Read Vaiphei JEREMIAH 33 Bible Online

JEREMIAH 33 - Vaiphei bible

JEREMIAH 33

¹Jeremiah suangkul ah a um sung in, a kiang ah a vêl in LALPA‘n thu a hun gen a:

²Khawvel siamdokpa leh tundin ding dan guanggal ah tungdokpa LALPA, a min LALPA chun, zia gual hin a gen hi:

³Ei ko in, chutileh hun dawnhu ing ka tin, la het ngai lo thil thupi takte leh kisêlgute hun hil ding ka hi.

⁴LALPA, Israelte Pathian chun, chemjam ah gâldo’na nang ding ah kulbâng kisiam chim zo ta, zia khawpi ah chêngte leh Judai lengte Inkuan chungchâng thu zia gual hin a gen hi:

⁵Ka lungnatna leh thangtawmna ziak ah ka thâlup dingte hung do ah, mithiluang ah hi’dim dingin Kaldaite hung ding a hiu; a gitlonau ziakin zia khawpi hi ka nungngatsan ahi tai.

⁶Tungding kit in, sudam kit ding ka hi; sudam ing ka tin, hausakna kiningting tak leh bit tak in umsak kit ing ka.

⁷Judah vangphatna leh, Israel vangphatna chu tung ding kit ing ka tin, a dinmun masa gual un umsak kit ing ka.

⁸Ka chung ah thil gilo bawl ah a buakna zosiau sil thiang ing ka tin, ka chung ah a thil gilo bawl leh a helnau zosia ngaidam ta’ng ka.

⁹Chun, zia khawpi chêngte â ding ah thilpha ka hi’piak zosia hun he dingte ma-âng ah chun, zia khawpi hi kei â ding ah kipakna leh choihoina leh lopina hung hita’n a; zia khawpi â ding ah thilpha leh vangphatna ka piak ziakin, lau in kithing ta’n au.

¹⁰Zia gual hin LALPA‘n a gen hi: “Zia mun tak chu aw, mihing leh ganhing um lona ding in a pâmmai na e!” la ti’na mun, Judai gam ah khawpite leh Jerusalem khawlai dung, a sung ah chêng ding mihing leh gancha umlo’na mun ma ma ah chun,

¹¹kipak limna aw gi leh, mopa aw leh monu aw leh, LALPA In ah kipakna thilpiak lân ah Lâ sate chun: “Sepai honte LALPA kiang ah kipak thu gen un, LALPA chu a phatna ziak leh, a ngilneina’n kumtuang a dai ngâl a!” a ti’nau husate chu het in hung um kit ding ahi. Malai gual ah khan a vangphatnau chu, hun pia kit ding ka hi, LALPA‘n a tii.

¹²Sepai honte LALPA‘n zia gual hin a gen hi: Zia khawpi mun, gammâng, mihingte leh ganchate um lo’na chun, belam honte â ding ah gam pha leh a chawldamna mun uh hung um kit ta’n a.

¹³Tânggam khawpite, Shephelah, Negeb lam leh Benjamin gam ah te, Jerusalem khaw kîmvêl ah te leh Judai gam khawpite ah chun, gancha hon a simpa khut nuai ah chun gan hon chu kijawt duam duam kit ding a hiu, LALPA‘n a tii.

¹⁴Israelte Inkuan leh Judate Inkuan chung ah thil bawl ding ah ka tiamte guitunna ding nite chu hung tung ding ahi tai, LALPA‘n a tii.

¹⁵Zia nite chu a hung tun phat leh, David â dingin Bâk dik tak hun seldawsak ding ka hi; ama chun a gam ah thu tak leh dikna’n vaihawm in a.

¹⁶Ziaphat chuleh, Judah chu hukdam in um intin; tichun, Jerusalem chu bit tak in chêng ta’n a. Zia khawpi chu, “LALPA chu I diknau ahi,” ti min sak hita’n a.

¹⁷LALPA‘n zia gual hin a gen hi: David in Israel Inkuante lalchutpha chu ding mihing tasam ta pua’n tin,

¹⁸Ka âng ah hâlmang thillat leh thâi thillat lân ding leh, kithoina thillat lân ding Levite lak ah thiampu ding bangtik lai inle tasam ta pua’n au, ti in.

¹⁹Jeremiah kiang in LALPA‘n thu a hun gen a;

²⁰Zia gual hin LALPA‘n a hun gen kit a: La lak ua kua’nle sun leh jan ah ka thuthung bawl la bawsiat khâk ua, zia sun leh jan chu a hun dung zui ah a hung um theilo chun;

²¹zia gual ma chun, ka suak David kiang ah ka thuthung le bawsiat hita’n a; tichun, a lal chutpha kichu ding chapa nei pua’n tin; chuleh, ka nasêmtu Levite kiang ah ka thuthung chule bawsiat hi ta’n a.

²²Van lam ah thil umte te’sên lo ahi gual leh, tuisuagiat ah piaunêl simsên lo ahi gual ma’n, ka suakpa David leh ka nasêmtu Levite suan leh pâkte chule hi’pung ding ka hi, ti in.

²³Jeremiah kiang in LALPA‘n thu a hun gen a:

²⁴Zia mipite hin zia gual ah a la gen uh hi, a la limsak ngai lo la hiu em? “LALPA‘n a la têlchuam Inkuan panite hi a pâmpai tai,” ti in. Chuleh, ka mipite chule nam ti kham ding ting talo ah ngai in a la musit ta’n au.

²⁵Zia gual hin LALPA‘n a gen hi: Sûn leh Jan kiang ah thuthung a la siam lo hin, Van leh Lei kiang ah dan thu haw hi a la koilo hileng vang,

²⁶Jakob leh ka suak David suan leh pâkte chu pâmpai in, a lak ua khat chale Abraham, Isak leh Jakob suante chung ah vaihawm ding in a la koi lo ma ding hivêng aw. Ahi’n la, amau vangphatna pia tungding kit in, lainat ding ka hi’ngâl a, ti in.