Read Vaiphei JEREMIAH 51 Bible Online

JEREMIAH 51 - Vaiphei bible

JEREMIAH 51

¹LALPA‘n zia gual hin a gen hi: Babulon leh Leb-qamai ah chêngte, do dingin huisia hun sawl ding ka hin,

²Babulon ah a sî sêp chil ding hun sawl ing ka tin, hun sêp chil in au. Zia gual ah buaina ni chu, kiltin ah kipat a hung tun phat leh, a gam chu hun su’awng in a.

³A thal kap thiamteu kâpsak man lo in, thikphaw le kithuamsak man kiu in. A tangvalteu chu hawi kiu inla, a sepaiteu that gam sik sek un.

⁴Kaldaite gam ah chun thalup in kilîk uh hen la, a khawlai tual un liam zeng zung tau hen.

⁵Israelte Mithiangtho mit mu in, a gam uh gitlona’n dim maleh, Israelte leh Judate chu sepaite LALPA, a Pathian uh chun a nusia diak puai.

⁶La hinna ding chiat uh kingaituau inla, Babulon khua sung ah kipat in jamdok kin un! LALPA phuba lâk hun a hiziak in, a gitlonau ziakin nanghaw mangthai khawm kiu in; amau bawldan tawh kigûn in a thukna a piai.

⁷Babulon chu LALPA khut ah sana no, khawvel pumpi dawn kham sak chu ahi; namtin in a uain chu a dawn un, tichun, namtin chu a ngol zo tau hi.

⁸Thakhatpi’n Babulon chu a pûk in, a chimtha tai; ama chu sûn tau in! A dam kit thei khâk leh, a beliam damdawi ding hun choi piak un.

⁹Babulon chu sukdam ka guau a, maleh, sukdam kit thei ding dan a hita puai. Nusiau inla, mitin I gam lam chiat un chia kit mai tai tiu; ama thiamlona chung ah vaihawmna’n van a thawng in, van sûmte chan ah vawk to ahi tai.

¹⁰LALPA‘n I diknau a taklang tai, hung un, Zion ah chun LALPA I Pathian, thilbawl dan taklang hitiu.

¹¹Thalchangte tât-hiam un! Thalchang a bawm ah thundim un!

¹²Babulon kulbângte do dingin kipan un; gâlvêngtute hihat un; gâl chângpang dingte le koi unla, gâl chânggu dingle koi tau in; Babulon ah mite chungchâng ah LALPA‘n a gen gual in, a guanggal in a bawl zo ta ahi.

¹³Nanghaw, tui tam tak lak ah chêng ah, go thil ah hausa ma ma, la hinnau gui a ta’n tâk ziakin, la tawpnau chu a tung tai.

¹⁴Sepai honte LALPA chu a kihaksial in: Khaubepi hon gual ah tam, sepai hon in hun lua dimsak tei ding ka hi, la chung ah a zaw’nau Hân La sa’n au, ti in.

¹⁵A thilhitheina Lei siam ah, a pilna khawvel tungding ah, a lemhiatna vante kaimalpa chu ahi.

¹⁶A aw a sua phat leh van ah tuite, a chiak bul bul un; kawlmong ah kipat phâisum a chiatosak hi. Gaw zukna dingin kawl a phet sak ah, a thil koikhawmna kipat in, hui a hun nunsak sek hi.

¹⁷Mitin chu a mawl un, hetna him him a nei puau hi; sana sêkpa chule a milim siamteu in a sumualpho tai; a milim siamteu chu mi thepna mai mai, hathei lo a hiu hi.

¹⁸Matna bei leh kithepna mai ahi; a gawtna ding ni a tun phat leh, mangthai ngâl ta’n au.

¹⁹Jakob chanvo LALPA chu vang, zia gual chu a hipua’n, thil zosia siamdokpa ahi’n; Israelte hi a gochan namte chu a hiu; sepai honte LALPA chu a min ahi.

²⁰Nang chu ka khetbûk leh, gâldo’na matchâk la hi; nangma mang in nam tinte ka khênjak ah; lenggamte suksiatna’n ka hun mang in;

²¹sakol leh a chung chuang mi, khetjakna’n ka hun mang a;

²²numei hi’n, pawsal hileh, khetjakna’n ka hun mang a; têksia leh naupangte, khetjakna’n ka hun mang a; nungak leh tangvalte, khetjakna’n ka hun mang a;

²³belampu leh a belam hon, khetjakna’n ka hun mang a; lou kaipa leh a lou kaina ganchate, khetjakna’n ka hun mang a; gam awppa leh a sia’mângte, khetjakna’n ka hun mang hi.

