Read Vaiphei JEREMIAH 9 Bible Online

JEREMIAH 9 - Vaiphei bible

JEREMIAH 9

¹Aw, ka luchang hi tuinâk hi hen la, ka mitte hile tuinâk gual ah, mitthi tui in luang hen la, ka mipi thalup ah umte ziakin, a sûn a jan in kap mai leng ka ti ngei ei!

²Aw, gam keu ah khualbûk nei in, ka mipite nusia in vaum daw san ziang leng ka nuam na e! ângkawm leh suam mang ngen ahi ta’ngal un!

³Zuau gen dingin a lei uh chu, thalpi gual in a kisazosa’n a um in, gam sung ah hin zuautheina leh, thu taklo’na lam in a khanglian ui. Thil phalo a ban ban in a bawl un, keima ei he’pha ta puau hi, LALPA‘n a tii.

⁴La Invêngteu lak ah kivêng unla, la chanauteu kuama gingcha kiu in; la chanauteu zosia mi suandaw hat a hiu a, la Invêngteu zosia le, mi gensia ding ah vak-hat ahi ngal un.

⁵A Invêngteu a thêm chiat un, thu dik gen a um puau hi; thiam tak ah zuau genna’n a lei uh a mang un, khawlo tak in a um un, gitlona haisan hak a sa ma mau hi.

⁶Kinuaisiana’n chintawk a nei pua’n, kithepna’nle chintawk a nei puai! Keima ei het ding uh le a nuam puau hi, LALPA‘n a tii.

⁷Ziaziakchun, sepai honte LALPA‘n zia gual hin a gen a: Tu’hin amau chu ka thît thiantho ah, ka patep lo ngal leh, zia ka mipi gilote chung ah hin, bang dang le bawl ding ka nei em?

⁸A Lei uh chu mi kâplupna thalchang gual ahi’n, a kam ua kipat in zuau thu a sêkdok ui. A sunggil un kichanggu zing maleu, a Invêngteu kiang in kam dam in a gen ui.

⁹Zia haw zosia ziak ah chun gawt lo diak ding ka hem? LALPA‘n a ti’n; zia gual namte chu, thuk lo thei ding ka hi em?

¹⁰Tângte â dingin kap leh mau ing ka tin, gamthip ah hampa munte chu sûn ing ka; kuama’n a haw tâk lona ding leh, gancha hon hâm git het ahi kit tâk lona ding ah, chomnâm ahi tâk ziak un; chunglêng vachate leh, gam sate zosia le a tai mang zo tau hi.

¹¹Jerusalem chu thilsia kisunvûmna leh, ngei hon kul in siam ing ka tin; Judai gam ah khawpite chu, kuama chên lona, khawhawm in siam ing ka.

¹²Zia hi hethiam thei ding khop ah mipil kua ahi em? A genjak theina ding un LALPA kam in kua kiang in a gen em? Kuama’n a haw tâk lo’na ding ah gamthip gual tuk ah bang ziak ah, a gam pumpi hisiat leh nutsia ah um mai ahi tam?

¹³Chun, LALPA‘n a gen ah: A zui ding ua a ma-âng ua ka dan koite kilepsan ah, ka thute a mat lo ziak leh a zui lo ziak un,

¹⁴a pu leh pateu in a hilnau dungzui ah Baal a delzui un, lu’lul tak ah a lungthim dawi dan uh a zui zawk tak ziak un.

¹⁵Ziaziakchun, sepai honte LALPA, Israelte Pathian chun zia gual hin a gen hi: Zia mite hi gamsai in vâk ing ka tin, gu tawh kihel tui a dawn ding un pia’ng ka.

¹⁶A pu leh pateu leh amau inle, a la het ngai lo uh nam tinte lak ah thejak ding ka hi; chuleh, ka sukchimit suak masia chemjam delzui sak nalai ding ka hi.

¹⁷Sepai honte LALPA‘n zia gual hin a gen hi: Ngaituau inla, numei kâ thiamte chu ko un; kâ thiam tak numeite chu a hung theina ding un chial un;

¹⁸I mit ua mitthi tui a luandaw a, I mitvunteu in mitthi tui a nawdaw theina dingin, hung kinawu hen la; I chung un kâ La hung sa kin uh hen.

¹⁹Zion ah kipat kâ thawm gi het ahi: “I siatnau a huaisia na e! I gam uh I nutsia tâk ziak un, amau in I chênnau Inte a suksiat tâk ziak un, I mualpho na lawm lawm uh e!”.

²⁰Aw numeite haw, LALPA thu gen hi a la ngai unla, a kam ah thu pawt hin la bil uh a la dawu in; la chanuteu kâ La hil unla, la Invêngteu chiat kâ dan hil un.

²¹“Khawlai tual ah I chateu that ding leh, kiltin ah kipat tangvalte that dingin, thi’na chu I tukvan ua hung lut in, I lal Insungteu inle a lut tai”.

²²LALPA‘n zia gual hin a gen hi ti’n gen in: Gamtalai ah ki’dak gual in mithi luangte kital tek tuk intin, bu âtte nung ah buvui kisia gual in, kuama lak khawm lo in kisia tek tuk in au.

²³LALPA‘n zia gual hin a gen hi: Mipil chun a pilna suang ki’hen la, mi hat inle a hatna suang diak ki’hen la, mi hausa’n le a hauna chu kisuanpi diak ki’hen;

²⁴a suang nuam tapo in, Keima LALPA hi, ngilneinate, vaihawm diknate, felnate leh zia lei chung ah mang sek ka hi ti ei hiatthiamnau chu suang zaw tau hen; zia chu ka lung lam ahi ngal ah, LALPA‘n a tii.

²⁵A zekvun bep uh tan ah, a lungthim zektanlote chung thu ka ngaituana ding nikhua chu hung tung tei tei ding ahi LALPA‘n a tii.

²⁶Gam keu ah chêng, a chalsam uh tan sek zosia, Aiguptate, Judate, Edomte, Ammonte leh Moabte chung ah vaihawmna ding chu. Zia namte zosia hin a zek uh a tan puau a, Israelte zosia le a lungthim uh zektanlo ngen ahi ngal un.