Read Vaiphei JEREMIAH 49 Bible Online

JEREMIAH 49 - Vaiphei bible

JEREMIAH 49

¹Ammonte chung thu ah LALPA‘n zia gual hin a gen a: Israel in chapa nei lo a hem? golua ding nei lo a hiu em? Bang ding ah Milkom in Gad khua suandok ah, a khawpite ah a mipite chêng den ziang a hitau em?

²Ziaziakchun, Ammonte khawpi, Rabbah do-na ding ah pengkul ka mûtna ding hun chu, hung tung ngei ngei ding ahi; mualbawk nutsia ah um gual bep hi’ntin, a khawchate chule mei ah hâl tum hi’n a; ziaphat chuleh, Israelte’n amau suandokte chu, suandok kit ta’n au, LALPA‘n a tii.

³Aw Heshbon, Âi khua suksiat ahi tâk ziakin, ha-kâ in kap ta’n! Aw Rabbah chanute haw, kap jak tau in! saidip puan sil unla, sûn unla, buai lei lui in tai tawl het hut tau in. Milkom chu a thiampute tawh, a tawi a chante pum in, sal ah pui mang ah um ding ahi ta’ngâl un.

⁴Bang ding ah la hatna kisuanpi la hem? Aw chanu gin umlo, la hatna chu chau lam manaw ahi. “Kua a hem ei do ngam ding?” ti’n la hausakna la kisuanpi hi.

⁵La kîmvêl ah kipat in tizatna hun tunsak ing ka tin, la majawn chiat un la hinnau hukna’n, taijak sik sek ta’n lau; a taijakte huaikhawm kit ding, kuama um ta pua’n a, LALPA, sepai honte PATHIAN in a tii.

⁶Himaleh, tu’nung lam leh Ammonte chu hun tungding kit ding ka hi, LALPA‘n a tii.

⁷Edomte chung thu ah LALPA‘n zia gual hin a gen hi: Teman ah pilna um talo a hem? Mipilte lemhiatna bei ta maw? A pilnau bei zo ta mai maw?

⁸Dedan ah chêngte haw, taijak unla, kiheimang in kisêlmang tau in! Ama ka gawt hun a tun phat leh, Esau lungjinna a chung in tung ding ahi.

⁹La kiang ah grep lo te a hung phat uh leh, a law khial uh um têi lo ding a hem? Jan kâl ah gucha’n In bulu ta leh, a doiteu bep gudok lo ding a hiu em?

¹⁰Ke’n vang, Esau chu ngawnchang in ka koi tai, a kisêlna mun zosia ka hawkdaw ziakin, a kisêl thei ta puai. A suante, a chanaute leh a kim leh kiang ah um zosia, sukmangthai a hitau hi; ama le a um ta puai.

¹¹La nauchagateu chu nusiau in, keima’n a la enkol na’ng ka, la meithâiteu inle ei muang mai uh hen.

¹²Zia gual hin LALPA‘n a gen ngâl a: Gawtna tuak lo ding ah umte chunle gawtna tuak tei tei ding a hiu; nangmale gawt lo ah um dingin la kingaitua a hem? Gawtna chu pumpel ah, gawt lo in um diak lo ding la hi.

¹³LALPA chun, keima kiminsial in, Bozrah chu tizat um leh gensiat, suksiat dik dek leh hânsedawl hung hi’n ah, a ti ta’ngâl a; chuleh, a khawpi zosiau chule suksiat in um den ta’n au, ti in.

¹⁴LALPA ah kipat thuthang ka la hia’n, namtin lak ah thangko sawl ahi: “Ama do dingin hung khawm unla, gâldo dingin hung kipan un!” ti in.

¹⁵Namtin lak ah a neu pen in hun siam ding ka hi’n, mihingte simmaw hung hiding la hi tai.

¹⁶Nang, kawl suangpi lak ah chêng a, tângsâng chung ah thuneipa, tizat umna la chaw’phul leh, la lungthim kiletsakna chun, a hun thêm pûk ta la hi chu! Mupi gual in sâng tak in bu sia male chin, zia kipat chun hun latha tho tho ding ka hi, LALPA‘n a tii.

¹⁷Edom chu mite tizat hung hi’n ah; a kiang haw tapo in tiza’n, a siat nasat ziakin mak sa’n au.

¹⁸Sodom leh Gomorrah suksiat ah a um ua, a kîm leh vêl ua umte suksiat a hiu ah, kuama a chên tâk lo gual un, zia chun kuama chêng ta pua’n au, LALPA‘n a tii.