²⁴Zion chung ah a thil phalo bawl zosia ziakin, la mit mu ngei in, Babulon khawpi leh Kaldaite gam ah chêng zosiate chung in thuk ding ka hi, LALPA‘n a tii.

²⁵Aw tâng, khawvel pumpi hisetu, ka hun do la hi, LALPA‘n a tii; nangma do dingin ka khut hun lâm ing ka tin, kênliang ah hun lîktha’ng ka tin, tâng kihâl châi in hun siam ding ka hi.

²⁶Insakna ding suangtum, nangma ah kipat lâk hi ngai ta pua’n tin; kumkhua’n matna bei in um ta’n la, LALPA‘n a tii.

²⁷Zia gam chu do dingin kipan unla, namtin lak ah pengkul mut un; ama do dingin namtin siam unla, ama do dingin Ararat, Minni leh Ashkenaz lenggamte hi ko un; ama do’na gâl mapui ding guat unla, khaubepi hon gual in sakolte chu hun pui khawm un.

²⁸Ama do dingin namtin, Media lengte leh a gam awpte leh, a nuai ua nasêm zosia tawh, a thuneinau gam zosia tawh guanggal un.

²⁹Babulon gam ah kuama chêng talo ah, a hawm ngawn ah nutsiasak ding leh, Babulon chung thu ah LALPA thil guanggal dan a het un, gam pumpi lau ah kithing in a kilîng hi.

³⁰Babulon sepai hangsante chun, a gâldo’nau haisan in, a kulpi sung un a kikulkhup zo tau hi; a pawsal phatnau a bei ta’n, numei gual bep a hung hi zo tau hi; a Insak teu chu mei in a kâng tum ta’n, a thîkjawlteu chule a bong zo tai.

³¹Babulon lengpa kiang in a khawpi hi, a mong langkhat ah kipat a mong langkhat lam tiang ah, mêlmate’n a lâk zawu ahi tai, ti thu gen ding thangko kiphamat jen in tai intiu in:

³²Lui gâl kaimun a lua tau in, dawp lak zosia hâltum a hita’n, sepaite le a lauthawng zo tau hi.

³³Sepai honte LALPA, Israelte Pathian in, zia gual hin a la gen a: Babulon chanu chu buchilna phual gual ahi; chomlokâl in buchil hun, pawltâk chu hung tung pai ta’n a.

³⁴“Babulon Lengpa Nebukadrezar in ei ne zo in, ei khênbuang ta’n; bêl awng gual in ei siam ta’n, gûlpi ei val zaw gual in ei val zo tai; ka tuinate chun a gilpi a sudim in, ei sêkdok kit tai.

³⁵Ka phe leh vo siatna phuba hi, Babulon chung ah lâk hi hen,” Zion ah chêngte chun hun tiu hen la, “Ka thisan phubau hi, Kaldaite gam ah chêngte chung ah lâk hi hen,” Jerusalem ah chêngte chun hun tiu hen.

³⁶Ziaziakchun, LALPA‘n zia gual hin a gen a: Nangma hun panpi ing ka tin, la phuba chu hun la ding ka hi. A tuipi hikang ing ka tin, a tuinâk keugawpsak ing ka;

³⁷tichun, Babulon chu ki’dak paikhawmna, si-alte chênna mun leh, mitin tizat leh eulau leh, kuama chênlo’na hung suak ta’n a.

³⁸Sakeibaknei gual in kitum khawm intiu in, sakeibaknei note gual in ngîk ta’n au.

³⁹A hung kichawphul phat ua leh, a dawn ding uh pia’ng ka tin, khawmu khawchang helo ah a lim hialna ding un, dawn khamsak ing ka tin, hung khanglo kit talo ah, kumkhua a i-mut den hialna ding un, LALPA‘n a tii.

⁴⁰Sathatte kiang ah belamnote, belamchalte leh kêlchate a kai gual un, amau chu pia ding ka hi.

⁴¹Bangtidan ah, khawvel pumpi’n a kisuanpiu, Sheshak khawpi chu lâk zaw ahi tam! bangtidan ah Babulon khawpi chu, namtin lak ah tizat um suak a hita leh!

⁴²Tuisuagiat in Babulon chu a chûm ta’n, tui nasa tak ah kinawk chun a chûm tai.

⁴³A khawpite haw chu tizat um a suak ta’n, gam gawchâk leh gamkeu, kuama chên tâk lona leh, mihing chotkhâk lona gamgil a suak tai.

⁴⁴Babulonte pathian bêl chu gawt ing ka tin, a val zawsa chule a gawl ah kipat, mêkdok kit ding ka hi. Namtin a kiang ah luang khawm ta pua’n au; Babulon kulbâng chu a chim tai!

