Read Vaiphei JEREMIAH 43 Bible Online

JEREMIAH 43 - Vaiphei bible

JEREMIAH 43

¹LALPA a Pathian un, a kiang ua gen ding ah a sawlna dungzui ah, LALPA a Pathian uh thute chu Jeremiah in mipite kiang ah a gen zaw phatin,

²Hoshaiah chapa Azariah tawh, Kareah chapa Johanan tawh, amau gual tho ah mi khawksak bei zosia chun Jeremiah kiang in, “Zuau gen la hi. LALPA I Pathian un ka kiang un, ‘Aigupta gam ah chêng dingin chia kiu in,’ ti dingin a hun sawl talojen hi;

³Kaldai mite khut ah matsak ah ka um ua, ei thalup theina ding uh leh, Babulon lam ah sal ah ei pui theina ding un, Neriah chapa Barukh in keihaw do ding ah a hun chaw’phul mai mai la hi,” a hung tiu a.

⁴Tichun, Kareah chapa Johanan leh, sepai pawl zosia ah hotute leh mipi zosia chun, Judai gam ah chêngden ding ti LALPA thugen chu a mang nuam ta puau a.

⁵Himaleh, Kareah chapa Johanan tawh sepai pawl zosia ah hotute chun, Judai gam ah nutsia ah um, Judai gam ah chênden gaw zosia tawh, namtin lak ah thejak ah a umnau ah kipat in a pui khawm tau a;

⁶numei, pawsal, chapang, lal chanute leh sepai hotulian Nebuzaradan in, Shaphan tupa Ahikam chapa Gedaliah khut ah a nutsia zosia pum in a pui khawm tau ah; a lak un jawlnei Jeremiah tawh, Neriah chapa Barukh chule a pang ui.

⁷LALPA thu a ngai lo ziak un, Aigupta gam a hung tung tau a. Tichun, Tahpanhes khua chu a hung tung tau hi.

⁸Ziaphatchun, Tahpanhes mun ah chun Jeremiah kiang in LALPA‘n thu a hun gen a:

⁹Suangtum lianpi pi la’n la, Tahpanhes khua Pharaoh lal In lutna bul ah, a kalbi nuai ah chun phûm in. Zia la thilbawl chu Judah mite mit mu ngei in bawl inla,

¹⁰a kiang un zia gual hin gen in: Sepai honte LALPA, Israelte Pathian in zia gual hin a gen hi, ti’n la: Ka suakpa, Babulon Lengpa Nebukadrezar chu hun sawl ing ka tin, zia ka suangphute chung ah hin a lalchutpha daw dingin hun pui ing ka; chuleh, a lal puan In chu zia chung ah hin hun jaksak ding ka hi.

¹¹Hung intin, Aigupta gam chu hisia’n tin: Natpi ah thidingte chu natpi’n thi’n tiu in; sal ah tâng ding ah a guatte chu, sal ah tâng intiu in; chemjam ah thi ding ah a guatte chu, chemjam in thi’n au.

¹²Aiguptate milim pathian tempul ah chun mei sêm intin; a hâl tum bang cheng chu sal ah pui in ah; belampu’n a puan ah belam hik a zen thian gual in, Aigupta gam chu zen thiang in, bit tak in kile’kit ta’n a.

¹³Aigupta gam Heliopolis khua, suang pathian limte chu khenbong intin, Aigupta milim pathian tempul haw chu hâl tum ta’n a, ti in a hun gen tai.