Read Vaiphei JEREMIAH 4 Bible Online

JEREMIAH 4 - Vaiphei bible

JEREMIAH 4

¹LALPA‘n a gen a: Aw Israel, la hung kile’kit ah, keima lam ah la hung kit ua, la ki’dak umnau ka mu’na kipat la lîpthâk ua, la mawk vak tâk lo ua,

²“LALPA min in!” ti ah kitiam ngam ah, thutak ah vaihawmna dik leh, umchan dik tak la zui uh chun, nam tinte chu keima maljawl ah um in, ei kisuanpi ta’n au.

³Judai gam ah mipite leh, Jerusalem khua chêng zosiate kiang in, LALPA‘n zia gual hin thu a gen ngal a: La pâmtûl lei uh chu khên nawn unla, ling lak in thâichi chîng kiu in.

⁴Aw, Judai gam ah mipite leh, Jerusalem khua chêng zosiate haw, LALPA â dingin kikoi thiang unla, la lungthim zek uh tan un; achutiloleh la nunchan phat lonau ziakin, kuama’n a phelmit lo dingin, ka lungnatna meikuang gual ah, hung kuangdok in hun kâng tum ding ahi.

⁵Judai gam ah genjak unla, Jerusalem ah chun zia gual hin tângsam un: A gam pumpi’n pengkul mût unla, ngai tak ah kiko in zia gual hin gen un: “Hung khawm unla, khawpi kuldet neite ah chun lut hitiu!”

⁶Mallam ah kipat siatna hun tunsak ding ka hiziak in, Zion zotna lam hil unla, bitna ding hawl in tai unla, muang kiu in.

⁷La gam uh subuai ding leh, la khawpiteu kuama chêng talo ding ah, susia dim dem dingin, namtin hise ding sakeibaknei chu, nângbuk ah kipat in a hung pawtdok in, a umna’ kipat in a hung kipandok tai.

⁸“LALPA lungnatna huaisia tak chu, ei haw ah kipat heimang ahi puai, ti’n kap ah sûn in, saidip puan sil tau in”.

⁹Zia ni phat chuleh, leng leh lalte hangsanna bei ta’n tin, thiampute mak sakna’n dim ta’n tin uh, jawlneite le lungkham ta’n au, LALPA‘n a tii.

¹⁰Ziaphatchun, keima’n, “Katei, LALPA PATHIAN, zia mipite tawh Jerusalem khawpi hi, la thêm zo na lawm lawm e! Chemjam tawh a gawl uh suktua ahi tiang unle, a kiang un bangma ti pua’n lau, ti’n la thamuan nalai ah,” ka tia.

¹¹Ziaphat chuleh, zia mipite leh, Jerusalem kiang in zia thu hi gen piak hita’n a: Gamkeu lam ah tângsâng ah kipat in, ka mipite genthei tak ah umte mût vot ding leh, mut thiang ding hilo in, keima ah kipat in hui lum tak hung hâng ding ahi.

¹²A thok zaw lo ding khop ua hât hi’n a. Amau do ah a chungthuu vaihawm ah, thugenpa hi keima ka hi.

¹³En un! Sûmpi gual in a hung kuandok hi, a sakol kângtalaiteu chule chîmpei a bang hi; a sakolteu chule mupi sâng in, a chan-gang zaw’n, I chung uh a gik na e! Suksiat I hi ta’ngal un.

¹⁴Hukdam la hitheina dingin, Aw Jerusalem, la lungthim ah nunsiatna zosia chu, silthiang in. La ngaituana phalo chu bang chan, la sung ah châmsak nalai ding la hem?

¹⁵Dan ah kipat in aw chun a hun puang a, Ephraim tâng ah kipat in siatna thu a tângkopiu hi.

¹⁶Nam tinte kiang inle, “A hung tung tau,” ti’n hil unla, Jerusalem kiang in, “Hisia dingte chu gamla tak ah kipat in a hung un, Judai gam ah khawpi do’na thu’n a kiho ui.

¹⁷Keima chung ah a hel tâk ziak un, lou hongte’n a ûm kîmvêl gual un, a ûm kîmvêl zo tau hi, LALPA‘n a tii.

¹⁸La nunchan leh la thilbawl dungzui un, zia thilte hi la chung ua tung ahi; zia chu la siatnau ahi tai. A thok hak nalawm lawm e! La lungchang a sunthil hial ta hi,” ti in.

¹⁹Ka lung a gimna e, ka lung a gimna e! Ka lungthim a na ta luai! Aw, ka lung a gimna e! Ka lungchang a phu dûp dûp hi; ka thip hiat hiat thei puai; pengkul gi leh galdo husa ka he tai.

²⁰Siatna a thua thua in a hung tung a, gam pumpi chu suksiat ahi tai. Ka puanbûkte chu phutlo halo ah suksiat ahi’n, ka puanjakte chule mitphet kâl sung ah, suksiat a hi zo tai.

²¹Bang chan a hem kido’na puanjakte chu ka mu ah, pengkul gitte chu ka het ding?

²²“Ka mipite chu a ngol ziak un, ei he’pha pua’n au; chapang mawl a hiu ah, hiatthiamna neilote a hiu; thil phalo bawl dan a thiam ma mau ah, thilpha bawl dan vang a hepuau hi”.

²³Lei chu ka vak en ah, ngaitia suksiat ah um leh a hawm ahi tai; vante le ka et leh, vakna a nei ta puau hi.

²⁴Tângte ka vak et leh, ngai tia, a kithing un; mualte zosia le a kilok lumlet zo tau hi.

²⁵Ka vak et leh, ngai tia, kuama a um ta puau ah, van laijawl ah vacha zosia le a leng mang zo tau hi.

²⁶Ka vak et leh, ngai tia, gam phatnate chu gamkeu a la suak zo ta’n, a khawpi zosia chule, LALPA âng ah chun, a lungnatna ziak ah chun suksiat a hi zo tai.

²⁷LALPA‘n zia gual hin a la gen tai: Gam pumpi chu suksiat in hung um ta’n tin; himaleh, hibei suak ziang nai tadi pua’ng ka.

²⁸Ziaziakchun, lei in sûn intin, chung ah vante khi le thimtha ta’n au. Ka la guanggalsa chu, ka la gen ta’ngal a; ka gensa chu hei danglam ta pua’ng ka tin, thul diak pua’ng ka.

²⁹Sakol chungchuang mite husa leh, thal kap mite ziakin khawpi zosia, jamsia’n au; gammâng ah tai lut intiu in, suangpi lak in kal to in au; khawpi zosia nutsia in a um tau ah, a sung ah kuama a chêng ta puau hi.

³⁰Aw nutsia ah um nang la, bang ding ah puan sandup ah kivan nalai ah, sana kijem nalai sêt ah, la mit lian tak ah jem nalai la hem? A thawn ah jem mai mai la hi. La ngaijawngte’n a hun simmawu hi, tha gua’n a hun hawl ui!

³¹Numei naunei gual ah gim aw ka hia’n, a chatil nei ding gual ah thuakgim aw gi gual ah, Zion chanu halâ tak ah a khut van ah kiko chun, “Ka chung a gik na lawm lawm e! Ei that dingte âng ah chun ka basam tai,” ti aw chu ka he ta ahi.