Read Vaiphei JEREMIAH 30 Bible Online

JEREMIAH 30 - Vaiphei bible

JEREMIAH 30

¹Jeremiah kiang ah LALPA thu hun gen chu:

²Israelte Pathian, LALPA chun zia gual hin a hun gen a: La kiang ah ka thu gensa zosia kha lekhabu’n zik in.

³LALPA kamsuak chu: Ka mipi Israelte leh Judate vangphatna ka hun piak kit ah, a pu leh pateu kiang ah ka la piakna gam hun lua kit ding ah ka hun puitungna ding hun chu hung tung ngei ding ahi, LALPA‘n a tii.

⁴Israel leh Judah chungchâng in, LALPA‘n zia gual hin a la gen a:

⁵LALPA‘n zia gual hin a gen a: Muanna aw hilo in, patau aw leh dipchâkna aw ka la hiau a.

⁶Dong un la en vêl ma tiam un, pawsal in nau a nei thei him him em? Numei nau nei ding gual ah, bang ding ah pawsal zosia’n a tâi uh sawn a hiu em? Bang ding ah a mêl zosiau dâng ahi tam?

⁷Katei! Zia ni gual ah huaisia chu a um puai; Jakob â ding ah buaina hun ahi; maleh, zia lak ah kipat chun hukdaw hi’n a.

⁸Sepai honte LALPA chun zia gual hin a gen a: Zia ni phat chuleh, a ngawng ah ngawngkol chu khetbot piak ing ka tin, a thîkkol bûte chule hitan piak ta’ng ka; tichun, mêlhet lo mite chun suak leh sal in man ta pua’n au.

⁹LALPA a Pathian uh leh a lal ding ua ka hun tundin ding David na bep chu sêm zaw ta’n au.

¹⁰Nang ka suak Jakob vang lau kin la, aw Israel, lungdong kin, LALPA‘n a tii; gamla tak ah kipat in hun hukdok ing ka tin, la suan leh pâkteu chu, a saltânnau gam ah kipat in, hun hukdok ding ka hi’ngâl a. Jakob chu hung kit in, thip hiat hiat in kichawldam ta’n tin, kuama’n sulauthawng ta pua’n au.

¹¹A hun hukdam ding ah hun umpi zing ka hi, LALPA‘n a tii. A lak ua ka hun thejakna nam tinte chu, subei ing ka tin, nanghaw vang hun subei lo ding ka hi. A kilawm tiang bep in hun gawt ing ka tin, gawt lo ah vang hun nusia ziang lo ding ka hi.

¹²LALPA‘n zia gual hin a gen tai: La natna chu sukdam thei ding gual ahi puai, la beliam a huaisia ma ma ngâl a.

¹³Nang hun panpi ding kuama a um puau a, la liamna damdawi dingle a um pua’n, la damna ding him a um puai.

¹⁴La gual ngaite’n a hun hemil zo tau in, nang a hun ngaisak ta puau hi; la bawlkhial a huaisiat ziak leh, la gitlona a tam bêk ziakin, mêlma’n lainatna pang lo ah a gawt gual leh, gâlte gawt gual in ka hun soisak la hi.

¹⁵La be nat ziak ah bang ding ah kap la hem? La natna chu sukdam thei lo ahi. La bawlkhialna a huaisia ta luai, la gitlona a tam bêk ziakin, zia gual chu la chung ah ka hun tunsak ahi.

¹⁶Ziaziakchun, nang a la ne zo tapo chu, nêk zaw in hung um intiu in; la mêlmate chu a leng un sal ah, pui mang sik sek hung hita’n au; nang hun suam gam tapo chu, suam gam in hung um intiu in, gâlhing ah hun man tapo chu, gâlhing ah matsak ing ka.

¹⁷Amau in nang chu pâm pai ah um ahi tai, ti’n tiu in: “E he Zion hi! Kuama’n a ngaisak ta puau hi!” a hun ti ziak un, la hisêlna hun pia kit ing ka tin, la beliamte chu sudam kit ding ka hi ta’ngâl a, LALPA‘n a tii.

¹⁸LALPA‘n zia gual hin a gen a: Jakob puanbûkte vangphatna chu tung ding kit ing ka tin, a chênna munte chu lainat ding ka hi tai; a mual chung ah khawpi chu, tundin kit hi’ntin; a mun dik tak ah chun, a Insang sak kit hita’n a.

¹⁹Ziate ah kipat chun kipak thugenna leh, kichawlimna husa hung pawt in a. Mi tam tak hiding in hun hi’pung ing ka tin, tawm them hita pua’n au; ja’um tak in siam ing ka tin, musit um hita pua’n au.

²⁰A chateu chu masang lai gual kha hi’n tiu in, chate kha pia kit ing ka tin, a mipiteu chu ka ma-âng ah um dingin siam ing ka tin, phudet ing ka; chuleh, amau tawden zosia chu, gawt ding ka hi.

²¹A lalteu chu amau lak ah mi hi’ntin uh, a chung ua vaihawm dingte chule, a lak ua kipat hung pawt hi’n au; hun puinai ing ka tin, tichun, ama’nle ei hun nai in a; achutiloleh, kua a hem ei nai ngam ding? LALPA‘n a tii.

²²Tichun, ka mite hita’n la tiu in, keile la Pathian uh hita’ng ka.

²³En un, LALPA huipi chu! A lungnatna chîmpei leh thigawpi chu, a hung kuandok tai; mi nunsiate lu chung in kitum ding ahi.

²⁴A lungtup a bawl zawah a mualsua masia, LALPA lungnatna tizat um tak chu, hung kile’kit ziang pua’n a. Hun nunung lam leh, zia chu hun hechian ta’n la.