Read Vaiphei JEREMIAH 23 Bible Online

JEREMIAH 23 - Vaiphei bible

JEREMIAH 23

¹Ka gantatna mun ah belamte that ah, naw jak bep belampute chu a chung uh a gik na e! LALPA‘n a tii.

²Ziaziakchun, Israelte Pathian, LALPA chun, ka mipite chung ah hotute chungchâng zia gual hin a gen hi: Ka ganchate naw jak ah, naw mang ah, ngaisaklote chu nanghaw la hiu. Tichun, la thil bawl uh phalo tak chu hun ensui ding ka hi, LALPA‘n a tii.

³Ziaphat chuleh, ka gan-gual um sunte chu, ka nawjakna gam tin ah kipat in keima’n hawl khawm kit ing ka tin, a huang sung un hawl lut kit ing ka; tichun, hung pung in hung tam ma ma kit ta’n au.

⁴Amau pha tak cha enkol ding, belampute hun tung ding ing ka; tichun, lau ta pua’n tiu in, beidong diak talo in, a lak ua mangthai le um ta pua’n au, LALPA‘n a tii.

⁵David â ding ah Bâk dik tak ka hun tun dinna ding chu hung tung ngei ngei ding ahi. Ama chun leng gual in vaihawm intin, pil tak in ngaitua in ah; dikna leh thu tak in a gam chu vaihawm ta’n a.

⁶Ama hun sung in Judai gam sung chu hukdaw ah um in, Israel gam chu bit tak in um in a. Chuleh, ama chu, “LALPA chu I Diknau ahi,” ti’n ko hita’n ah, ti in.

⁷Ziaziakchun, “Aigupta gam ah kipat Israelte a la puidokpa LALPA chu a hin nâk leh,” a kiti lo’na ding hun chu hung tung ngei ngei ding ahi’n;

⁸himaleh, “Mallam gam leh gam tin ah a la nawjakna gam zosia ah kipat, Israelte leh a suan a pâkteu hun puidok ah, hun puipa LALPA chu a hin nâk leh,” hun ti zaw ta’n au. Zia phat chuleh, amau gam ngei ah chun chêng ta’n au.

⁹Jawlneite chung thu ah chun: Ka sunggil ah hin ka lungthim chu a na ma ma in, ka gu leh châng zosia a kithing ui; LALPA ziak leh a thu thiangtho ziakin, zukham leh zu’n a thuzawte gual in ka um tai.

¹⁰Gam chu ângkawmna ngen in a dim tai; hânsia law khum ahi’na ziakin, gam chun a sûn ah, gamthip ah gantatna munte chule a keugawp tau hi. A tawidan uh chu a diklo ngen leh, a hatnau chule a diklo lam ngen ahi tai.

¹¹Jawlnei chunle thiampu gual tho in, Pathian a ngaisak ta puau a; ka In sung natiang in a nunsiatnau chu ka mu tai, LALPA‘n a tii.

¹²Ziaziakchun, a lampiteu chu, thim lak ah lamnâl gual hihen la, zia tak ah chun naw lut ah um in, kipuk sik sek tau hen; amau ka gawtna kum a tun phat leh, a chung un siatna hun tunsak ding ka hi’ngal a, LALPA‘n a tii.

¹³Samaria gam ah jawlneite lak in, ki’dak um khat ka mu tai; Baal min in thu a genlawk un, ka mipi Israelte chu a pui mang tau hi.

¹⁴Himaleh, Jerusalem ah jawlneite lak in, thil huaisia zaw diak ka mu tai. A ângkawm un, zuau a gen ui; thil phalo bawlte khutbân a hi’hat un; tichun, kuama’n nunsiatna lampi a haisan puau a, keima ngai in, a leng un, Sodom khua mite gual leh, Gomorrah ah chêngte gual mai kha a hitau hi.

¹⁵Ziaziakchun, sepai honte LALPA chun, jawlneite chungchâng in zia gual hin a gen hi: Gamsai nêksak ing ka tin, gu’tui dawnsak ing ka; Jerusalem ah jawlneite lak ah kipat in, gam pumpi pathian ngaisak lo’na, a hung pawtdok ta’ngal ah, ti in.

¹⁶Sepai honte LALPA‘n zia gual hin a gen a: La kiang ua thugen ah hung jawlneite thugen him him ngaitha kiu in, a hun thêm chavai mai mai a hiu. LALPA kam ah kipat hilo, a lungthim suangtuanau mai mai a gen zaw ngal un.

¹⁷LALPA thu bangma ngailote kiang in, “Thil phalo bangma tuak pua’n lau,” a tipiak zing un; chuleh, amau ngaituana bep lochal tak ah zuite kiang ah chun, “La chung un siatna hung tung pua’n a,” a ti sek ui.

¹⁸A thugen muchian ding leh, hechian thei ding khop ah, kua a hem LALPA vaihawmna vapang sek? Kua a hem a thu puangjak ding ah, a thugen ngaisak chu?

