Read Vaiphei JEREMIAH 28 Bible Online

JEREMIAH 28 - Vaiphei bible

JEREMIAH 28

¹Chun, zia kum ma ma, Judai gam ah Lengpa Zedekiah vaihawm pat lim, a kum li’na a tha nga tin ni chun, Gibeon ah kipat Azzur chapa, jawlnei Hananiah chun, LALPA In ah thiampute tawh mipi zosia hetna’n ka kiang in zia gual hin a hun gen a:

²Sepai honte LALPA, Israelte Pathian chun zia gual hin a gen hi: Babulon lengpa ngawngkol chu ka khenbong tai.

³Babulon ah Lengpa Nebukadnezar in zia mun ah kipat a la puakdaw, Babulon lam ah a la puak tung tâk, LALPA In ah matchâk ûm leh bêl zosia kha, kum ni sung in zia mun ma ma ah hin hun tut kit ding ka hi.

⁴Chuleh, Judai gam ah Jehoiakim chapa Lengpa Jekoniah chule, Judai gam ah kipat Babulon sal ah pui mang ah um zosia kha tawh hun pui kit ding ka hi, Babulon lengpa ngawngkol chu khetbot piak ding ka hiziak in, LALPA‘n a tii, ti’n a gen a.

⁵Ziaphatchun, jawlnei Jeremiah chun, LALPA In ah thiampute leh mipi zosia het in, jawlnei Hananiah kiang in zia gual hin a gen a.

⁶Jeremiah in zia gual hin a gen a: “Amen, LALPA‘n zia gual chun hun bawl ngut hen; LALPA‘n la thu gen gual ah chun hun bawl ngut hen la, LALPA In ah ûm leh bêl tawh, Babulon lam ah sal ah pui mang ah um zosia kha zia mun ah hin hun tut kit mai ngut leh ka nuam na e!

⁷Himaleh, tu’hin mipi zosia het ah la kiang ah thu ka gen hi ngai in:

⁸Keima leh nang masang ah jawlneite khan, malai ah kipat gam tam tak leh lenggam hat takte chung ah kidona, kialna leh natpi tung dingte a la genlawk sek un.

⁹Himaleh, muanna thu gen jawlneite thu gen chu a hung guitun chun, ziaphat chuleh, zia jawlnei chu LALPA hun sawl ahi ti kihechian ta’n a,” a la ti tai.

¹⁰Chun, jawlnei Hananiah chun, jawlnei Jeremiah ngawng ah ngawngkol chu a lâkpiak vakah, a khenbong ta’n.

¹¹Chuleh, Hananiah chun mipi zosia het in, “LALPA‘n zia gual hin a gen hi: Zia gual hin Babulon Lengpa Nebukadnezar ngawngkol, nam zosiate chung ah um chu, zia kum ni sung ngei ah hin subong ding ka hi, a tii,” ti’n a gen ah. Zia thu a gen zaw phat ah chun jawlnei Jeremiah in a nusia tai.

¹²Jawlnei Hananiah in jawlnei Jeremiah ngawng ah ngawngkol a khetbot zaw phat ah chun, LALPA‘n Jeremiah kiang in zia thu hi a hun gen a:

¹³Chia inla, Hananiah kiang in, LALPA‘n zia gual hin a gen hi vati’n, “A thing ngawngkol uh la khetbot piak chu, thîk ngawngkol ah hun then piak ding ka hi!

¹⁴Sepai honte LALPA, Israelte Pathian chun zia gual hin a gen ngal a: Lengpa Nebukadnezar na a sep piak ua, a suak ah a umtheina ding un, zia nam zosiate hi thîk ngawngkol ka bâtsak tai; gam sahângte nasan le ama panpi ding ah ka piak ahi tai,” a tii ti in.

¹⁵Jawlnei Jeremiah chun jawlnei Hananiah kiang in, “Ngai tia Hananiah, LALPA‘n nang a hun sawl lo pi’n zia mipite hi zuau thu la ginchaksak a.

¹⁶Ziaziakchun, LALPA‘n nangma hi lei chung ah kipat in hun pai mang ding ahi, ti’n a gen hi. LALPA kãl ah thu la gen ziakin tu’kum sung ah hin thi ding la hi,” a ti tai.

¹⁷Chutichun, zia kum ah a tha sagi’na chun, jawlnei Hananiah chu a thi tai.