¹⁹Jordan lui gâl nângbuk lak ah, sakeibaknei hung pawtdok in gantatna mun a hun zot gual in, Edomte chu phutlo halo in hun delmang ing ka tin; a chung ua vaihawm ding ah ka doitêl taphot hun guat ding ka hi. Kei tawhbang kua a hem um? Kua a hem ei ko ngam? Kua belampu a hem ei lang ngam um?

²⁰Ziaziakchun, Edom kãl ah LALPA thil guanggal leh, Teman ah chêngte kãl ah a thiltupte chu a la ngai tiam un: Gan-gual no neute chu matheilo ah kaimang in hung um intiu in, a chung ua thiltung te ziakin gankul chu mak sakna’n dim in a.

²¹A kipûk git un lei pumpi kilîng in ah; a kâ git uh Tuipi San tiang ah hetphâk hi’n a.

²²En un, mupi kikhaw suk kikhaw to gual in Bozrah chu hun baw intin, zia ni chuleh, Edom mi hangsante lungchang chu, numei nauvei lungchang gual in hung um ta’n a.

²³Damaska chung thu ah chun: Thuthang phalo a het ziak un, Hamath leh Arpad a buai tau hi; tuisuagiat umthim thei lo gual in, launa dim in a lungjing tau hi.

²⁴Damaska chu a jawngkhâl ta’n, taisiat a gaw ta’n, numei nauvei gual in, dipchâkna’n a man tai; patau leh lungngaina’n a dim tai.

²⁵Bangtidan ah khawpi minthang leh, kipakna khawpi chu, nutsia ah um ziang ahi tam?

²⁶Ziaziakchun, a tangvalte chu, lamthuam tin ah thi’n tiu in, ziaphat chuleh, a sepai zosiate chu, suksiat dik dek hita’n au; Sepai honte LALPA chun a tii.

²⁷Chun, Damaska kulbâng chu mei in hâl ing ka tin, Ben-hadad kulpi det chu kâng tum ding ahi.

²⁸Babulon Lengpa Nebukadrezar in, Kedar khua leh Hazor lenggam a hun sim ding chungchâng thu chu: LALPA‘n zia gual hin a gen a: Kipan unla, Kedar sim dingin zuan un! Sualam gam ah mite chu sumangthai un!

²⁹A puanbûkteu leh a gancha honteu, a puanjakteu leh a nei thil zosiau, lâkpiak sik sek unla; a sangawngsauteu chu kipuimang unla: “Lau umna’n ei ûm kîmvêl tai!” ti’n kâ thawm gi zung zung ta hen.

³⁰Aw, Hazor ah chêngte haw, taimang unla, gamla tak ah jam in, thûk tak in kisêlmang tau in! LALPA‘n a tii. Babulon Lengpa Nebukadrezar in, nang do ding dan a guanggal in, nangma hun do gua ahi tai.

³¹Hung kipan unla, thamuang tak ah chêng, bit kisa ma ma, kul kotkhak le nei lo, kotkhak thikjawl le umlo ah, a chang ah chêng namte chu vado hitiu, LALPA‘n a tii.

³²A sangawngsaute chu gâl lâk ding leh, a gancha honteu le gâl lâk hung hi’n au. A ngeibiang sam mêt zosiate chu, kiltin ah thêchek ing ka tin; kiltin ah kipat in a chung ua siatna, hun tut ding ka hi, LALPA‘n a tii.

³³Hazor chu sa-uakte bep chênna mun hung hita’n tin, kumkhua’n seden ta’n a; zia chun kuama chêng ta pua’n tiu in, kuama’n um mun khual ta pua’n au.

³⁴Judai gam ah Lengpa Zedekiah lal pat lim ah, Elam chungchâng in jawlnei Jeremiah kiang in,

³⁵sepai honte LALPA chun zia gual hin a hun gen a: Elamte thalpi, a hatnau bulpi chu hibong ing ka tin;

³⁶kawlkil li’ kipat hui palite chu Elam chung ah hun nunsak ding ka hi; tichun, zia hui palite lak ah chun thejak ing ka tin; Elamte jam lona gam him him um ta pua’n a.

³⁷A mêlmau, amau thâlup gawte ma-âng ah chun Elamte chu hilau ing ka tin, a chung un ka lungnatna huaisia tak, a siatna ding uh chu hun tunsak ding ka hi, LALPA‘n a tii. Amau a thâgam suak masang sia’n chemjam chun delzui pek intin;

³⁸Elam ah ka lalchutpha daw ing ka tin, a lengpau leh a sia’mângte that gam ing ka, LALPA‘n a tii.

³⁹Himaleh, hun nunung lam leh, Elamte vangphatna chu tungding kit ing ka, LALPA‘n a tii.