Read Vaiphei JEREMIAH 31 Bible Online

JEREMIAH 31 - Vaiphei bible

JEREMIAH 31

¹Ziaphat chuleh, Israel Inkuan zosiate Pathian hung hita’ng ka ti’n, amau chule ka mipite hung hita’n au, LALPA‘n a tii.

²LALPA‘n zia gual hin a gen hi: Chemjam ah kipat suakchate chun, gamthip ah chun doisakna a chang ui; Israelte’n chawldamna a hawl phat un,

³gamla tak ah kipat in LALPA a hung kilang tai. Kumtuang hepina’n ka hun hepi la hi; ziaziakchun, la chung in ka gin um zing ahi.

⁴Aw, nungak thiangtho Israel, hun tungding kit ing ka tin, tundin kit hung hita’n la! Tichun, la khuang neute chu pan inla, kipakna siam ah lâmte lak ah pang dingin kipandok in.

⁵Samaria tânggamte ah chun, grep phu’kit in la tiu in; a phute ngei chun a ga chu ne’n au.

⁶“Hung un, LALPA I Pathian kiang un, Zion ah chia to hitiu,” ti ah Ephraim tânggam ah gâlvêngte kiko dawna ni ding chu, hung tung ngei ngei ding ahi tai.

⁷LALPA‘n zia gual hin a gen hi: Jakob â dingin kipakna Lâ ngai tak in sau inla, namtin lak ah lopi penpa pâkna’n kiko un; ama pâkcha’n, “Aw LALPA, la mipi, Israel um sunte chu hukdam in,” ti ah kiko in, puangjak un.

⁸Ngai un, mal gam ah kipat in hun pui ing ka tin, leimong gamla pen ah kipat in hun pui khawm in, a lak ua mitthûm leh kengbai, nauvop lai leh nauvei ah thuakgim lai, a leng un, mi tam tak chu, zia tak ah hin hung kit in au.

⁹Kap kawm in hung kit intiu in, thamuan kawm pek in hun pui kit ding ka hi. Luicha tui luanna munte hawsak ing ka tin, kisui lo in lamzang tak in chia in au; Israelte â ding ah pa ka hung hi’n, Ephraim hi ka cha upa pen ahi tak ziakin, ti in.

¹⁰Aw, nam tinte haw, LALPA thu hi a la ngai unla, gamla tak ah tuisuagiat pangjulte ah chun zia gual hin genjak un: “Israelte a la thejakpa ma ma chun, hun pui khawm kit ding ahi; belampu’n a belam honte a chintup gual in, chingtup zing ta’n a,” ti in.

¹¹LALPA‘n Jakob chu a tandok ta’n, amau sâng ah hatzaw te khut ah kipat in, a hukdok tai.

¹²Zion tângvûm ah hung in, Lâ ngai tak in hung sa ta’n au; a chung ua LALPA a phatna ziak leh, bu leh uain leh sathau ah te, bawngnote leh belamnote ziakin, a mai uh tai ma ma ta’n a; a hinnau chu tui in a chapno zing, huan tawhbang hi’ntin, thavai tak in um ta pua’n au.

¹³Ziaphat chuleh, nungakte lim tak in lâm ta’n tiu in, tichun, a têk a khang kipak ma ma ta’n au. A lusûnnau limna’n chansak in, thamuan ing ka tin, a lungngainau limna’n chansak ta’ng ka.

¹⁴Thiampute an tui pen in vâkva ing ka tin, ka mipite chu a kiningtin ziak un lungkim ta’n au, LALPA‘n a tii.

¹⁵Zia gual hin LALPA‘n a gen hi: Ramah khua husa het ahi’n, mithi sûnna aw leh kâ git ahi. Rakhel in a chate a kâ in, a chate a um tâk lo ziak un, thamuan zaw ding gual a hita puai, ti in.

¹⁶Zia gual hin LALPA‘n a gen hi: Kapdok talo dingin la aw chu kisûm inla, la mitthi le thiak-hul ta’n; la sep gim man chu mu ding la hi’ngâl a, LALPA‘n a tii; la mêlmate gam ah kipat in, hung kit ding a hiu.

¹⁷La chate chu amau gam lam ah hung kit ding a hiu; ziaziakchun, la tu’nung â dingin kinepna khat a um hi, LALPA‘n a tii.

¹⁸Ephraim thûmna chu ka henai: “Nang in lei thunun ta’n, la thununna chu ka la thuak ta’n; bawngno lâk nai lo tawhbang ka hi. Ei pui kit in, hung kit ing ka, nangma, LALPA chu ka Pathian la hi’ngâl a.

¹⁹Ka vâkmang zaw phatin, ka kisik ta’ngâl a; mudaw ka hi’phatin, ka malpi ka bêng a; ka khanglai nunsiatna ka put zing ziakin, ka mualpho in, ka lungngai hi,” ti in

²⁰Ephraim chu ka chapa dawi tak hilo a hem? Ka kipakna chu hilo a hem? Ama demna thu ka gen daw si’n leh, ama ka hezing hi. Ama ziakin ka lungthim a na ma ma hi; matheilo in a chung ah jaidaw ing ka, LALPA‘n a tii.

