Read Vaiphei THIAMPUTE LEKHABU 6 Bible Online

THIAMPUTE LEKHABU 6 - Vaiphei bible

THIAMPUTE LEKHABU 6

¹Mosi kiang in LALPA chun:

²Kuale sumkol thu a hem, lêpguk thu a hem, gûkchâk thu a hem in a Invêngte zuau ah bawl in, LALPA chung ah thil bawl khial taleh;

³ahiloleh, van mang mu in kilep hen la, zuau thu in kitiam taleh, zia gual thil a bawl zosia ah hin a bawl khial ngâl ahi:

⁴a thil bawl khial chu a hung kihiatdaw ah, kisik ah, sukdik a nop chun, la van lâkpiak a hem, a kikoigûk a hem, a kiang ah vopsak ah umte, van mang a mute;

⁵ahiloleh, thil dang zuau thu ah a la kitepnate le a dit kit ding a hi: a kim kei ah a dit kit bân ah, a mun nga ah khen a mun khat a belap ding ahi. A bawlkhialna a hung kihiatdaw ni ma ma in a neipa kiang in a pethuk ngâl ding ahi.

⁶A thil bawlkhial thoina dingin LALPA âng ah belamchal khat demna bei, belam hon lak ah kipat kiphutawk a sak, thiampu kiang in bawl khial ngaidamna ding ah kithoina dingin a hun piak ding ahi.

⁷Thiampu’n LALPA ma ah a bawlkhialna ziakin kichamna hun bawl piak intin; chutichun, a bawlkhialna zosia ah kipat chun ngaidam hita’n a, a tia.

⁸Mosi kiang ah LALPA chun:

⁹Aron tawh a chapate kiang ah zia gual hin la hil ding ahi, ti’n a gen a: Zia hi hâlmang thillat la bawl ding dan uh chu ahi: Hâlmang thillat chu mâichâm chung ah jan khawvak ah a jingkal kit tiang in a um ding ahi, mâichâm ah mei chule sêmkuang zing ding ahi.

¹⁰Thiampu chu a puan malngat ah kithuam in, a taksa khû’na ding in a puan malngat chual chu chêng intin; chun, mâichâm ah hâlmang thillat mei in a hâlvâmte chu luakdok intin, mâichâm pang ah chun koi hen.

¹¹Chuleh, a kithuamna sût intin, kithuamna dang ah kivan in, vutte chu giamun pawlam ah mun thiangtho ah chun a vasunthâk ding ahi.

¹²Mâichâm chung ah mei sêmkuang zing hi’ntin, mitsak lo ding ahi. Thiampu’n jingkal si’n in thingkhua tua intin, hâlmang thillat a koi ding dan tak ah koi in, zia tak ah chun kichamna thillat sathaute chu a hâl zing ding ahi.

¹³Mâichâm ah mei a kua’n zing ding ahi’n, a mit ngai lo ding ahi.

¹⁴Zia hi an lat ding dan chu ahi: Aron chate’n mâichâm bul ah LALPA ma ah a lân ding uh ahi.

¹⁵Changbuang lat ding ah um sathau tawh kihel, begaw kibuak khum ah kipat in, a leng ah thasâng in a khut dim khat hamdok intin, zia chu LALPA â ding ah gimtui a hitheina dingin, mâichâm ah chun a hâltum ding ahi.

¹⁶A dang cheng chu Aron tawh a chate’n a nêk ding uh ahi; zia chu mun thiangtho ah thawipanglo in a ne ngâl ding uh ahi; kikhopna biakbûk huang sung ma ma in a nêk ding uh ahi.

¹⁷Thawi saw lo ding ahi. Kei â ding ah mei ah kilân lak ah amau chantum ding ah ka piak ahi; zia chu gitlo thoina leh hi’khial thoina gual tho in, a thiangtho pen chu ahi ngâl a.

¹⁸Aron Inkuan lak ah pawsalte bep in ne’n tiu in, LALPA â ding ah mei ah kilân lak ah kipat la suanteu tiang ah la kumkhua dan ding uh hi’ntin; Aron suante lak ah pawsal cheng in a nêk ding uh ahi; bang hitaleh zia sukha taphot chu hi’thiantho hi’ngâl ding ahi, ti’n a gen a.

¹⁹Mosi kiang ah LALPA chun:

²⁰“Aron tawh a chate’n sathaunu’ a hiu ah kipat LALPA kiang ah a thillat ding uh chu zia gual hi ahi ti’n a gen ah: Chângbuang nêl pha tak ephah te’na se’sawm ah sua se’khat, jingkal si’n leh a kimkhat, nitâk si’n leh a kimkhat ma a lat zing ding uh ahi.

²¹Bêldal in sathau tawh dia hi’ntin; a kidia zaw phat leh hun la lut in, thâiga ah kibawl changbuang thillat LALPA â ding ah gimtui hi dingin a lân ding ahi.

²²Aron chate lak ah ama thasâng ding ah sathaunu’ ah um pen pen in zia gual chun a bawl zing ding ahi: Zia chu kumkhua LALPA chantum, mei ah hâltum zing ding chu ahi ngâl a.

²³Thiampu’n thâi thil a lat him him chu hâltum ah, nêk lo ding ahi”.

²⁴Mosi kiang in LALPA chun:

²⁵Aron tawh a chate kiang in: Zia hi gitlo thoina la bawl ding dan chu ahi ti’n gen in: Hâlmang thillatna mun ah chun gitlo thoina ding gancha chu LALPA ma ah la tha ding uh ahi; zia chu a thiangtho pen ahi.

²⁶Gitlo thoina thil lân thiampu chun zia chu a ne ding ahi; kikhopna biakbûk huang sung ah, mun thiangtho sung ma ma ah chun a nêk zaw ding ahi.

²⁷Kuale zia sa khoikha taphot chu thiangtho intin; chun, a thisan in a thekhâk puan taphot chule, mun thiangtho ah la sawp ding uh ahi.

²⁸A sahuanna lei bêl chu khetgawp ding ahi; ahi’n, sum bêl ah huan ahi chun, a bêl chu nawt thian ah, tui ah sawp thian ding ahi.

²⁹Thiampu pawsal zosia’n zia chu a nêk ding uh ahi: Zia chu thil thiangtho pen ahi.

³⁰Himaleh, gitlo thoina thisan kikhopna biakbûk mun thiangtho ah kitatna ding ah kilân taphot chu nêk lo ding, mei ah hâltum sik sek ding ahi.