Read Vaiphei JEREMIAH 22 Bible Online

JEREMIAH 22 - Vaiphei bible

JEREMIAH 22

¹LALPA‘n zia gual hin a gen a: Judai gam ah lengpa In ah chia suk inla, zia thu hi vagen inla;

²a kiang in: Aw Judai gam ah lengpa, David lalchutpha kichupa, nang tawh, la suakte zosia leh zia kotpite ah lut zosiate haw, LALPA thugen hi a la ngai un.

³LALPA‘n zia gual hin a gen hi: Dikna leh thu tak in sêm unla, sugentheipa khut ah kipat in suam ah um zosia chu hukdok un. Gam dang mite, nauchagate leh meithâite chung ah thil diklo leh thagum sua’na bawl kiu inla, zia mun ah hin maw’na neilote thisan chu sua kiu in.

⁴Zia ka thugen hi la ngai uh chun, David lalchutpha kichu, sakol kângtalai leh sakolte chung ah chuang, a suakte leh a mipite tawh, zia In kotpite ah hin lut in au.

⁵Himaleh, zia thute hi la ngai lo ua leh vang, zia In hi a hawm ah nutsia in hung um tei tei ding ahi, ti’n LALPA‘n keima min in ka kihaksial hi, ti’n a gen hi.

⁶Judah Inkuante chungchâng in, LALPA‘n zia gual hin a la gen ta’ngal a: Nang hi, kei â ding ah Gilead leh, Lebanon tângvûm tawhbang la hi; himaleh, gamkeu leh khawpi, kuama chên lo’na hun siam ding ka hi.

⁷A gâlvan ua kithuam ah, nang hun susia dingte chu, hun guanggal ding ka hi; la sidar thing doichuamte chu phûk in, meikuang lak ah pai lut in au.

⁸Chun, nam tam tak te’n zia khawpi chu hun haw malam intiu in, a leng un, “Zia khawpi lopi tak hi bang ziak ah LALPA‘n ahi ti bawl ziang a dia aw?” ti’n kidongtua ta’n au.

⁹Ziaphat chuleh, “A LALPA Pathian uh thuthung khawksa lo ah, pathian dangte bia’n, a na a sepsan ziak un ahi,” a la ti’n au.

¹⁰Mithite chu kâ kiu inla, sûn diak kiu in; hung kile’kit ah a piannau gam mu kit talo ding ah, pui mang ah umte chu kâ zaw tau in.

¹¹Judai gam ah leng Josiah chapa Shallum, a pa Josiah thasâng ah pang, pui mang ah umpa chungchâng thu LALPA‘n zia gual hin a gen hi: Zia lam ah hin hung kit ta pua’n tin,

¹²sal ah a puimangnau mun ah chun hung thiden ta’n tin, zia gam hi hung mu kit talo ding ahi, ti in.

¹³Diklo’na In kisak ah, diktatna pang lo ah a pindan chungnung bawlte chu, a chung uh a gik hi; zia gual mite chun a Invêngteu sepgimna man pelo in, a sepnau tha manle a pia puau a;

¹⁴amau chun, “In lian tak in sa’ng ka tin, pindan chungnung le lian tak in bawl ing ka,” ti’n, a tukvan dingte a bawl un, sidar thing ah ûm in, thingrong san a nu ui.

¹⁵Sidar thing In la kisak ziak ah, leng hi mai ding la hem? La pa khan ne leh dawn ah, dik tak ah vaihawm hilo a hem? Zia chu ama â dingin a pha ahi.

¹⁶Michaga leh tasamte panpi’n vai a hawm ah, zia chu ama â dingin a pha ngâl a. Zia chu keima ei hetna ziak hilo maw? LALPA‘n a tii.

¹⁷Himaleh, la mit leh la lungthim chu vang, la lawkna diklo takte chung bep in a chu’n; tichun, maw’na beite thisan sua’na ding leh, thagum sua’na ding bep la ngaitua hi.

¹⁸Ziaziakchun, LALPA chun Judai gam ah Josiah chapa, Lengpa Jehoiakim chungchâng ding thu zia gual hin a gen a: “Aw, ka suapipa!” Ahiloleh, “Katei, ka suapinu!” a hem ti’n ama cha sûn pua’n au. “Katei, LALPA!” Ahiloleh, “Katei, a ja’umna chu!” ti inle ama chu sûn pua’n a.

¹⁹Jerusalem kul kot khêl lam ah, kaidaw leh del daw ah um in, sabiltung kivui gual bep ah, vui liam in hung um ta’n a.

²⁰Lebanon tâng ah kal to in kikodok unla, chuleh, Bashan ah chun la awu suau in; la gual ngaite a leng un suksiat ahi tâk ziak un, Abarim ah kipat chun kap jak tau in.

²¹La vangphat lai ni’n la kiang in ka la gen ta’n, ahi’n, nang in, “Ngaitha pua’ng ka,” la ti’n. Zia chu la khangdawn lai ah kipat, la um dan him a la hita’n, ka thu la ngaithâk sek lo ziak ei vei.

²²La hotuteu chu hui in tok mang intin, la ngainatteu chu sal ah tâng in au; ziaphat chuleh, la gitlonau zosia ziakin, mualpho tak leh beidong tak in um ta’n lau.

²³Aw, Lebanon tâng sidar thing lak ah bû sia ah chêngpa, la chung ah natna a hung tun ah, numei nauvei natna gual, la chung ah a hung tun phat leh, bang gual ah thûm in la tâu ta diam!

²⁴Judai gam ah Jehoiakim chapa Koniah chu leng hi hen la, ka khut changlam ah ka min namna khutsebi hi hial ziang maleh, zia kipat chunle hun botdok tho tho ding ka hi, ti’n LALPA‘n a hinna sâl in a kihaksial tai;

²⁵tichun, la hinnau chu a hun hawlte khut ah pûk lut ding la huphul ma mau leh, Babulon lengpa Nebukadrezar khut leh, Kaldaite khut ngei ah chun hun pelut ding ka hi.

²⁶Nangma leh a hun hingnu chu gam dang, la pianna gam hilo ah chun hun deldok ing ka tin, zia tak ah chun hung thiden ta’n lau.

²⁷Himaleh, kile’kit a nop ma ma nau gam lam ah chun vang, kile’kit ta pua’n au.

²⁸Zia hi bêl sesa, kuama’n bangma a ngai lo leh, kuama’n a dawi tâk lo uh, Koniah kha hilo ahi em? Bang ding ah ama leh a suan leh pâkte chu, a het ngai lo nau gam ah, nawdaw ah um ziang a hitau em?

²⁹Aw gam, gam, gam! LALPA thu hi ngai tiam un!

³⁰LALPA‘n zia gual hin a gen hi: Zia pa hi cha bei leh a damsung ah lawting ngai lo; a suante kuama lawting ah, David lalchutpha kitung ah, Judai gam ah vaihawm ding, um kit ngai talo ding ahi, ti’n zik lut in, a tii.