Read Vaiphei JEREMIAH 8 Bible Online

JEREMIAH 8 - Vaiphei bible

JEREMIAH 8

¹Ziaphat chuleh, Judai gam ah lengte, a lalteu, thiampute, jawlneite leh Jerusalem ah a la chêngte gu zosia chu a thân ua kipat lâkdaw in hung um ta’n ah, LALPA‘n a tii;

²nisa, thapi leh van lam ah um zosia a thangai un, a thuu zui in, a nau a sep piak un; a dot leh a biakteu ma-âng ah chun thejak in um intiu in, luak khawm kit leh vui hita pua’n au; lei tual ah ki’dak buaksia gual mai in um ta’n au.

³Chuleh, zia Inkuan gilo takte ka nawjakna mun ah um nalai sunte chun, hin sâng in thi hun têl zaw ta’n au, ti’n sepai honte LALPA chun a gen hi.

⁴A kiang un LALPA‘n zia gual hin a gen hi va ti’n: Mi a kipûk phat leh, thodok kit ngai lo a hiu em? A gam man uh chun, hung kile’kit ngai lo a hiu em?

⁵Bang ding ah Jerusalem ah ka mipite hi, kumtuang ah nungtol ding ah kiheimang mai a hiu em? Kithepna thu chu a tuchak un, kile’kit ding a nuam puau hi.

⁶A la ngaitha’n, ngaisak malengle, thu dik gen a um puau hi; kuama a nunchan phalo uh haisan a um puau in, “Bang ka la bawl khial ah a hem?” a ti zing ui. Sakol gâl do-na mun ah lu bungbut ah a pan gual un, mi tin amau majawn chiat in a kihei tau hi.

⁷Vanlaijawl ah tuivakang in bawn, a hun ding a kihiat ah; vapâlte, pialpîmte leh tuiva te’nle, a hung hun ding chiat uh a kihiat thei un; himaleh, ka mipite’n vang, kei a LALPAu dan thuguatte hi a hepuau hi.

⁸Bangtidan ah lekhaziktu zuauthei te’n, diklo tak ah a zik nung unle, “I pil un, LALPA dan I zui ui,” ti’thei nalai la hiu em?

⁹LALPA thu gen a pom lo ziak un, mipil chu mualpho intin, buaisia’n, puimang in um ta’n au; amau ah bang pilna um ahi tam?

¹⁰Ziaziakchun, a jiteu chu midang pia’ng ka tin, a louteu chule a gâlteu pia’ng ka; a lak ua a neu pen ah kipat a lian pen tiang in, lawkna diklo ah huaihap ngen a hiziak un; jawlnei ah kipat thiampu tiang in, zuau thu ngen in thil a bawl tau hi.

¹¹Ka mite beliamna chu a kaitua dukdak puau in, thamuanna ding a umlo inle, “Muanna, Muanna,” a ti sek ui.

¹²Zachat um tak ah um in, thil ki’dak um tak tak a bawl ui; maleh, zachatna’n a ngai puau a, zachatna châng le a hepuau hi. Ziaziakchun, thalup ah umte lak in pang intiu in, amau ka gawt phat leh, paithâk hita’n au, LALPA‘n a tii.

¹³Amau ka lak khawm guat phatin, grep gui ah a ga a la um ta pua’n, theichang kung inle a ga a la um ta puai; LALPA‘n a tii; a duate nasan a vuaitha zo ta’n, amau ka piakte natiangle a la um ta puai.

¹⁴Bang ding ah kichu hiat hiat I hiu em? Hung khawm unla, kul det nei khawpite chun lut hitiu in, zia chun vathi mang ziang hitiu. LALPA chung ah I la gitlo tâk ziak un, LALPA I Pathian un a thi mangthai ding ah ei koi a hita’i, I dawn ding un tui gu’ kisaw ei pia ta ahi.

¹⁵Thamuanna I hawl un, ahi’n la, thilpha bangma I mu puau hi; sukdamna hun I hawl un, ahiziak in, tizatna ngen a hizaw tai.

¹⁶Dan ah kipat in a sakolteu nâk git chu, hetphâk ahi’n; a sakolchalteu hâm git ziakin, gam pumpi hi a kithing tai. A hung un, a gam leh a sung ah um zosia tawh, a khawpi leh a sung ah chêng zosia chu, a himangthai zo tau hi.

¹⁷En un, la lak un gûlte ka hun thâ lut hi, gûlsia, vâkngam theilote chun hun chu ta’n au, LALPA‘n a tii.

¹⁸Ka limna’n ei taisan ta’n, lungngaina’n ei chûm tai; ka lungthim a na tai.

¹⁹Gam tin kiltin ah kipat ka mipi, gentheite kâ thawm chu ngai un: “Zion ah LALPA um talo maw? A lengpa a sung ah um talo maw? Bang ding ah ei sulungna ding ah milimte kisiam ah, gam dang pathiante bia a hiu em?

²⁰Bu lâk hun a kichai ta’n, nipi hun a bei tai; ei uh la hukdam I la hita puau hi”.

²¹Ka mipi gentheite natna chu ka thokpi ah, ka sûn ah, lungdonna chun ei chûm tai.

²²Gilead ah damdawi um talo a hem? Zia chun damdawi thiam umlo maw? Bang ding ah ka mipi gentheite chu, sukdam kit hilo a hiu em?