Read Vaiphei JEREMIAH 24 Bible Online

JEREMIAH 24 - Vaiphei bible

JEREMIAH 24

¹LALPA tempul mai ah theichangga bawm pani kikoi chu LALPA‘n ei etsak a. Zia hun chu Babulon Lengpa Nebukadrezar in Judai gam ah Lengpa Jehoiakim chapa, Lengpa Jekoniah chu Jerusalem khua kipat Judai gam vaihawmte tawh, mi khutthiamte, thiksêk thiamte tawh a leng ua Babulon lam ah sal ah a puimang zaw nung uh ahi’n.

²Bawm khat ah chun theichang ga pha tak, a ga masa min gual ngen a um ah; ahi’n, bawm khat zawk ah chun theichang ga phalo tak, nêk tâk lo ngen a kikoi a.

³Chun, LALPA‘n ka kiang in, “Jeremiah, bang la mu em?” ti’n ei hun dong a. Keima’nle, “Theichang ga, pha ma ma ziang leh, theichang ga phalo ma ma ziang, nêk tâk le hilo ka mui,” ti’n ka dawnhu a.

⁴Ziaphatchun, LALPA‘n ka kiang in thu a hun gen a:

⁵LALPA, Israelte Pathian in zia gual hin a gen hi: Zia theichang ga pha takte gual hin, Judai gam ah kipat Kaldaite gam ah saltâng ding ah ka sawlmangte chu pha tak in ngaitua ding ka hi.

⁶Amau chu a phatna ding un entha zing ing ka tin; chuleh, zia gam ah hin hun puitung kit ding ka hi. Tungding kit ing ka tin, suchim kit talo ding ka hi; phu’det ing ka tin, botdok ta pua’ng ka.

⁷Chun, keima hi LALPA ka hi ti ei hiattheina ding un lungthim khat pia’ng ka; a lungthim zosiau ah ka kiang lam ah hung kile’kit ta ding a hiziak un, amau chu ka mipite hita’n tiu in, keile a Pathian uh hita’ng ka.

⁸Himaleh, Judai gam ah Lengpa Zedekiah tawh a siamângte zosia tawh, Jerusalem ah um nalai sunte leh, zia gam ah um te tawh Aigupta gam ah um nalaite chu theichang ga phalo, nêk tâk lo khop ah sia gual hin, bawl ding ka hi, LALPA‘n a tii.

⁹Lei chung lenggam tin ah ka nawmangna gam ah mite â ding ah tizat um, min siat law dingin siam ing ka tin, khang kihilna ding leh, eulau ah hânsia lawkhum dingin pedok ding ka hi.

¹⁰Chuleh, amau leh a pu leh pateu kiang ah ka la piakna gam ah kipat, suksiat dim dem a hizaw masang siau, a lak un chemjamte, kialnate leh natpite sawl piak ding ka hi.