Read Vaiphei JEREMIAH 2 Bible Online

JEREMIAH 2 - Vaiphei bible

JEREMIAH 2

¹LALPA‘n ka kiang in zia gual hin a hun gen a:

²“Chia inla, Jerusalem ah chêngte het dingin vagen inla, LALPA‘n zia gual hin a gen hi vati’n: La khangdawn lai ah la ginum dante, mothak gual ah lei ngai dante leh, gamthip ah bangma kichînlo’na gam ah le ginum tak ah ka nung lei zui dan kha ka hezing hi.

³Israelte chu LALPA â ding ah thiangtho a hiu in, a ga masa pen chu ahi. Amau ne tapo chu thiamlo chang a hiu; a chung un siatna tunsak ding ka hi, LALPA‘n a tii,” ti in.

⁴Aw Jakob Inkuante leh Israel Inkuante haw, LALPA kam suak hi a la ngai tiam un.

⁵LALPA‘n zia gual hin a gen hi: La pu leh pateu in keima ah demna bang a muu ah, gamla tak ah ei nusia a hiu em? Bang ding ah bangmalo mai mai del ah, amau le bangmalo suak ziang a hiu em?

⁶Amau chun, Aigupta gam ah kipat ei puidok ah, gamthip leh gamkeu leh leikuak lak ah, gam gawchâk leh thim nuai ah kipat leh, kuama chia ngai lo’na leh, chên khak lo’na munte lak ah kipat, ei la puidokpa, LALPA chu khoi ah um ahi tam? ti’n ei limsak ta puau hi.

⁷Gam pha tak ah a gate leh, a phatna chên dingin ka hun puilût la hiu, himaleh, la tun phat un, ka gam chu la supawlche tau a, ka gochan chu thil ki’dak um la sua tau hi.

⁸Thiampute’n, “LALPA chu khoi ah a um tam?” a ti puau a; Dan mangte chunle ei he’pha ta puau hi; thuneite chun ei do un; jawlneite’n le Baal min in thu a gen un, milim mantheilote ei hosan tau hi.

⁹Ziaziakchun, ka hun ngaw nalai la hiu, la tu leh chateu tiang in ngaw nalai ding ka hi, LALPA‘n a tii.

¹⁰Tumlam Kupra tuisuagiat pang Kittim tiang in, va gâl kâi in vaen un; ahiloleh, Sualam Kedar lam ah mi sawl unla, pha tak in vaenchian uh hen; zia gual thil hi a um ngai em ti vakan chian tau hen!

¹¹Namte chun a pathianteu chu, Pathian tak hilomaleh, a theng ngai him him awm? Ka mipite’n vang a lopinau, thil phachuam lo mai mai in a theng tau hi.

¹²Aw vante haw, zia thil hi mak sau inla, zia thil hi tizau inla, dipchâk in kingaikhu ziang tau in, LALPA‘n a tii.

¹³Ka mite’n thil pani a hi’khial ta’ngâl un: Tuinâk hing keima ei nusia in, tui um thei lona bêlsia gual, tui bêlte a kisiam ui.

¹⁴Israelte chu suak a hiu ah a hem? suak ah piang him a hiu em? Bang ding ah chomgam ah um ziang a hiu em?

¹⁵Sakeibakneite’n a ngîk un, ngai tak in a hâm khum tau hi. A gam uh a hisiat piak tau a, a khawpiteu chule suchim in, kuama a chêng ta puau hi.

¹⁶Zia mai chule hilo in, Memphis leh Tahpanhes ah mite chun, la luchang ua lal lukhuk a susia tau hi.

¹⁷LALPA la Pathian In lam dik ah a hun pui lai ah, ama la nutsia ziak ah zia gual thilte chu, la chung ah tung ding ah la kibawl hilo a hem?

¹⁸Chuti ahileh, Aigupta gam ah la chiau chu, Nail tuisik dawn bep lo ngâl, bang dang phatchuamna la muu em? Ahiloleh, Assuria gam ah la chiau chu, Euphrates tuisik dawn bep lo ngâl, bang dang phatchuamna la muu em?

¹⁹La nunsiatnau in hun gawt intin, la nungtolnau in hun kophil in a. LALPA la Pathian uh la kihei mang san uh hi, nang uh a ding ah thil phalo tak leh, khawk tak ahi ti hia’n, muchian tau in; keima hi lei kicha mawng mawng puau hi, ti’n sepai honte LALPA PATHIAN in a gen hi.

