Read Vaiphei JEREMIAH 36 Bible Online

JEREMIAH 36 - Vaiphei bible

JEREMIAH 36

¹Judai gam ah Josiah chapa, Lengpa Jehoiakim lal kum li’na’n; Jeremiah kiang in LALPA‘n zia gual hin a hun gen a:

²Savun lekhabu zial la’n la, Josiah lal ah kipat tu’ni tiang ah, Israel leh Judah leh nam dang zosia kãl ah, la kiang ah ka thugen zosia kha zik lut tiam in.

³Judah Inkuante’n a chung ua thil phalo ka tunsak dingte chu a het phat ua leh, mi tin in a thil phalo bawlteu haisan ah, a thiammawnau leh a gitlona zosiau ka ngaidam theina dingin, ti in.

⁴Ziaphatchun, Jeremiah in Neriah chapa Barukh chu a ko ah, Barukh inle LALPA thugen zosia, Jeremiah in a gensawn gual tak in, savun lekhabu zial ah chun a zik lut suak tai.

⁵Jeremiah in Barukh chu thu a pia, a kiang in, “LALPA In ah ka lut phal a hita pua’n;

⁶tichun, nang ngen in chia inla, ka kam ah ka gen dungzui ah savun lekhabu zial ah LALPA thugen la zikdaw zosia kha, LALPA In ah mipite anngawl ni leh a het ding un la va simdaw ding ahi. Chuleh, Judai gam ah mipi, a khuau ah kipat hung pawtdok zosia’n a het ding unle la simdaw ding ahi.

⁷LALPA kiang ah a hung pauchap ua, a thil phalo bawlteu a hun kiheimang san khâk ua leh, zia mipite chung ah LALPA lungnatna leh hachangthakna hi a huaisia ma ma ngal a,” ti in.

⁸Tichun, Neriah chapa Barukh chun jawlnei Jeremiah in thu a piak gual tak in, LALPA In ah chun LALPA thugen savun lekhabu zial ah kizik chu a vasimdok tai.

⁹Judai gam ah Lengpa, Josiah chapa Leng Jehoiakim lal kum ngana, tha kua a ti’n ni chun, Jerusalem ah mi zosia tawh, Judai gam khawpi kipat Jerusalem ah hung khawm zosia chun LALPA âng ah anngawl ding thu a puang tau a.

¹⁰Ziaphatchun, mipi zosia het dingin, LALPA In sung ah, lekha zikpa Shaphan chapa Gemariah pindan, LALPA In lutna Kotpi Thak, huang chungnung ah chun, Barukh in Jeremiah thugen zosia, savun lekhabu zial ah kizikte chu a hun simdok tai.

¹¹Chun, Gemariah chapa Mikaiah, Shaphan tupa chun lekhabu zial ah LALPA thugen zosia chu a het phat in,

¹²lengpa In ah a chia suk ah, lekha zikpa pindan in a lut ah; zia tak ah chun milian leh lal zosia chu a la kichukhawm un; lekha zikte Elishama, Shemaiah chapa Delaiah, Akhbor chapa Elnathan, Shaphan chapa Gemariah, Hananiah chapa Zedekiah leh a milian leh lal zosiau le a kim un.

¹³Barukh in lekhabu zial ah kipat mipite het ding ah a sim lai ah a thu het zosia chu, Mikaiah in a leng in a hil tai.

¹⁴Ziaphatchun, milian leh lalte chun, Nethaniah chapa Jehudi, Kushi chapa Shelemiah tupa chu Barukh kiang ah, “Mipite het ding ah la lekhabu zial sim kha hun la’n la, hung tiam in,” ti ah vagen dingin a sawl tau a. Tichun, Neriah chapa Barukh in lekhabu zial chu hun chawi in a kiang lam un a hung a.

¹⁵Amau in a kiang in, “Kichu’n la, zia chu ka het ding un hun sim tiam in,” a tiu a. Tichun, Barukh inle a het ding un a simdaw piak tai.

¹⁶Zia thute zosia chu a het phat un, gîng lep lup ah ki-entua in, Barukh kiang in, “Zia ka thu het zosiau hi lengpa kiang ah ka hil tei tei diu ahi,” a tiu a.

