Read Vaiphei JEREMIAH 6 Bible Online

JEREMIAH 6 - Vaiphei bible

JEREMIAH 6

¹Aw nanghaw Benjamin chate haw, Jerusalem ah kipat taidok in, la bitna ding un jam tau in! Tekoa ah chun pengkul mût unla, Beth-hakkherem ah chun hetsakna tâkdok un; siatna huaisia tak leh susia ding tizat um, mallam ah kipat in a hung kuandok hi.

²Zion chanu chu hamhing phatna pen gual in ka te’ hi.

³Belam chingte’n a ne zo dingin, a belam honteu a hun pui ui. A kîmvêl ah a puanbûkteu jak in, a mazawn chiat uh ne ding a hiu.

⁴“Jerusalem do dingin kisau inla; kipan un, sûnchang lai tak in sim hitiu!” A khawkna e! Nisa a kâi ta’n, nitâk lam lîm le a sau ta na e!

⁵“Kipan un, jan leh sim hitiu in, a leng Inteu chu susiai tiu!”

⁶Sepai honte LALPA‘n zia gual hin a gen hi: A thingteu chu phuk un; Jerusalem bulu’na ding panmun siam un. Zia khawpi hi gawt tei tei hiding ahi, a sung ah kipawng bawlna lo’ngâl, bangma dang a um paw’ngâl a.

⁷Tuikul in tui thiang tak a pût sek gual in, nunsiatna thak thak a vop zing hi. Thagum sua’na leh suksiatna thu bep a sung in het ahi; damlona leh beliamte chu, ka ma-âng in a um zing hi.

⁸Aw Jerusalem, vauhilna hi ngai in, achutiloleh, hun nungngat ing ka tin, nutsia ah um in, kuama chên lo’na’n, hun siam mai ding ka hi.

⁹Sepai honte LALPA chun zia gual hin a gen a: Grepga a law thian gual un, Israel a umsun te chu lo thiang un; grep a law khawmte gual in, la khut in a bakte chu vak jut kit in.

¹⁰Ka vauhilna thu ngai dingin, kua kiang ah gen ding ka hi tam? En tia, a nakhangteu chu vî lo ahi’n, bangma a hethei puau hi. LALPA kamsuak chu a sim mawu in, a thu gen a kipakpi thei puau hi.

¹¹Himaleh, kei LALPA vang lungnatna dim ka hi; kisûm le ka khop ma ma ziang tai. Khawlai dung ah naupangte chung leh, khanglai kipung khawmte chung ah le, sunthâk mai hita’n tin; tichun, pawsal chu a ji chu tawh mat khawm hi’n tiu in, upate leh têksete nasan mat in hung um ta’n au.

¹²A Inteu chu midang chang ta’n tiu in, a louteu leh a jiteu le midang chang ta’n au; zia gam ah chêng zosiate chung ah hin, ka khut hun tha ding ka hi’ngâl a, LALPA‘n a tii.

¹³A neu pen ah kipat a lian pen tiang in, lawkna lam in a huaihap un; jawlnei ah kipat thiampute tiang in, mitin in diklo tak in a bawl chiat tau hi.

¹⁴Ka mipite beliam chu thulim lo tak in a kaituau in, thamuanna ding a umlo lai inle, “Muanna, Muanna,” a tiu hi.

¹⁵Zachat um tak in a um un, thil ki’dak um tak tak a bawl ui; maleh, zachatna’n a ngai puau a, zachat danle a hepuau hi. Ziaziakchun, thâlup ah umte lak in pang in au; amau ka gawt phat leh, paithâk hita’n au, LALPA‘n a tii.

¹⁶LALPA‘n zia gual hin a gen a: Lamka thuam ah ding unla, en vêl un; lampi pha umna lamlian luite umna dong unla, zia chu zui un; tichun, la thagau â ding un chawldamna mu’n lau, ti in. Himaleh, amau chun, “Zia chu zui pua’ng kau,” a tiu a.

¹⁷Chun, nang uh â dingin gâlvêngtu ka koi hi: “Pengkul git chu a la ngaisak un!”. Himaleh, amau chun, “A la ngaisak pua’ng kau!” a tiu a.

¹⁸Ziaziakchun, aw nam tinte haw, a chung un bang gual a hung tung em ti, aw mipite haw, a la ngai ma tiam un.

¹⁹Aw lei, a la hia’n; zia mipite chung ah hin siatna, a thil guanggal uh ga chu, a chung un tunsak ding ka hi; amau in ka thugente a ngaisak puau a, ka hilna thu a lâk lo ziak un.

²⁰Sheba ah kipat begaw a hun puau a, gamla tak ah kipat kêlzu thum tak a hun puak uh haw hi; kei â dingin bang ah pang ding a hem? La hâlmang thilpiakteu pom tâk a hipua’n, la kithoinateu le kipak um ahi diak puai.

²¹Ziaziakchun, LALPA‘n zia gual hin a gen hi; En in, zia mite âng ah hin a kisuina ding un, kipalpâina suangpi ka koi hi; nu leh pa leh a chateu, a Invêngpa tawh a lawipha le mangthai khawm sik sek in au.

²²LALPA‘n zia gual hin a gen a: En un, mallam gam ah kipat in mipi a hung ui; lei mong gamlatna pen ah nam thupi tak, hung kichok phûl ding a hiu.

²³Aw Zion chanu! Nangma do dingin, thalpi leh cheicha a chawi ui; nunsia tak leh lainatna bei a hiu a, a husau chu tuisuagiat gi gual ahi; gâl do ding ah kithuam gual in, sakol in a chuang ui!

²⁴A chanchin uh chu ka la he tau a, ka khutteu chu a chau tha zo tau hi; numei naunei ding nat thuak gual in, lung gimna’n ka dim ui.

²⁵Loulai ah pawtdok kiu inla, Lamlian dung inle chia kiu in; mêlmate’n chemjam a chawi un, kiltin lau umna ngen in a dim ta’ngâl a.

²⁶Aw ka mi gentheite haw, saidip puan sil unla, leivui lak in kitel puang un; cha neisun sûn gual in, Kâ La ngai tak tak in sau in; siatna chu I chung un hung tung thut, ziang ding ahi ngâl a.

²⁷Ka mipite lak ah hin nang chu enchian ding leh, thitthiang dingin ka hun siam a, a um dânteu chu la hetchian a, la etchian theina ding un.

²⁸A lêng un milochal hel mangte a hiu a, gensiat ding hawl ah vak tawl tawl, sum-eng leh thîk gual ah lung tâk, nunsia tak ah tawi ngen a hiu.

²⁹Pum chu hajap in a jap un, ngên chu mei in a kângtui tai; mi nunsiate chu la paidaw ahi diak lo ziak un, sukthian guatna chu a thawn ahi.

³⁰LALPA‘n amau chu a pom tâk lo ziakin, mite’n amau chu, “Dangkati umlo,” ahi a ti tau hi.