²⁰Hun sawt tak ah kipat khan, la ngawngkol thiakbong in, la kolbu le la khen bong ah, “La na sêm ta pua’ng ka,” la ti hen. Ahi’n la, tâng sâng chung tin leh, thinglîm tincheng ah chun, nawchizuak in la kiphâ tai.

²¹Grep kichijiat thiang tak, doichuam tak ah ka hun phû hilo la hem? bangtidan ah grep tak lo leh, grep lêm hung suak ziang la hem?

²²Changal leh sabon tam tak mang zo in, kisil ziang male chinle, la hi’khialna bepawn chu ka mu zing hi, LALPA Pathian in a tii.

²³“Ka subuak pua’n, Baal le ka zui puai,” ti’thei ding la hem? Phâijawl ah la tat dan chu en inla, la thilbawl chu he ta’n; sangawngsau kitualtha la bang ah,

²⁴gamsabiltung gamthip ah chên nuamsa leh, a huk lai ah a nâk khawng ah sangpal chu, kua’n a nopnau chu subei ziang thei ding a hem? Thachawl kilaw ding bep in kuama’n hawl pua’n au; a ni leh tha a ti’n phat leh, mu ahi kit bep sek ui.

²⁵La kengte chu kengtawdap bei ah vâksak lo ding leh, la dang keu lo dingin vêngtup zing in. Himaleh, nang in, “Kinem kin! Gam dangte hepi ka hi’n, amau chu delzui ding ka hi,” la ti hen.

²⁶Gucha matdaw ahi’phat leh, a jachâk gual in, zia gual chun Israel Inkuante chule zakcha’n au. A mipiteu, a leng leh lalteu, a thiamputeu, a jawlneiteu leh,

²⁷thingbul kiang ah, “Ka pa la hi,” tite leh, suangtum kiang in, “Nang ei hin ka hi,” tite zosia chu zakcha’n au. A mai lam uh ei ngat lo in, ei nungngatsan zaw tau ah; a buai phat uh leh, “Hung kipan inla, ei hukdok in,” a ti sek ui.

²⁸Ahileh, la pathian ding ah la kisiamte kha, khoilam tung zo a hitau em? La buaina kipat hun hukdok thei a hiu chun, hung kipanleu hiding a pom. Aw Judah, la khawpi jat ah tam, pathiante la nei uh hilo maw!

²⁹Bang ding ah ei gensia la hiu em? La leng un ka chung in la thukhel ngâl un, LALPA‘n a ti ahi.

³⁰La chateu chu a thawn in ka vua hen, kisiam phatna’n a nei diak puau hi; sakeibaknei gawlsan in a nêk zaw gual in, la jawlneiteu chu la chemjam un a ne zo tau hi.

³¹Nanghaw, tu’khang ah mite haw, LALPA thugen hi ngaisak tau in: Israelte â dingin gamthip leh, thimna gam ka hi ngai him him em? Bang ding ah ka mite chun, “Ka nop nop ua um thei ka hiu, la kiang ah hung kit ta pua’ng kau,” ti’thei a hiu em?

³²Nungak in a kicheina matchâkte leh, monu’n a mo puan chu a hemil thei awm? Ka mite’n vang ni sim sên lo sung, ei hemil tau hi.

³³La ngaijawngte umna la zot thiam siat tawh, numei nunsia nasan la umchan la hil sek hilo a hem?

³⁴In a bulu lai un a la man talo maleu chinle, migenthei leh mawna beite thisan chu, la puan in a nât tai. Zia gual chu ahi sapi’nle,

³⁵nang in, bangma ka bawl khial pua’n; ka chung in lung na pua’n a, la ti nalai a. Bangma ka bawlsia puai la ti ziakin, tu’hin, la chung ah vaihawm ding ka hi.

³⁶La umchan kihiatlosak ah, nuam tak ah um gua la hi maw! Assuriate’n a hun sukmualpho gual mau in, Aiguptate’n le hun sumualpho ding a hiu.

³⁷La kisuanpiteu chu LALPA‘n a paithâk tak ziakin, amau ah kipat in zakcha’n hung pawtdok kit in la tiu in, amau jal in vangphatna mu pua’n lau.