Read Vaiphei JEREMIAH 42 Bible Online

JEREMIAH 42 - Vaiphei bible

JEREMIAH 42

¹Ziaphatchun, sepai hotulian zosia, Kareah chapa Johanan tawh, Hoshaiah chapa Azariah tawh, mipi zosia lak ah a neu pen ah kipat a lian pen tiang in,

²jawlnei Jeremiah a hun nai un, a kiang in, “Lungsiat ah ka dotnau ei ngaithâk piak dingin, la phatna sua inla, LALPA la Pathian kiang ah, a um nalai sunte â ding hin ei dot piak in. La mit ngei ah la mu gual in, mi tam tak lak ah tawmcha bep nutsia ah um ka hitau hi.

³LALPA, la Pathian chun khoilam zuan ah chia ding ka hiu em, bang bawl ding ka hitau em, ti ei hil hen,” a hung tiu a.

⁴Jawlnei Jeremiah chun, a kiang un, “A pha ngut hi, la dot dungzui un LALPA la Pathian kiang un pauchap ing ka tin, banghitaleh, LALPA‘n ei dawnhu gual gual in la kiang un hun hil ing ka; nanghaw kiang ah bangmacha îmgu pua’ng ka,” ti’n a dawnhu tai.

⁵Amau inle Jeremiah kiang in, “LALPA, la Pathian in ka bawl ding ua nangma kiang ah a hun piak dungzui tak ah, ka bawl lo ngei ngei uh chun, LALPA chu ei hetpi dik leh ginum hi mai hen la.

⁶LALPA ka Pathian thuu ka mat ua, kei uh â ding ah thilpha a hitheina dingin, LALPA ka Pathian uh aw he ding ah ka hun sawlnau thu chu, a pha hi’n, a sia hileh mang him him ing kau,” ti’n a dawnhu tau a.

⁷Ni sawm a ti’n zaw in, Jeremiah kiang ah LALPA‘n thu a hun gen a.

⁸Ziaphatchun, Kareah chapa Johanan tawh a kiang ah sepai hotu lian um zosia tawh, mipi zosia a lian pen ah kipat a neu pen tiang in a ko khawm ta’n;

⁹a kiang un, “LALPA, Israelte Pathian, a kiang ah la thasâng ua thil don ding ah lei sawlnapau chun, zia gual hin a gen hi,” a ti’n:

¹⁰Zia gam ah hi la um den hiat hiat ua leh, hun tungding ing ka tin, hun suchim lo ding ka hi; hun phu ing ka tin, hun botdok lo ding ka hi; la chung ua thil phalo ka hun tunsakte haw hi, ka kisik kit ta’ngal a.

¹¹Babulon lengpa la la tizat gual uh khan lau ta kiu inla, lau him him kiu in, LALPA‘n a tii; ama khut ah kipat hun hukdok ah, hun hukdam dingin ka hun umpi zing la hi’ngal un.

¹²Ja’ngaina hun pia’ng ka tin; tichun, la chung un ja’ngai intin; chuleh, nangmau gam ma ma ah chun hun tungding kit ding ahi.

¹³Himaleh, “Zia gam ah hin um pua’ng kau,” ti ah, LALPA la Pathian thuu la mat nop lo ua,

¹⁴“Ahipuai, Aigupta gam ah chia kit zaw phot ing kau, zia chun kidona he’pha talo in, pengkul mût git le he’pha talo in, gilkial, dangchâk ah thûm git het lona mun ah vaum mai ing kau,” la tiu chun;

¹⁵ziaphat chuleh, Aw Judai gam ah nutsia ah um nalai sunte haw, LALPA thu gen a la ngaitha tiam un: Sepai honte LALPA, Israelte Pathian chun zia gual hin a gen ngal a: Aigupta gam ah chia ah, vachên den gaw tei tei la hiu chun,

¹⁶ziaphat chuleh, la chemjam tizat uh khan, Aigupta gam lam ah chun a la makhel in ah; chuleh, kial tuak ding la huphul pen uh chun, Aigupta gam ah hun delzui in ah; chuleh, zia tak ah chun vathiden ta’n lau.

¹⁷Aigupta gam ah chêng ding ah vachia gaw tei tei zosia chu, chemjam ah te, kial ah te leh natpi ah ten thi’n au; a chung ua siatna ka tunsak dingte lak ah kipat in kuama suakcha pua’n au.

¹⁸Sepai honte LALPA, Israelte Pathian chun zia gual hin a gen ngal a: Jerusalem khua chêngte chung ah ka lungnatna butthâk ahi gual ma’n, Aigupta gam zuan ah la chia suk phat ua leh, ka lungnatna chu la chung un buntha ngal ding ka hi. Mite luaksuak leh tizat, kamsia tincheng bânna leh nuizatbûk hung hita’n lau. Chuleh, zia mun hi mu kit ta him him pua’n lau.

¹⁹LALPA‘n la kiang un, Aw Judai gam ah nutsia ah um sunte haw, Aigupta gam ah chia kiu in. Tu’ni ka hun hillawkna thu hi hethiam unla,

²⁰la thi law’na hial ding un bawl khial kha’n lau. Nang un ka kiang ah, “LALPA I Pathian kiang un ei dot piak inla, LALPA I Pathian un a gen tapo chu ei hil inla, bawl ngal ing kau,” ti’n LALPA la Pathian kiang un lei sawl ta’ngal un.

²¹Tichun, tu’ni hin la kiang un ka hun tâklang ta’n; himaleh, la kiang ua ka gen ding ah ei sawlna thute chu ngai lo in, LALPA la Pathian awu chu bangma’n la mang nuam ta puau hi.

²²Zia hi pha tak cha’n he tau in, chia ah chên den la nop tun tunnau gam ah chun, chemjam, kial leh natpite in thi ngei ngei ding la hiu, ti’n a gen tai.