Read Vaiphei KÂ LATE 2 Bible Online

KÂ LATE 2 - Vaiphei bible

KÂ LATE 2

¹LALPA‘n a lungnatna ziak ah, Zion chanu bang gual lawm ah, sumualpho ahi tam! Israel hoina van ah kipat in, lei ah a hun septha ta’n; a lungnat ni’n a keng ngakna a he’pha ta puai.

²LALPA‘n Jakob chênna zosia, lainatna pang lo in a susia tai; a lungnatna chun Judah chanu, kuldette chu a kaichim sik sek a; a lenggam leh a lengteu chu, lei tual tawh kikim in a kainiam in, a suminsia tai.

³Israel mi hat zosia a lungnatna, puangjak chun a pai tha ta’n; a mêlmateu âng ah a panpi’na, khut changlam a juk tha tai; Jakob ah meikuang gual in, a kîmvêl ah um zosia kâng tum in a hâl tai.

⁴Mêlma gual in a thalpi a lawi ah, gâl gual in a changlam khut a pan tai; Zion chanu puanbûk ah, I kisuanpiu zosia chu a that gam ta’n; a lungnatna chu mei gual in a buntha tai.

⁵LALPA chu mêlma gual in a hung um ta’n, Israel a suchimit tai. A lal in zosiau susia’n, a kuldet zosiau sukchip piak in, Judah chanu chung in kâ leh, lusûnna but khum in a um tai.

⁶A bawkchateu chu pal chim gual in a hi’chim ah; a biakbûk uh le a suksiat piak tai; Zion ah chun LALPA‘n kût leh, sabbath nite ahi’bei in, a hachang thakna’n lal leh, thiampute a tun khum tai.

⁷LALPA‘n a mâichâm a ki’dak ta’n, a mun thiangtho le a ângsia ta puai; a lal In bângte chu, a mêlmateu khut in a pedok tai; LALPA In ah kûtna ding, pengkul mûtna mun ah khan, gâlte’n zaw’na pengkul a mût tau hi.

⁸LALPA‘n Zion chanu bâng chu sukchip a gaw tai; suksiatna ding chan tepte’na a siam ta’n; a khut chu susia lo dingin juk kit pua’n a; a kulsâng leh bângte chu, sûn dingin a siam ta’n, a lung gim khawm tai.

⁹A kotpite chu lei tual in a tum ta’n; a thikjawlte chu a hisia’n, a hibong zo tai; a lal leh a milianteu chu, nam dangte lak in a um zo tau; kipuihuaina a um ta pua’n, a jawlneiteu in LALPA ah kipat, kilâkna a mu ta puau hi.

¹⁰Zion chanu upate chu thipbek in, lei tual in a kichu tau a; a luchung uh leivui kibuakkhum in, saidip puan a sil ui; Jerusalem ah ngaklakte chun, a luu ah leisi’n a kikhâikhu zo tau hi.

¹¹Ka kâ na’n ka mitthi tui a kang hial tai; ka bupi le a kichok a; ka mite hi’siat a hiziak un, nausente leh naupangte chu, kotzing tin ah thidang ah a um zo tâk ziak un, ka thinkha nasan lei tual ah butthâk in a um tai.

¹²Kotzing ah basam ah liamte gual in, a nuteu ânglai a bêl un, a nuteu kiang in a kap un: “He nu, bu leh uain khoi ah um a tam?” a ti tau hi.

¹³Aw Jerusalem chanu, bang hun gen piak ding ka hem? Bang tawh hun te’ ding ka hita’m? Aw Zion chanu thiangtho, ka hun thamuan theina ding ah, bang hun gen piak ding ka hita’m? La siatna tuak hi tuisuagiat gual in a lian hi; kua’n hun hi’dam thei ding a hem?

¹⁴La jawlneiteu in la chung ua, thil tung ding a diklo leh, kithepnate bep a mulawk un; khawnung ah tundin kit, la hitheina ding un, la mantheilonau mulo in, nanghaw puimang thei thu diklo bep, a mu zawu tau a.

¹⁵Lampi hun haw zosia’n, a khut uh a hun bet khum un; Jerusalem chanu a luu pei khum in, a eulau un: “Zia khua hi maw hoina bukim, khawvel pumpi kipakna a tiu kha?” a tiu a.

¹⁶La mêlmate zosia’n a hun gensiau a; a nâk khawng in, a hau a gawi khum un: “Amanu chu I val zo tau hi! Tu’ni ahi ngût hilam I ngaklau; tu’hin I mu ta khong khong ui,” a tiu a.

¹⁷LALPA‘n a lungtup chu a bawl zo ta’n, a suklauna a sêmdok tai; malai ah kipat a la guatsa chu, lainatna panglo in a kai chim ta’n; la chung in mêlmate a kipak tau a, la gâlte chu a chawisâng tai.

¹⁸Ngai tak in LALPA ko un! Aw Zion chanu kulbâng! A sûn a jan in hoktui gual in, la mitthi tui uh luang ta hen! Chawlnga kiu inla, la mit le chawldam tik um ki’hen!

¹⁹Jankhang lai leh janvên lim ah kipat in thodok unla, kap tau in! LALPA âng ah la lungthim uh, tui gual in luan dawsak un! Kotzing kil tin ah gilkial ah, basam la chateu hinna dingin, la khut uh a chung un jak in!

²⁰Aw LALPA, hun en inla, ngaitua tia! Kuate chung ah zia gual hi bawl la hem? Numeite’n amau gil ah ga ngei, a nau awi laiteu sa chu, ne mai ding a hitau em? Thiampu leh jawlnei chu, LALPA mun thiangtho ah, tha ah um ding a hiu em?

²¹Khangdawng leh têksete chu, kotzing tual lai in a lum un; ka nungak leh tangvalteu chu, chemjam in a thi tau a; la lungnatna nikhua hin, lainatna panglo in, amau chu that in, la satlum gam tai.

²²Kil tin ah kipat ka mêlmateu chu, kût thupi tak ah pang ding gual in, la chial khawm a; LALPA lungnatna ni ah chun, hingle a hingdok puau, ka hin leh ka dot seilette chu, ka mêlmate’n a that gam tai.