Read Vaiphei JEREMIAH 18 Bible Online

JEREMIAH 18 - Vaiphei bible

JEREMIAH 18

¹Jeremiah kiang in LALPA‘n thu a hun gen a:

²“Hung inla, lei bêl vêlpa In ah vachia tiam in; zia tak ah chun ka thute hun hetsak ing ka,” ti in.

³Tichun, lei bêl vêlpa In ah chun ka vachia suk ta’n, zia tak ah chun, bêl siamna khawl ah lei bêl a la siam lai tak chu ka vamu ta’n.

⁴A khut ah lei bêl a siam pêt ah chun a siat ahileh, a dawi dan tak in lei bêl chi dang khat in a siamdok kit a.

⁵Ziaphatchun, LALPA‘n ka kiang in thu a hun gen a:

⁶Aw Israelte haw, bêl vêlpa’n a bawl gual in, ka nop dan dan ah hun bawl thei hilo ka hem? LALPA‘n a tii. Aw Israelte haw, bêl vêlpa khut ah tungman um gual ah chun, nanghaw le ka khut ah um la hiu.

⁷Nam khat a hem, lenggam khat a hem chu, ka nop hun hun ah bawdaw ding, khet phel ding leh suksiat ding a hem ka la ti tâk chun,

⁸zia namte chun a thil phalo bawl uh a haisan uh chun, a chung ua siatna tung ding ah ka la gendawsa chu juk kit ziang ding ka hi.

⁹Chuleh, nam khat a hem leh lenggam khat a hem chung ah tundin ding thu leh, phudetna ding thu ka la gen hiziang ta maleh,

¹⁰ka mit mu ah thil phalo a bawl ua, ka thugen a ngai diak lo uh chun, a chung ua thilpha bawl ding ah ka la guanggalna lungthim chu theng kit ziang ding ka hi.

¹¹Ziaziakchun, tu’hin Judah mipite leh, Jerusalem ah chêngte kiang in, zia gual hin LALPA‘n a gen hi, vati’n: En un, la chung ua thil phalo tunsak ding leh, nanghaw do ah thil phalo guanggal ding ah bêl vêlpa chu ka hi. Tu’hin, la leng un, la thil phalo bawl uh chu hun haisan unla, la umchan uh leh la thilbawl zosiau siamphau in, ti in.

¹²Himaleh, amau chun, “Bang dukdak ahi puai! I lungtup gual gual un um hitiu in, lu’lul tak ah I thil tup uh phalo dungzui chiat ah I um ding uh ahi,” a tiu a.

¹³Ziaziakchun, LALPA‘n zia gual hin a gen hi: Namtin lak ah dong vêl tiam un: Zia gual thu chu kua’n a la he ngai em? nungak thiangtho Israel in vang, thil tizat um tak chu a la bawl tai.

¹⁴Lebanon tâng ah vûk kia chun, Sirion suangpi kikâlte a pêl diak em? tângsâng ah lui luang suk chun, luicha tuivot luangte chu, a chawp kang ngai em?

¹⁵Himaleh, ka mipite chun ei hemil zo tau a, kithepna’n gimtuite a lân un, lamgului, a nunchan lui un a kipal pâi tau a, lam tuangpi zui lo in, lam diklo a haw tau hi.

¹⁶A gam uh tizat um tak leh, kumtuang ah mite cheksak khum in a siam tau hi. A haw kha tapo in a tizau a, a luchang uh a thin khum sek ui.

¹⁷Sualam hui in a mût gual in, mêlmate âng in jam cheksak ding ka hi. Siatna a tuak niu ah chun, ka maichang hilo, ka nung lam ngat ing ka.

¹⁸Ziaphatchun amau in, “Hung tiam un, Jeremiah chung thu ngaitua hitiu, ei zilsak ding thiampu leh ei hil ding mipil tasam pua’n tin, thugen ding jawlnei le tasam diak pua’n a. Hung unla, ama do in hêk hitiu in, a thugen him him ngaisak ta puai tiu,” a tiu a.

¹⁹Aw LALPA, ei ngaisak inla, ei dodâlte thugen hi ngai tiam in!

²⁰Thilpha lai chu a phalo ah thuk ding a hem? Ahi’n la, ka kiaklutna dingin, lei a chokuak ta’ngal un. A chung ua la lungnatna la lâk mang theina dingin, la ma-âng ah hung dingin, a phatna ding uh ka la gen sek dante kha hezing in.

²¹Ziaziakchun, a chateu chu kialpi thoksak inla, chemjam tuak dingin naw mang in; a jiteu chu cha bei ah um in, meithâi hung hitau hen. A pawsalteu chu natpi’n thiu hen la, a khangdawngteu chu kido’na chemjam in thi tau hen.

²²Hetkhol lo ah amau sim ding la hung tunsak phat leh, a In ua kipat kâ thawm het in um ta hen! Ei matna ding un kawkhûk a cho un, ka keng awkna ding thâng a kam ta’ngal un.

²³Aw LALPA, nang in vang, ei tha’na ding ah a thil guanggal zosiau hi hezing in. A khawlonau hi ngaidam kin la, a gitlonau hi kimulosak diak kin. La ma-âng ah kisep puk uh hen la, la lungnat lai tak in amau chu soisa ta’n.