Read Vaiphei THIAMPUTE LEKHABU 8 Bible Online

THIAMPUTE LEKHABU 8 - Vaiphei bible

THIAMPUTE LEKHABU 8

¹Mosi kiang in LALPA chun:

²“Aron tawh a chapate pui inla, a kithuamna ding, sathaunu’ ding leh a gitlo thoina ding uh bawngchal khat, belamchal pani tawh, vaithum thawipanglo law dim khat tawh keng unla,

³mi zosia chu kikhopna biakbûk tual ah ko khawm in,” a tia.

⁴Mosi chun LALPA thupiak gual in a bawl ah. Mi zosia chu kikhopna biakbûk kotpi tual ah a hung khawm phat un,

⁵Mosi’n mipite kiang in, “LALPA‘n bawl ding ah thu ei piak chu zia hi ahi,” a tia.

⁶Mosi chun Aron leh a chapate chu mipi ma lam in a puidok ah, tui in a sil ta’n.

⁷Puanâk âksak in, a kawng uh a gâk piak ah, puanâk chual a âksak ah, a chung in thiampu puanâk a âk sak ah, thiampu puanâk gâkna pha tak ah kigat in a gâk ah, kawnggâk in a gâk det tai.

⁸Awmphaw ah chun a van ah, awmphaw chun Urim tawh Thumim a koi a.

⁹LALPA‘n Mosi kiang ah thu a piak gual ngei ah khan, dial a kopsak ah, dialkop ma lam pang ah chun sana’ kijem lukhuk thiangtho in a thuam tai.

¹⁰Chuleh, Mosi’n sathau nu’ ding a hun ladok ah, biakbûk leh a sung ah thil um zosiate nu’ in, a thiansua tai.

¹¹Mâichâm chu sagivei a the’khum ah, mâichâm leh a matchâk kuang leh a kengte chu hithiangtho dingin sathau chu a nu’ a.

¹²Hithiantho a hitheina dingin Aron luchung ah sathau buak khum in, a nu’ a.

¹³Mosi chun Aron chate a hun puidok ah, LALPA‘n Mosi thu a piak gual ngei in, puanâk a âksak ah, a kawng uh gâk piak chiat in, dial a kopsak tai.

¹⁴Chuleh, gitlo thoina dingin bawngchal a hun kai ah, Aron tawh a chapate gitlo thoina ding bawngchal luchung in a khut a ngau a;

¹⁵tichun, a that ah. Mosi’n a thisan chu a khutzung in a la’n, mâichâm ningbawkte chu a nu’ kîmvêl ah; mâichâm a hi’thiangtho tai: mâichâm bul ah chun a thisan chu a buntha’n. Chutichun, hi’thianthona leh kichamna a bawl tai.

¹⁶Mosi’n bawngchal sungthau zosia, a thin chung ah a thaute, a kãl teni leh a thin tawh a ladok ah, mâichâm chung in a hâltum tai.

¹⁷LALPA‘n Mosi kiang ah thu a piak gual ngei in, bawngchal sa chu a vun tawh, a êk tawh giamun pawlam in a hâltum tai.

¹⁸Chun, hâlmang thillat dingin belamchal a hun kai ah. Aron tawh a chapate’n belam luchung in a khut uh a ngau a,

¹⁹belam chu a that ah. Mosi’n a thisan chu mâichâm a the’khum kîmvêl hi.

²⁰Belam chu a sem ah, a luchang leh a sabâkte chu tawh a sungthau chu a hâltum a.

²¹Ziazaw chun, a sung tawh a kengte chu tui in a sawp thiang a; zia chu LALPA‘n Mosi kiang ah thu a piak dungzui ah, LALPA â ding ah gimtui a hitheina ding ah mei ah hâlmang thillat chu ahi.

²²Chun, belamchal dang khat, namdetna belamchal chu a hun la kit a: Aron tawh a chapate’n belamchal luchung in a khut uh a ngau a;

²³Mosi’n a that a. A thisan a la, Aron changlam bil mong tawh, a changlam khutpi tawh a changlam kengpi chu a nu’piak a.

²⁴Mosi’n Aron chate a hun pui a; gan thisan chu a changlam bil mong tawh, a changlam kengpiu a nu’piak ah: chun, a dang cheng chu mâichâm a the’khum a.

²⁵A thaute, a meibul thaute, a sung thau, a thin tuam leh a kãlte ni tawh a thau leh a changlam liang chu a la:

²⁶LALPA ma ah thawipanglo vaithum bawm ah kipat vaithum pei khat tawh vaithum pei pâ dik dek khat a la, sathau chung leh a changlam liang chung in a koi a;

²⁷ziate chu a leng in Aron khutpêk chung leh a chapate khutpêk chung in a koi chiat ah; LALPA ma ah pei thillat dingin a pei tai.

²⁸Chuleh, Mosi’n a khut ua kipat lâkpiak kit in, mâichâm ah chun hâlmang thillat dingin a hâltum tai. Zia chu namdetna ding ah thillat gimtui, LALPA â ding ah mei ah kipia chu ahi.

²⁹Chun, LALPA‘n Mosi kiang a thu a piak gual in, Mosi’n a awm sa a la, LALPA ma ah pei thillat dingin a pei ah; zia chu namdetna belam sa lak ah Mosi chantum ding chu ahi.

³⁰Chun, Mosi’n sathau nu’ ding leh mâichâm ah kipat thisan chu neukhat gêl a la’, Aron tawh a kithuamna a the’khum ah, a chapate leh a kithuamnau le a the’khum a: tichun, Aron tawh a kithuamna tawh, a chapate leh a kithuamnau haw hi’thianthona a bawl a.

³¹Chuleh, Mosi chun Aron leh a chapate kiang in: “Aron leh a chapate’n a nêk ding uh ahi,” ti thupiak ah ka um dungzui in, kikhopna puanbûk kotbul ah sa chu huan unla, zia mun ma ma ah chun namdetna thillat vaithum chu tawh me in la nêk ding uh ahi;

³²sa tawh vaithum la nêkbang uh chu mei in hâltum un.

³³La ze’thian hun uh a bei masia kikhopna biakbûk kotpi pawtsan lo in, ni sagi la um ding uh ahi. Namdet la hi’na ding hun uh chun ni sagi dai ding ahi ngâl a,

³⁴tu’ni bawl ahi gual in, nang uh kitatna bawl dingin LALPA‘n thu a pia ta ngâl a.

³⁵La thi’lona ding un, kikhopna biakbûk kotpi bul ah sun sagi leh jan sagi la um ding uh ahi. LALPA thupiak la zui tei tei ding uh ahi; zia gual ah bawl ding ah chu thupiak ka hi’ngâl a, a tia.

³⁶LALPA chun Mosi mang ah thu a piak gual ngei in Aron tawh a chate’n zia zosia chu a bawl tau a.