Read Vaiphei THIAMPUTE LEKHABU 9 Bible Online

THIAMPUTE LEKHABU 9 - Vaiphei bible

THIAMPUTE LEKHABU 9

¹Chun, a ni giat tin ni chun Mosi’n Aron tawh a chapate tawh Israel upate a ko khawm a,

²Aron kiang in: “Gitlo thoina thillat dingin bawngno a chal khat tawh, belamchal khat demna bei, hâlmang thillat dingin LALPA ma ah hun lân in,” a tia.

³Chuleh, Israelte kiang ah chun: “Gitlo thoina dingin kêlno khat hun la un; hâlmang thillat dingin bawngno khat tawh belamno khat, kum khat ah upa leh demna bei gêl hun la un;

⁴chuleh, bawngchal khat tawh belamchal khat, kichamna ding ah LALPA ma ah lat dingin hun kai un; chun, sathau tawh helsa changbuang thillat ding tawh hun la un. Tu’ni hin la kiang un LALPA hung kilang ding ahi ngâl a, ti’n hil in,” a tia.

⁵Mosi gen gual in kikhopna biakbûk mai ah chun a hun kai tau a; mipi zosia le hung khawm in LALPA âng in a ding tau a.

⁶Mosi chun, “LALPA lopina la kiang ua a hung kilat theina ding ah, LALPA‘n la bawl ding ua thu a hun piak chu zia hi ahi,” a tia.

⁷Mosi’n Aron kiang in, “LALPA thupiak dungzui in, mâichâm nai inla, la gitlo thoina leh la hâlmang thillat lân inla, chuleh, nang â ding leh mipite sik in tatna bawl in; chutileh, mipite thillat lat piak inla, kitatna bawl piak in,” a tia.

⁸Chun, Aron in mâichâm a zuan ah, ama gitlo thoina dingin bawngno chu a that a.

⁹Chuleh, Aron chate’n a thisan chu a kiang in a hun chawi ua; ama’n zia thisan lak ah chun a khutzung a dia ah, thisan chu mâichâm ningbawkte chun a tât ah; chun, mâichâm bul ah chun a dang cheng chu a buntha tai.

¹⁰LALPA‘n Mosi thu a la piak dungzui in, gitlo thoina sathaute, a kãlte, a thin tuam a lapte chu mâichâm ah chun a hâltum tai.

¹¹A sa leh a vun chu giamun paw lam in a hâltum tai.

¹²Chun, hâlmang thillat pen chu a that ah: Aron chate’n a thisan chu a hun piau ah, ama’n zia chu mâichâm a the’ kîmvêl a.

¹³Hâlmang thillat sabâkte chu a luchang tawh a hun piau ah, ama’n ziate chu mâichâm chung in a hâltum tai.

¹⁴A sung sa leh a kengte chu a sawp thiang ah, mâichâm ah hâlmang thillatte chu tawh a hâltum khawm tai.

¹⁵Ziazaw chun, mipite thillat chu ama’n a lân tai. Mipite gitlo thoina kêlcha chu a la’, a that ah, a masa gual tho ah khan gitlo thoina thillat in a bawl tai.

¹⁶Chuleh, hâlmang thillat a lân ah, kithoina dan dungzui tak in a bawl hi.

¹⁷Changbuang thillat chule a la’, zia lak ah chun a khut dim khat a hamdok ah, jingkal hâlmang thillat chu tawh mâichâm ah chun a hâltum khawm tai.

¹⁸Mipite â ding ah chamna thillat bawngchal tawh belamchal chule a that ah. Aron chate’n a thisan chu a hun piau ah, ama’n zia chu mâichâm a the’ kîmvêl a,

¹⁹bawngchal thau leh belamchal thaute, a meibul thaute, a sung thaute, a kãlte ni, a tuam thau zosia, a thin tawh a tuam ah thau zosia chule a hun piau a.

²⁰A thau chu a awm chung ah koi in, a thau haw chule mâichâm chung ah chun a hâltum khawm a;

²¹Mosi’n thu a piak gual in, a awm tawh a liang changlam chu Aron in LALPA ma a pei thillat dingin a pei tai.

²²Aron in mipite lam nga’n a khut a jak ah, a maljawl ah; chuleh, gitlo thoina leh hâlmang thillat tawh kichamna thil latte a lat zaw phatin a hung kum suk a.

²³Mosi tawh Aron chu mipi kikhopna biakbûk sung ah chun a lut ua; chun, LALPA lopina mi zosia lak in a hung kilang tai.

²⁴LALPA ma ah kipat in meikuang a hung pawtdok ah, mâichâm chung ah hâlmang thillat leh sathaute chu a hun kângtum ta’n; zia chu mipi zosia’n a mu un a kiko ua, a mai ua leisi’n, a khupbok khep khup ziang tau hi.