¹⁹En un, LALPA thigawpi chu! Chîmpei huaisia tak gual in, a hachang thakna chu a pawt tai! Mi nunsiate luchung in hung puakjak in a.

²⁰A lungthim ah bawl ding a tup a ngaituate chu, a bawl zaw masang sia LALPA lungnatna chu, kile’kit pua’n a. Ni nunung lam phat leh vang, kichian tak in hechian ta’n lau.

²¹Zia jawlneite kha ka sawl lo in a tai un, a kiang ua thu ka gen lo pi’nle thu a gen ui.

²²Ka vaihawmna hung ding hileuchu, ka mipite kiang in ka thu genjak ding a hiu a; chutileh, a gitlona lampiu leh, a thil phalo bawlteu chu haisan ta ding a hiu a.

²³LALPA chun, Keima hi gamla tak ah um Pathian hilo in, naicha um Pathian hilo ka hem?

²⁴Ka mu theilo ding ah kisêlgû thei kua a hem um? LALPA‘n a tii. Van hileh, lei chung hileh lua suak hilo ka hi em? LALPA‘n a tii.

²⁵Ka min ah zuau thu bep gen sek jawlneite’n, “Ka manglam in ka mu’n, ka mang in ka mat hi!” a ti zosiau chu ka hesuak hi.

²⁶A zuau thu phuak kawm un ka mipite hi, zia jawlneite chun bang chan pui chavai nalai ding a hiu em?

²⁷A pu leh pateu in keima hemil ah, Baal ei la zuisan gual uh khan, a mang uh kihiltua in, ka mipite hin ei hetmilna ding uh a guanggal ui.

²⁸A manglam ah thil mu nei jawlnei chun a thil muu chu gen hen la, maleh, ka thu gen ding nei tapo chun ka thu chu ginum tak in gen mai uh hen. Bupawl tawh gehu bu’n kibatna bang a nei him him awm? LALPA‘n a tii.

²⁹Ka thu hi mei tawhbang leh, suangpi khen phel gei gui thei, sek tawhbang hilo a hem? LALPA‘n a tii.

³⁰Ziaziakchun, en un, ka thugen ding phuak kawm ah thugen sek jawlneite chu ka dodâl hi, LALPA‘n a tii.

³¹En un, “LALPA‘n a gen hi,” ti ah amau phuak kawm gen sek jawlneite chu ka dodâl ahi, LALPA‘n a tii.

³²En un, mang zuauthei mai maite gen ah, mite hil ah, a zuauthu teu leh, a uanna thu manthei lo ziak ua ka mipi puimang jawlneite chu ka dodâl hi, LALPA‘n a tii. Amau chu ka sawl pua’n, ka thugen dinginle ka sawl puai; ziaziakchun, zia mipite â ding ah hin a phachuam him him puau hi, LALPA‘n a tii.

³³Chuleh, zia mite hi a hem, jawlnei khat a hem leh thiampu khat a hem in la kiang ah, “LALPA puaknat chu bang a hem?” ti ah a hun dot phat leh, a kiang in, “Nanghaw hi a puaknat chu ahi, hun pâmpai ding ka hi, LALPA‘n a tii,” ti’n la dawnhu ding ahi.

³⁴Chun, jawlnei hi’n, thiampu hihen la mipi kua hitaleh, “LALPA puaknat,” ti gen kha taphot chu, a genpa tawh a Inkuan un gawt ding ka hi.

³⁵Zia gual hin la lak un la kidongtua zaw ding uh ahi: “LALPA‘n bang gual in a dawnhu em?” ti a hem, “LALPA‘n bang a gen em?” ti hi zaw hen.

³⁶Himaleh, “LALPA puaknat chu,” ti hivang la gen puak tâk lo ding uh ahi; puaknat chu mi tinte kamsuak haw zosia hi a hiziak in; tichun, Pathian hing, sepai honte LALPA, I Pathian uh kamsuakte chu la kaikawi zo ta’ngal un.

³⁷Tichun, jawlnei kiang ah chun, “LALPA‘n bang a hun ti dawnhu em? LALPA‘n bang a hun gen ta em?” ti’n dong zaw tau in.

³⁸Himaleh, “LALPA puaknat,” la ti git tâk lo ding uh ahi, ti ah ka hun sawl nung in, “LALPA puaknat,” la ti khâk kit ahi chun, LALPA‘n zia gual hin a gen hi: “LALPA puaknat,” la ti tâk lo ding ahi, ka ti’sa sa, “LALPA puaknat,” ti thu la gen khâk kit ahi him him chun vang;

³⁹ziaphat chuleh, nangma leh zia khawpi nang leh la pu la pate kiang ah ka la piaksa hi tawh, domkâng ing ka tin, ka umna kipat hun sepmang ziang ding ka hi.

⁴⁰Chuleh, la chung ah kumtuang mualpho’na tawh, zachatna hun tunsak ing ka tin, zia chu hetmil ni um ta pua’n a, ti in.