Read Vaiphei JEREMIAH 39 Bible Online

JEREMIAH 39 - Vaiphei bible

JEREMIAH 39

¹Judai gam ah Lengpa Zedekiah lal kum kua’na, tha sawmna chun, Babulon Lengpa Nebukadrezar in a sepai zosia Jerusalem do dingin a hun pui ah, a ûm chimit tau a;

²Zedekiah lal kum, sawm leh khatna a tha li’na, a ni kua tin ni chun, khawpi kulbâng chu sukvan in a hung um ta’n.

³Jerusalem a lâk zaw phat un , Babulon lengpa milian leh lal zosia chu a hung un, Kotpi lailung ah chun a hung kichuu ah, ziate lak ah chun: Nergal-sharezer, Samgar-nebo, Rabsaris ah pang Sarsekim, Rab-mag ah pang Nergal-sharezer tawh, Babulon lengpa milian leh lal zosia tawh a hiu a.

⁴Judai gam ah Lengpa Zedekiah tawh a sepai zosia’n a mu phât un, lengpa huan lam ah a bâng thuani kikâl ah kigel gu’n, jan kâl in Arabah lam in a la tai mang tau a.

⁵Himaleh, Kaldai sepaite chun a delzui tau ah, Jeriko phâijawl ah Zedekiah a delpha tau a; a hun mat phat un Hamath gam ah Riblah mun ah um Babulon Lengpa Nebukadrezar kiang in a hun pui tung tau a; a chungchâng thu ding a gen piak ngal tai.

⁶Babulon lengpa chun Riblah mun ah chun Zedekiah mit mu ngei ah chun a chate chu a thâlup piak ta’n; chuleh, Babulon lengpa chun Judai gam ah milian leh lal zosia chule a thatlum sik sek a.

⁷Zedekiah mit teni a kheldaw piak ah, Babulon lam ah pui dingin thîkkhau in a hên tai.

⁸Kaldaite chun lengpa In leh mipite In haw chu mei ah hâl in, Jerusalem kulbâng chu a suchim dik dek tau a.

⁹Ziaphatchun, sepai hotu lian Nebuzaradan in khawpi sung ah mipi nutsia ah um zosia tawh, ama kiang zuante tawh, a la um nalai mipi zosia chu Babulon lam ah saltâng dingin a pui mang tai.

¹⁰Sepai hotulian Nebuzaradan chun bangma nei lo, migenthei khen khat chu Judai gam in a nusia ah, grep huan ding leh a lou mun dingteu chule a pia’i.

¹¹Babulon Lengpa Nebukadrezar in sepai hotu lian Nebuzaradan kiang in, Jeremiah chungchâng in zia gual hin thu a pia’n:

¹²“Pui inla, pha tak in enkol inla, a chung ah bangma a phalo bawl kin; ama’n a hun dot gual gual in bawl piak ziang in,” ti in.

¹³Tichun, sepai hotu lian Nebuzaradan tawh, Rabsaris, Nebushazban tawh, Rab-mag ah pang Nergal-sharezer tawh, Babulon lengpa milian leh lal zosia chun mi a sawl tau a,

¹⁴sepaite huang sung ah Jeremiah um chu a vapui dawsak tau a; ama chu Ahikam chapa Shaphan tupa Gedaliah In lam ah a pui dingin a pedok tau a. Tichun, a chipite lak in a um den tai.

¹⁵Gâlvêngte huang sung ah a tân lai in, Jeremiah kiang in LALPA‘n thu a hun gen a:

¹⁶Chia inla, Ethiopia mi Ebedmelek kiang in: Israelte Pathian, Sepai honte LALPA chun zia gual hin a gen hi vati’n: Zia khawpi chung ah thilpha hilo, a sia bawl ding ti ah ka gensa zosia chu hi, buting ngei ngei ding ka hi; zia guitunna chu nangma mit ngei in mu ding la hi.

¹⁷Himaleh, ziaphat chuleh, hun hukdok ing ka tin, la tizat ma ma te khut in hun pelut lo ding ka hi, LALPA‘n a tii.

¹⁸Matheilo in hun hukdok tei ding ka hiziak in, chemjam ah thâlup in um pua’n la; keima lei ginchâk ziakin la hinna chu gâl lâk ah taidok gual in um ta’n la, LALPA‘n a tii, ti in.