Read Vaiphei THIAMPUTE LEKHABU 7 Bible Online

THIAMPUTE LEKHABU 7 - Vaiphei bible

THIAMPUTE LEKHABU 7

¹Zia hi bawlkhial kithoina ding ah dan chu ahi:

²Hâlmang thil latna mun ah chun bawlkhial kithoina ding gancha chule thâ ding ahi; a thisan chu mâichâm kîmvêl ah a the’ ding ahi.

³A thau zosia lân intin, a meibul thaute, a sung thaute,

⁴a kãlte ni tawh a phûkthau zosia tawh, a thin ah a lap leh a kãltele lâkdaw ding ahi.

⁵Thiampu’n LALPA â ding ah mei ah thillat dingin mâichâm chung in hâltum intin; zia chu bawlkhial thoina chu ahi.

⁶Thiampute lak ah pawsal cheng in mun thiangtho ah a nêk ding uh ahi: zia chu a zek thiangtho pen ahi ngâl a.

⁷Bawlkhial thoina chule gitlo thoina gual ma hi’ntin, bawldan kibang a zui ding uh ahi: Zia kitatna bawl thiampu chun a sa chu chang in a.

⁸Zia gual ma chun, hâlmang thillat lak ah pang thiampu chun, lat ah um gancha vun chu a leng in a chan ding ahi.

⁹Chuleh, thuk chung ah thâilat kikang zosia, khângbel ah kikang zosia leh kuangdal ah kikang zosia chu, a lân ah pang thiampu chan ding ahi.

¹⁰Himaleh, thâi chângbuang thillat zosia sathau tawh kihel leh hel lo ah kibawl zosia chu, Aron leh a chate zosia kibang chiat in a kihawm ding uh ahi.

¹¹Zia hi kua’nle, LALPA kiang ah kichamnna thillat la bawl ding dan uh chu ahi:

¹²Kipak thugenna ding ah la lat ahi chun, kipak thugenna dingin sathau tawh hel, thawipanglo vaithum pâ dik dek, sathau tawh mêk helsa, chângbuang nêl dim diam tawh latkhawm ding ahi.

¹³Vaithum haw ban ah, kipak thugenna ding ah kichamna thillat kithoina ah chun thawi pang vaithum le la hun lân khawm ding ahi.

¹⁴Zia la thillat zosia ah chun LALPA â dingin pei thillat â dingin khat chiat lat ding ahi; zia chu kichamna thillat thisan the’ ah pang thiampu chan ding ahi.

¹⁵Chun, kipak thugenna kichamna ding ah la kithoina sa chu la lat ni ma ma’ ah la nêk zaw ngâl ding ahi; jingkal kit tiang in a themcha le la khêk lo ding ahi.

¹⁶Himaleh, la thillat chu thutiamna a hem, kiphalna thu ah mei ah thillat ahi chun, la lat ni chun ne’n la tin, la nêkbang chu a jing leh le la nethei hi;

¹⁷himaleh, la thillat sa a ni thum ni tiang ah um nalai cheng chu mei ah hâltum mai ding ahi;

¹⁸kichamna thillat sa a ni thum ni tiang ah la nêk ua leh, pawm piak hita pua’n tin; a lânpa le kithawi ah sim thei hita pua’n ah: Thil ki’dak um tak ahi’n, kuale a ne taphot chu thiamlo chang in au.

¹⁹Thil thianglo sukha him him a sa nêk lo ding ahi; mei ah hâltum ziang ding ahi: Sa thiang chu a thiang zosia’n nethei in au.

²⁰Himaleh, kichamna thillat LALPA chantum thianglo pum ah ne chu, zia mi chu a chipite lak ah kipat paithâk ding ahi.

²¹Chun, kua’nle thil thianglo a hem, mi thianglo a hem, gan thianglo a hem, thilki’dak um a hem a sukkhak pal ah, kichamna thillatsa LALPA chantum a nêk khâk leh, zia mihing chu a chipite lak ah kipat paithâk ding ahi, ti Aron leh a chapate hil in, ti’n a gen a.

²²Mosi kiang in LALPA chun:

²³Israelte kiang ah: Bawng a hem, belam a hem, kêl a hem thau him him la nêk lo ding uh ahi.

²⁴Sapûl thi leh sapêlup thaute chu thil dang bang a hem dingin mat thei hi’ntin; ahi’n, la nêk him him lo ding uh ahi.

²⁵Kuale LALPA â ding ah mei ah thillat ding ah kipia gancha thau ne taphot chu, zia mihing chu a chipite lak ah kipat paithâk ding a hi.

²⁶La chênnau mun taphot ah vacha hihen la, gancha hileh a thisan la nêk lo ding uh ahi.

²⁷Kuale thisan ne taphot chu a chipite lak ah kipat paithâk ding ahi, ti’n gen in, a tia.

²⁸LALPA‘n Mosi kiang in:

²⁹Israelte kiang in: LALPA kiang ah kichamna thillat bawl nuam taphot in, LALPA â ding ah kichamna thillat kithoina dingin ama ngei in a hun lâk ding ahi.

³⁰LALPA kiang ah mei ah thillat ding chu nangma khut ngei in hun chawi in la tin; a thau tawh, a awm tawh hun lân la tin, a awm chu LALPA ma ah pei thillat ding ah pei a hi’theina dingin,

³¹thiampu’n a thau chu mâichâm ah hâltum intin: A awm chu Aron tawh a chate chan ding ahi.

³²Chun, kichamna thillat kithoina sa changlam liang chu thiampu la piak ding ahi;

³³Aron chate lak ah kichamna thillat thisan leh sathau lânpa chu a changlam liang la piak ding ahi.

³⁴A awm leh a liang pei ah um sek pen chu Israelte kichamna thillat kithoina lak ah kipat Aron leh a chate ka piak chuam ahi, ti gen in, a tia.

³⁵Zia hi LALPA â ding ah thiampu nasêm ding Aron leh a chate sathau nu’ a hiu ah kipat, LALPA â ding mei ah thillat kilânte lak ah kipat a chantum ding uh chu ahi;

³⁶sathaunu’ ahi niu ah kipat Israelte’n a piak ding ua LALPA‘n thu a piak, zia chu kumtuang ah a suanteu tiang in a bawl ding uh ahi.

³⁷Zia hi hâlmang thillat, thâi thillat, gitlo thoina, bawlkhial thoina, hithianthona dan, kichamna thillat dan;

³⁸Sinai gamthip ah, Israelte’n LALPA kiang ah thil a lat ding dan uh thu a piak ni, Sinai tâng ah LALPA‘n Mosi thu a piak kha ahi, a tia.