Read Vaiphei JEREMIAH 35 Bible Online

JEREMIAH 35 - Vaiphei bible

JEREMIAH 35

¹Judai gam ah Josiah chapa Jehoiakim leng ah a pan lai in, Jeremiah kiang in LALPA‘n zia gual hin thu a hun gen a:

²Rekabte In ah vachia in la va kiholimpi in; chuleh, LALPA In ah pindante lak ah khat pen pen ah hun puilût in; ziaphat chuleh, a dawn ding un uain le pia’n, a hun ti’n.

³Tichun, Habazziniah chapa Jeremiah chapa Jaazaniah tawh, a suapi pawsalte leh a chapate zosia tawh, Rekabte Inkuan zosia chu ka pui ta’n.

⁴Amau chu LALPA In ah ka hun pui ah, Pathian mi Igdaliah chapa Hanan pindan sung, milian leh lalte kiang nai chin ah um, a huang sung vêngpa Shallum chapa Maaseiah pindan chung lam ah chun ka hun pui lût a.

⁵Ziaphatchun, Rekabte âng ah chun tuibêl uain ah dim tawh khawnle ka lui piak ah; a kiang un, “Uain hi dawn un,” ti’n ka gen a.

⁶Himaleh, amau in, “Uain ka dawn ngai puau hi, ka puu Rekab chapa Jonadab in zia gual hin thu ei piak ahi: ‘Uain la dawn ngai lo diu ahi. Nang hilechin, la chateu hileule uain la dawn ngailo diu ahi;

⁷inle la sak lo diu, thâile la chîn lo diu, grep le la phû lo diu; chuleh, grep gui khat ziang le la nei lo diu ahi; la chênnau gam sung ah sawt tak la chêntheina ding un, la damsung siau puanbûk ah la chên diu ahi,’ ti in.

⁸Ka pu bul uh Rekab chapa Jonadab in thu ei piak zosia chu zui in, kei uh hi’n, ka jiteu, ka chapateu leh ka chanuteu inle ka dam sung siau ah uain him him dawn lo ding ka tiu a;

⁹chuleh, chênna ding Inle sak lo ding ka tiu ahi. Grep huan hihen la, lou hileh, thâichi him himle ka nei puau a;

¹⁰ka pu bul uh Jonadab in thu ei piak zosia chu zui ah bawl in, puanbûk ngen in ka chêng tau ahi.

¹¹Himaleh, Babulon Lengpa Nebukadrezar a hung ah, gam pumpi a hung do lai khan, ‘Kaldai sepaite leh Aramte sepai haw ka lau man un, hung unla, Jerusalem ah chia hitiu,’ ka tiu a. Ziaziakchun, Jerusalem khua sung ah chêng thei bep ka hiu,” ti in.

¹²Ziaphatchun, LALPA‘n Jeremiah kiang ah chun,

¹³Sepai honte LALPA‘n zia gual hin a gen hi, ti’n la: Judai gam ah mipite leh Jerusalem ah chêngte kiang in chiau inla, a kiang un: LALPA‘n, bangma zil thei lo leh ka thute hi mang thei him him lo la hiu em? vatiu in.

¹⁴Rekab chapa Jonadab in a suan leh pâkte him him in uain dawn lo ding ti thu a la piak chu a la mang tau ah; a pu bul uh thupiak chu a mat ziak un, tu’ni tiang hinle kuama uain dawn a um nai puau hi. Keima’n gunchu tak in la kiang un thu ka gen zing ah; maleh, ka thu la ngai puau in;

¹⁵ka suak jawlneite kha la kiang un gunchu tak ah zia gual ah hi thu hung gen dingin ka hun sawl ta’n: “Mi tin in la thilbawl uh phalo haisan in hung kihei kit unla, la thil bawlkhial uh bawl pha kit unla, la pu leh pateu leh nanghaw chênna ding ah ka la piakna gam sung ah hin, la chên zing theina ding un, pathian dangte lam ah kihei mangsan in a nau sêm kiu in,” ti in. Himaleh, ka thugen ngaisak lo in, ka thule la mang puau hi.

¹⁶Rekab chapa Jonadab suan leh pakte’n vang a pubul un thu a la piak chu a mang un, zia mipite hin vang ka thu a mang puau hi.

¹⁷A kiang ua ka thu gen a ngai lo ziak leh, ka kona ei dawnhu nop lo ziak un, Judai gam leh Jerusalem khua chêng zosiate chung ah thil phalo, a chung ua tung ding ah ka la gensa chu a chung un hun tunsak ding ka hi.

¹⁸Himaleh, Rekabte sunghaw kiang in Jeremiah in zia gual hin a la gen a: Sepai honte LALPA, Israelte Pathian in zia gual hin a hun gen hi: La pu bul uh Jonadab thupiak leh a dan thuthung zosia vopdet ah, a hun thupiak la zui ziak un;

¹⁹sepai honte LALPA, Israelte Pathian chun zia gual hin a gen hi: Rekab chapa Jonadab chun ka âng ah ding di suan leh pâk, bangmatik in tasam pua’n au, ti in.