Read Vaiphei JEREMIAH 41 Bible Online

JEREMIAH 41 - Vaiphei bible

JEREMIAH 41

¹A tha sagi’na chun, lengpa Inkuan sung ah mi, Elishama tupa, Nethaniah chapa Ishmael, lengpa sepai hotute lak ah pakhat chu, Mizpah ah, Ahikam chapa Gedaliah kiang in pawsal sawmkhat tawh a hung un. Mizpah ah a leng ua an a nêk khawm lai tak un,

²Babulon Lengpa’n, a gam pumpi vaihawm ding ah Gedaliah a guat chu a lungawi lo ziak un, Nethaniah chapa Ishmael tawh a lawite pawsal sawmkhat chu a hung kipan un, Shaphan tupa, Ahikam chapa Gedaliah chu chemjam in a sat un, a that tau a.

³Ishmael chun, Mizpah khua Gedaliah kiang ah Juda mi um zosia tawh, Kaldai sepai, zia tak ah um zosia chule a that sik sek tai.

⁴Gedaliah a tha ni jing ah chun, kuama’n le zia thu chu a hetdaw masang un;

⁵Shekhem leh Shilloh leh Samaria ah kipat in, pawsal sawmgiat, a khamul uh mêtnâm ah, a puansilteu kêk diak duak pum in, amaule ki-âtliam nêt nût in, thâiga thillat ding tawh gimtuite chawi in, LALPA tempul ah lân dingin a hung ua.

⁶Nethaniah chapa Ishmael chu amau lamtua dingin, kap kawm kawm in Mizpah ah kipat in a hung pawtdok a. Amau lawi tawh a kituak phat un, a kiang un, “Ahikam chapa Gedaliah kiang ah hung un,” ti’n a gen a.

⁷Khawpi lailung a tun phat un, Nethaniah chapa Ishmael tawh, a kiang ah pawsal hon chun a bân in a that un, kuak sung in a pai lut tau a.

⁸Himaleh, a lak ua pawsal sawmkhat chu, Ishmael kiang in, “Keihaw vang ei that kin, kei un gamlak ah gehu bu, barli bu, sathau leh khuaizu ka kisêlgûk chiat ui,” a tiu a. Tichun, amau chu a hawi ah, a lawiteu lak ah chun a that khawm ta puai.

⁹Ishmael in, a mi thalup zosia a pailutna kawkhûk chu, kuak lian tak, Israelte Lengpa Baasha a do-na ding ah Lengpa Asa in a la chawkuak ahi; Nethaniah chapa Ishmael in, zia kawkhûk sung chu a mi thalup zosia a sia dim tai.

¹⁰Ziaphatchun, Ishmael in Mizpah ah um nalai sia, lengpa chanaute leh Mizpah ah um nalai, sepai hotu lian Nebuzaradan in Ahikam chapa Gedaliah umpi ding ah a koi cheng chu sal in a man ta’n. Nethaniah chapa Ishmael chun a leng ua sal ah man in, Ammon gam lam zuan in a pui tai.

¹¹Himaleh, Kareah chapa Johanan tawh, a kiang ah sepai hotu lian zosia’n, Nethaniah chapa Ishmael in a tualtha’na thu chu a la het phat un,

¹²Nethaniah chapa Ishmael do dingin a sepai zosiau pui in a kuan tau a. Gibeon gam ah Tuikul Lian kiang ah chun a delpha tau a.

¹³Ishmael kiang ah mipi um zosia’n, Kareah chapa Johanan tawh, a kiang ah sepai hotulian um zosia chu a mu phât un, a kipak ma mau a.

¹⁴Tichun, Ishmael in Mizpah ah kipat sal ah a mat zosia chu kinunghei in, Kareah chapa Johanan lam zuan in a chia kit zo tau a.

¹⁵Himaleh, Nethaniah chapa Ishmael chu a lawite mi pagiat tawh, Johanan khut ah kipat in a suakcha tau a; tichun, Ammonte kiang lam in a chia tau hi.

¹⁶Ziaphatchun, Kareah chapa Johanan tawh, a kiang ah sepai hotute chun, Nethaniah chapa Ishmael in Mizpah khua Ahikam chapa Gedaliah a thalup nung ah a salmat, sepaite, numeite, chapangte leh mi kigette chu Gibeon ah kipat in a kile’pui kit tai.

¹⁷Chun, a kipandok tau ah, Aigupta lam ah chia gua’n, Beth-lehem kiang ah Geruth Chimham mun ah chun a kichawl un;

¹⁸Kaldaite a lau ziak un; Nethaniah chapa Ishmael chun, Ahikam chapa Gedaliah chu a la that ta’ngal a; ama chu Babulon lengpa’n a gam pumpi chung ah vaihawm ding ah a la pansak ziak ahi.