⁴⁵Ka mipite haw, a sung ah kipat hung pawtdok un! LALPA lungnatna huaisia tak lak ah kipat, mitin in la bitna ding chiat uh kihawl tau in!

⁴⁶Zia gam ah thuthang la hiatteu ziakin, lungthuai kiu inla, lau diak kiu in; kum khat ah thuthang khat um intin, kum kit leh thu chuam khat hung um kit intin, a gam sung ah kipawngbawlna thuthang leh, vaihawmte leh vaihawmte kido’na thuthang, hung um ding ahi.

⁴⁷Babulon ah milimte ka gawtna hun ding chu, hung tung ngei ngei ding ahi; a gam pumpi chu mualpho intin, thalup ah umte chu a lak un kizam tek tuk in au.

⁴⁸Ziaphat chuleh, van lamte leh lei ah um zosia’n, Babulon pûkna kipakpi in kiko veng vung ta’n au; mallam ah kipat in amau susia dingte chu, hung kuan ding ahi ngâl un, LALPA‘n a tii.

⁴⁹Babulonte ziak ah Israelte leh, khawvel pumpi mite thalup a hiziak un, Babulon chu chim tei tei ding ahi.

⁵⁰Nanghaw, chemjam ah kipat suakchate haw, chiau inla, khawdâng kiu in! Gamla tak ah kipat in LALPA chu hiau inla, Jerusalem chu ngaitua zing un:

⁵¹Hosiatna ka thok ziak un, sukmualpho in ka um un, jachatna’n ka dim tau hi; LALPA In ah mun thiangtho sung zosia’n, het ngai lo mite a hung lut tau hilam.

⁵²Ziaziakchun, a milim zosiau ka gawt a, a gam pumpi miliante thûmna ding ni chu, hung tung pai ding ahi tai; LALPA‘n a tii.

⁵³Babulon chu van chan ah kal sâng in, a kulbângte sâng tak in siamdet ma leh, ama susia dingte chu keima ah kipat in, a chung un tung ding ahi ngâl a, LALPA‘n a tii.

⁵⁴Ngai tiam un, Babulon ah kipat kâ thawm chu! Kaldaite gam ah kipat siatna husa chu a nasa na e!

⁵⁵LALPA‘n Babulon chu a susia ta’n, a husau nasa tak mai chu a suthip tai. A husau chu tuisuagiat kinawk gi gual ahi’n, a git in gam a thawng hi.

⁵⁶Babulon chu do ding leh kilanpi dingin, hisetu chu a hung ta’ngâl a; a sepai hangsanteu chu mat in a um un, a thalpiteu chu khetbot piak a hi zo tau hi; LALPA chu phuba la’pa Pathian a hiziak in, kim tak in hun dit kit in a.

⁵⁷A milian leh a mi pilteu, gam awpte, vaihawmte leh, a sepai hangsante natiang in dawn khamsak ding ka hi; lum den intiu in, khanglo kit ta pua’n au; Lengpa, a min Sepai honte LALPA chun a ti ahi.

⁵⁸Sepai honte LALPA chun zia gual hin a gen a: Babulon kulbâng thupi tak chu, lei tual tawh kikim intin, a kul kotkhak sâng takte chule, mei ah hâl tum hung hita’n a. A sung ah mipite chu a gim thawn mai mai a hiu a, mei kat tum ding bep ah namtin in sêm gim a hiu.

⁵⁹Judai gam ah Lengpa Zedekiah, lal ahi kum li tin ah Babulon lam ah pui mang ahi lai ah a kitonpi, Seraiah, Neriah chapa, Mahseiah chapa kiang ah jawlnei Jeremiah in zia gual hin thu a pia; Seraiah chu lal In ah hotu lianpen ahi’n.

⁶⁰Babulon chung ah siatna hung tungding zosia chu, Jeremiah in lekhabu zial pakhat in a zikdok a, Babulon chung ah tung ding thute chu a leng in a jikdok suak a.

⁶¹Seraiah kiang in Jeremiah in zia gual hin a gen a: “Babulon la hung tun phat leh, zia thute zosia hi mipite het dingin la simdaw tei tei ding ahi;

⁶²ziaphat chuleh, ‘Aw LALPA, nangma’n zia mun hi mihing leh gancha him him chên lona mun, kumkhua nutsia ah um ding ah la bawl mai ding tâk chu aw!’ la ti ding ahi.

⁶³Zia lekhabu zial hi la sim zaw phat leh, suang tawh kânkhawm in la, Euphrates luipi lailung ah sep lut inla,

⁶⁴zia gual hin gen in: ‘A chung ah siatna ka hun tunsak dingte ziakin, Babulon chu thodok kit talo dingin tum ta’n ah,’ ti’n,” a gen a. Jeremiah thugen chu zia cheng chu ahi.