem, kelpi a hem khat LALPA kiang ah lat dingin a hun kai ding ahi; tichun, thiampu’n a gitlona chung thu ah kitatna hun bawl piak in a.

⁷Belam la nei zaw lo chun, LALPA kiang ah gitlo thoina ding ah a thillat dingin vakhu pani a hem, vapâl pani a hem a hun ken ding ahi; pakhat zaw chu gitlo thoina ding hi’ntin; a khat zaw chu hâlmang thillat ding hi’n a.

⁸Thiampu kiang ah hun chawi intin, ama’n gitlo thupha choina a bawl zaw phat leh a gawl tanthatheng lo in hêk tan intin;

⁹gitlo thoina thisan neukhat mâichâm pang ah the’ intin; chun, a thisan dang cheng chu mâichâm bul in a vat kangsak ding ahi: zia chu gitlo thoina thillat ahi.

¹⁰Chun, a pakhat zaw chu a dan dungzui in hâlmang thillat dingin pia ta’n a. Tichun, thiampu’n a thil hi’khialna ziak ah kitatna hun bawl piak intin, ngaidam hita’n la.

¹¹Ahi’n la, vakhu pani a hem, vapâl pani a hem a nei zaw lo chun, a gitlo thoina dingin chângbuang nêl dim diam, ephah te’na mun sawm ah khen mun khat hun chawi in, sathau la buak khum lo ding, begaw le a sunkhum lo ding ahi, gitlo thoina thillat ahiziak in.

¹²Thiampu kiang ah hun chawi intin, ama’n hetzingna dingin a khut dim khat hamdok intin, mâichâm chung ah LALPA â ding ah mei ah thillat hi dingin hâltum in ah: zia chu gitlo thoina ahi.

¹³Chutichun, thiampu’n bang pen hiziang leh le a gitlona chung thu ah kitatna bawl piak intin, ngaidam hita’n a. An thillat gual ah khan, a dang cheng chu thiampu chan ding ahi tai, ti’n gen in, a tia.

¹⁴Mosi kiang ah LALPA chun:

¹⁵La lak ua kua a hem khat in LALPA thilzek thiangtho a hi’buak khâk chun, a thil hi’buakna kithoina dingin LALPA kiang ah belam a chal pakhat demna bei, gan hon lak ah kipat in pakhat a hun piak ding ahi: zia chu a man dingle hisap thei tho intin, mun thiangtho shekel tawh kituk dangka le a pethei hi; zia chu gitlo thoina thillat ahi.

¹⁶Chun, thil thiangtho chung ah a thil hi’khialsate hidik kitna dingin, a mun nga ah khen, a mun khat thiampu kiang in a piak ding ahi; chun, thiampu’n belamchal in a thil hi’khial thoina hun bawl piak intin, ngaidam hita’n a.

¹⁷LALPA‘n bawl lo ding ah thu a piakte lak ah khat ziang le la hi’khial pal ahi chun, helo lechinle, thiamlo la chang ta tho tho ah, la kituplona maw la paw ding ahi.

¹⁸Belam hon lak ah a chal khat demna bei, kilawm lasak hun tawk, hi’khial thoina dingin thiampu kiang in hun kai in; tichun, thiampu’n la het lo kâl ah la hi’khelna thu in ngaidam hun dot piak intin, ngaidam hita’n la.

¹⁹Zia chu hi’khial thoina ahi: LALPA ma ah thiamlo chang la hita ngâl ah, ti’n a gen a.