Read Vaiphei JEREMIAH 20 Bible Online

JEREMIAH 20 - Vaiphei bible

JEREMIAH 20

¹Tu’hin, LALPA In ah hotu lian pen, Immer chapa thiampu Pashhur chun, Jeremiah in zia gual ah thu a gente chu a la he ta’n.

²Ziaphatchun, Pashhur in jawlnei Jeremiah chu jep in, LALPA In ah Benjamin Kotpi chung lam ah bultukna chun a bultuk tai.

³A jing phatin Pashhur in Jeremiah chu a bultukna kipat in a va thâdok ah; ziaphatchun, Jeremiah in a kiang in, LALPA‘n la min dingin Pashhur sak lo in, Major-Missabib a sa tai.

⁴LALPA‘n zia gual hin a gen ta’ngal a: Nangma leh la gual leh pâite â ding ah tizat um in hun siam ing ka tin; tichun, amau la et zing lai in, a mêlmateu chemjam in amau chu thi’n au. Tichun, Judai gam pumpi hi Babulon lengpa khut in pia’ng ka tin, Babulon gam lam in sal ah pui intiu in, zia tak ah chun chemjam in hun that ta’n au.

⁵Zia khawpi hausakna zosia, a lawkna zosia, a nei thil doichuamteu leh Judai gam ah lengte go thil zosia chu a mêlmateu khut ah pia ta’ng ka tin; a mêlmateu chun suam in, lak piak in, Babulon lam ah paw mang ta’n au.

⁶Chuleh, Pashhur, nang tawh la In ah chêng zosia pum in, sal ah mat hin la tiu in; Babulon gam lam ah chia ta’n lau; zia tak ah chun nang tawh, la gual la paiteu a kiang ua thu diklo tak ah la la genlawk sekte zosia pum ah thiden in, vui in hung um den ta’n lau, ti in.

⁷Aw LALPA, nang in lei jawl ah, tichun, jawl zaw in ka la um tai; keima sâng in la hatzaw’n, lei zo tai. Sun nitum tum ah nuizatbûk ka hita’n, mi zosia’n ei nuisan tau hi.

⁸Thu ka gen phot leh ka kikojak in, “Kipawngbawlna leh suksiatna ngen ahi!” ti’n kikojak ding ka hi. LALPA thu chu kei â ding ah sun nitum tum ah musitna leh, dem ka law’na bep ahi ta’ngal a.

⁹“Ama chu gen puak ta pua’ng ka tin, a min inle thu gen kit ta pua’ng ka,” ka tileh la, zia phat chuleh, ka theng sung ah meiâm um gual in, ka thipsan thei pua’n; ka thip hiat hiat leh la ka thuak zo sek pua’n, ka thipsan thei diak paw’ngal a.

¹⁰Mi tam takte kihogûkna chu, “Kiltin ah tizat umna a um hi! Hêk siau in, hêk sia’i tiu,” a tiu a. Ka gual ngai zosiate chun, ka kipalpaina ding changgu’n, “I jawl zaw khâk ua, ama I zaw thei khâk uh leh, a chung ah phuba I lâk theina ding un,” a tiu a.

¹¹Himaleh, LALPA chu sepai hangsan tak gual in, ka kiang in a um zing a; ziaziakchun, ei sugentheite chu kipal pâi intiu in, tichun, ei zo pua’n au. Lawting lo ding a hiziak un, mualpho tak in um in au. A kumkhua minsiatnau chu, hetmil ni um ta pua’n a.

¹²Aw, sepai honte LALPA, nang in mi dikte chu la patep in, a lungthim leh ngaituanau la mu suak hi; a chung ua la phuba lâkna chu, ei musak in aw, ka chung thu hi ka hun kolsak ta’ngal a.

¹³LALPA kiang ah La sau inla, LALPA chu chawihoi tau in! Thil phalo bawlte khut ah kipat in, panpi ngaite chu a la hukdok ta’ngal a.

¹⁴Ka la pian ni chu hânsia law in um hen! Ka nu’n ei la hin ni chu maljawl in um ki’hen!

¹⁵Ka pa kiang ah, “Chapa khat la nei ta ei,” ti thu vagen ah, va kipakpipa chu, hânsia law in um hen!

¹⁶Zia pa chu LALPA‘n lainatna pang lo ah, khawpi a suksiatte gual ah um in, jingkal ah kâ thawm hia’n, sûnchang lai in patau thawm he tau hen;

¹⁷sûl sung ah khan ei la thalup lo ziakin; chuti hileh, ka nu chu ka khûl a la hita’n tin, a sûl chun ei la vop kumkhua mai ding a la hi’ngal in.

¹⁸Bang ding ah sûl ah kipat hung piang ah, sep gimna leh lungngaina bep mu ding ah, ka damsung sia mualphona tuak ding bep ah, hung piang ka hi tam?