Read Vaiphei JEREMIAH 10 Bible Online

JEREMIAH 10 - Vaiphei bible

JEREMIAH 10

¹Aw Israelte haw, la kiang ua LALPA thu hun gen hi a la ngai tiam un:

²LALPA‘n zia gual hin a gen hi: Nam dangte umchan chu zil kiu inla, van lam ah teptênate ziak inle lungjing kiu in; zia chu nam dangte’n a lungjin piu hi.

³Midangte chawndan haw chu a dik pua’n, gammâng ah thing a phûk un, mi khutthiam in a heicha’n a sui a;

⁴mipite’n dangka leh sana’n a jem un, a toilaw theilona ding in, thikkil in a kilden tau hi.

⁵A milimteu chu changmai lei ah, va-ak honna ding milim kisiam gual ahi’n, a pau thei puau a; chia chawn theilo a hiziak un, puak tawl tawl a ngai ui. Ziate haw chu lau kiu in, thil phalo a bawlthei puau ah, thilpha bawltheina le a nei diak puau hi.

⁶Aw LALPA, nangma gual him kuama a um puai, la lopi in, la min chu hatna’n ahi’lopi hi.

⁷Aw, namtin chung ah Lengpa, kua a hem nang hun lau lo ding chu? Namtin lak ah mipi zosia leh, a lenggam zosiau lak in, nangma gual kuama a umlo ziakin, ja tâk him la hi.

⁸Amau haw vang a ngong un, a ngol ui; milimte zilsakna chu vang, thingbong panna bei gual ahi.

⁹Tarshish ah kipat in dangka kisek a hun puau ah, Uphaz ah kipat in sana a hun puau hi. Ziate chu mi khutthiamte khutsuak leh, sana sêkte siam a hiu; a kithuamnau puante chu, a dum leh a sandup ahi’n; mi khutthiamte khutsuak ngen ahi.

¹⁰Himaleh, LALPA chu Pathian tak ahi, Ama chu Pathian hing leh kumtuang Lal ahi. A lungnat phat leh lei pumpi a kithing in, a lungnatna chu kuama’n a thuak zo ngai puau hi.

¹¹Zia gual chun a kiang un la gen ding ahi. Lei leh van siamtu hilo pathian zosia chu, lei chung leh van chung ah khin hi’mangthai sik sek hung hi’n au.

¹²A thilbawl theina leilung siampa chu ama ahi’n, a pilna’n khawvel hi a phudet a; a hiatthiamna’n vante khi a kaipal hi.

¹³A aw a sua phat leh, van ah tuite a phul bul bul sek in, kawlmong langkhat lam ah kipat in, tuihu a lên dawsak sek hi. Gaw zukna dingin kawl a phet sak ah, hui chu a khol khawmna kipat in, a nun dawsak sek hi.

¹⁴Mi tin chu mimawl leh hetna bei a hiu; sana sêkte chule a milim siamteu ziakin, sukmualpho in a um tau hi; a milim siam uh chu hinna nei lo, kithepna ngen ahi ngal a.

¹⁵Mi thepna ding mai ah kibawl, bangmalo mai mai a hiu ah; gawt ahi’phat uh leh mangthai ta’n au.

¹⁶Jakob chanvo LALPA chu, zia gual mai mai chu ahi puai Ama chu bangkim guanggalpa ahi ngal ah; Israel nam hi a gochan ahi’n, sepai honte LALPA kiti chu a min ahi.

¹⁷Aw, nanghaw ûm chimit ah umte haw, la thilneiteu a lom lom in chomkhawm un.

¹⁸LALPA‘n zia gual hin a gen ngal a: Tu’hun ah hin zia gam ah chêng zosia hi, sepdok phot ing ka tin; a chung un lungjinna tunsak ing ka, tichun, hethiam ta’n au.

¹⁹Ka liamna ziakin ka chung a gik na e! Ka liamna hi a huaisia na e! Himaleh, “Zia hi ei gawtna a hiziak in, ka tuak tei tei ding ahi,” ka ti’n.

²⁰Ka puanbûk suksiat a hita’n, ka khauhual zosia le suktan ahi tai; ka chate zosia’n le ei nusia tau in, a um ta puau hi; ka puanbûk ei jak piak ding leh, ka puanjak ei kândet piak dingle a um ta puau hi.

²¹Belampute chu a ngong bel bul un, LALPA a dong ngai puau a; ziaziakchun, a lamzang ngai puau a, a belam honteu le a taichek zo tau hi.

²²Husa chu ngai tiam u! Judai gam ah khawpite hi’sia, si-alte chênna ding ah siam dingin, mallam gam ah kipat in husa lau um tak a hung hi, ei hun zuan hi, ngai un.

²³Aw LALPA, mihingte hi a nop dan dan ua, umthei ahi puau ti ka hia’i, mihing thitheite hin a um ding dan tak un, a kãl uh a suan thei puau hi.

²⁴Aw LALPA, ei sudik inla, ka kiphutawk un ei soisa’n; lungna’n vang ei soisa kin, achutiloleh, bangmalo ei sua ding la hi.

²⁵La lungnatna chu nangma he’phalo, gam dang mite chung ah sungtha’n la, la min lam ngai lo mite chung in sungtha’n; amau chun Jakob ne zo in, a nêk ua a val zaw nung unle, a chênnau a hisia dim dem nalai sêt ui.