¹⁷Ziaphatchun, Barukh kiang in, “Zia thu zosia hi la bangti zikdaw a hem? A gen tiam ah la zik a hem?” ti’n a dong tau a.

¹⁸Barukh in a dawnhu a, “Zia thu zosia hi ama’n ka kiang in a gen ah, keima’n lekhabu zial ah lekhatui ah ka zikdaw mai ahi,” ti’n a dawnhu a.

¹⁹Ziaphatchun, milian leh lalte chun Barukh kiang in, “Chia inla, Jeremiah tawh vakisêl mang un; chuleh, la kisêlnau chu kuama hiatsak kiu in,” a tiu a.

²⁰Lekhabu zikpa Elishama pindan ah lekhabu zial chu nusia in, lengpa vaihawmna In ah a chiau ah, lengpa kiang in zia thu zosia chu a vahil tau a.

²¹Ziaphatchun, lengpa’n lekhabu zial vala dingin Jehudi chu a sawl a; ama’nle lekha zikpa Elishama pindan ah um chu a vala, lengpa kiang ah ding milian leh lalte leh lengpa het ding in a simtha ta’n.

²²Zia hun ah chun lengpa a phalbi In ah kichu ahi’n, (tha kuana ahi ta’n,) mei le a âng ah chun a kitik a.

²³Jehudi in gual thum a hem, gual li a hem vêl bep a sim zaw phat in, lengpa’n chemcha’n a ât tel ah, a âng ah meikuang lak ah chun a sep lut ah, zia lekhabu zial chu a leng in a hâl tum tai.

²⁴Himaleh, lengpa leh a suakte lak ah khat cha’nle lauthawngna nei ah a puan uh bottêk a um puau hi.

²⁵Elnathan, Delaiah leh Gemariah te hin lekhabu zial chu hâl tum lo dingin lengpa kiang ah chun don tun tun maleu, a ngaisak puai.

²⁶Chuleh, lengpa chun a chapa Jerahmeel leh Azriel chapa Seraiah tawh, Abdeel chapa Shelemaiah te chu, lekha zikpa Barukh tawh jawlnei Jeremiah man dingin thu a pia. Himaleh, LALPA‘n amau teni chu a sêlgu tai.

²⁷Jeremiah in a gen dungzui ah Barukh in a zikdawna lekhabu zial, lengpa’n a hâl tum zaw nung in, Jeremiah kiang in LALPA‘n thu a hun gen kit a:

²⁸Lekhabu zial dang pakhat la kit inla, Judai gam ah Lengpa Jehoiakim in a la hâl tum, lekhabu zial ah thu umte ma ma kha zikdok kit in.

²⁹Chuleh, Judai gam ah Lengpa Jehoiakim chungchâng thu zia gual hin gen in: LALPA‘n zia gual hin a gen hi: Babulon lengpa hung intin, zia gam hi hisia’n, a sung ah mihing hileh, ganchate a leng un suchigap ding ahi ti ah lekhabu kizik chu hâltum ngam la hi maw?

³⁰Ziaziakchun, Judai gam ah Lengpa Jehoiakim chungchâng thu ah LALPA‘n zia gual hin a gen hi: David lalchutpha kitung ding mi khat chale nei pua’n tin; chuleh, a luang chule vui lo pai lo ah sun nisa’n kang in, dâi janchâm in chap in a.

³¹A khawlo’na ziak un ama tawh, a suan leh pâkte tawh, a suakte chu gawt ding ka hi. Amau tawh, Jerusalem ah chêng zosia tawh, Judai gam ah mipi zosia’n amau ka vavauna a ngaisak lo ziak un, thil phalo a chung un tung zaw ta’n ah, ti’n a gen tai.

³²Ziaphatchun, Jeremiah in lekhabu zial dang khat a hun la’n, lekhazikpa Neriah chapa Barukh kiang in a hun pia, Judai gam ah Lengpa Jehoiakim in lekhabu zial a hâl tum, Jeremiah in a thute a gen gual gual in Barukh inle a thumal zosia chu a zikdok kit a; thumal kibang tampi le a belap hi.