²¹Lamlian tepte’na leh lamkawk kisiam unla, la chianau lamthuampi leh, lamlian haw chu ngaitua phau in. Aw, nungak thiangtho Israel, hung kit inla, zia la khawpite lam hi zuan in hung kit ta’n.

²²Aw, chanu lungmawl, bang chan jawnvâk nalai ding la hem? Lei chung ah LALPA‘n thil thak a siam tai: numei in pawsal a humbit zaw ta mai hi.

²³Sepai honte LALPA, Israelte Pathian in zia gual hin a gen a: A gam lam ua ka pui kit phat leh, Judai gam leh a khawpiteu ah chun zia gual paukam hi kimang kit ta’n a: “Aw, diktatna mun, Aw tâng thiangtho, LALPA‘n hun maljawl hen,” ti in.

²⁴Chuleh, Judai gam leh a khawpi zosia chu lua dim sik sek hi’ntin; chuleh, loubawl mite leh a gan honteu tawh vâkvaite chule chêng khawm chiat ta’n au.

²⁵Thachawl zosia hitai ing ka tin, basam zosia le suhal ing ka.

²⁶Ziaphat chuleh, mipite chun, “Ka va ipmuu ah, ka hung khatlaw phat un ka halthak ma ma tau hi,” hun ti ta’n au.

²⁷Israel gam leh Judai gamte chu, mihing leh gancha ka hun dimsak kitna ding nite chu hung tung ngei ngei ding ahi tai, LALPA‘n a tii.

²⁸Amau botdok ding, susia ding, paimang ding leh sugenthei ding leh a chung ua siatna tunsak ding ah ka la ensui zing gual ah khan, tungding kit ding leh phudet kit dingin ensui zing ding ka hi, LALPA‘n a tii.

²⁹Ziaphat chuleh, “A nu leh pateu in grep thûk a neu ah, a chateu ha a ja ahi,” ti kit ngai ta pua’n au.

³⁰Grep thûk ne tapo a hau a zat gual in, mi tin a thil gilo bawl ziak un thi chiat ta’n au.

³¹Israel Inkuan leh Judai Inkuante tawh, ka kikâl ua thutiam thak ka siamna ding nite chu hung tung ngei ngei ding ahi tai, LALPA‘n a tii.

³²A pu leh pateu Aigupta gam ah kipat puidok ding ah, a khut ua ka kaibât lai khan, a pawsal uh himaleng le, ka thutiam a bawsiat gual uh kha hi talo ding ahi, LALPA‘n a tii.

³³Himaleh, ziazaw nung lam ah, Israel Inkuante kiang ah ka thutiam siam ding chu zia hi hi’n a, LALPA‘n a tii: A lunggil sung un ka dan koi ing ka tin, a lungchang un zikdaw piak ing ka; chuleh, a Pathian uh hi’ng ka tin, amau chule ka mipite hung hita’n au.

³⁴Chuleh, kuama’n, “LALPA chu he ta’n,” ti’n kihil ta pua’n au; a lian pen ah kipat a neu pen tiang in, a leng un ei hesuak ta ding ahi ngâl un, LALPA‘n a tii; chuleh, a khawlonau chu ngaidam in, a gitlonau chu hezing talo ding ka hi.

³⁵Sûn salvâk ding ah nisa, jan â ding ah thapi leh aksite, um ding dan zosia guanggalpa; tuisuagiat chokphûl ah, a tui kinawkte gitsak zung zung pa, a min Sepai honte LALPA chun, zia gual hin a gen hi:

³⁶Zia leilung dante hi ka mit mu ah sukbei ahi chun, Israel suan leh pâkte chule nam piting, ahi’nau sukbei hi mai ding ahi, LALPA‘n a tii.

³⁷Zia gual hin LALPA‘n a gen hi: Chung lam ah vante khi te’thei a hung hiu ah, lei kingakna nuailamte hile, suidaw sik sek thei ahi ding chun, a thilbawl zosiau ziakin, Israel suan leh pâk zosia chule, pâm pai ding ka hi, LALPA‘n a tii.

³⁸Ngai un, Hananel Insâng ah kipat, a Ning ah Kotpi umna tiang huap ding ah, khawpi kêkletna ding hun chu hung tung ngei ngei ding ahi tai, LALPA‘n a tii.

³⁹Chun, a gamgi te’na chu Gareb mual tiang ah kaisau pek in, Goah lam tiang huap in kithung in a.

⁴⁰Mithi kivuina leh ki’dak kihâlna vut paidawna phâijawl tiang leh, Kidron Wadi tiang ah lou mun haw tawh, sualam pang ah Sakol Kotpi kil lam tiang chu, LALPA â ding ah thiangtho hita’n a. Zia khawpi hi sukchip leh phel siat hi kit ta pua’n ah, ti in.