Read Vaiphei KÂ LATE 3 Bible Online

KÂ LATE 3 - Vaiphei bible

KÂ LATE 3

¹Pathian lungnatna tiangpum ah jepte lak in ka pang a;

²ei naw mang ah, a tawp in vâk um lona ei puilût ta’n;

³nitum in, a vêl vêl in ka chung in a khut a tha’n.

⁴Ka phe leh vunte a vuaisak ah, ka gute a hi’bong a;

⁵ei pum mat ah, haksatna leh, lungjinna’n ei tuam hi;

⁶tuan ah tâng ah thi ta gual in, thim lak in ei chutsak tai.

⁷Ka jam daw theilona dingin dâi ei kai khum a; thikkol gik tak ei busak hi;

⁸ko in, kap hial in a panpi don maleng, ka dotna ei ngaisak puai;

⁹ka chiana ding suang dâi in a khâkbit a, ka lampite a heikawi hi.

¹⁰Kei â dingin savom mi chânggu leh, sakeibaknei kisêlgu gual ahi’n;

¹¹lampi kipat ei kaidok ah, ei puaitel ta’n; thawmhau tak in ei siam tai;

¹²a thalpi a lawi ah a thalchang â dingin, kungmui in ei siam hi;

¹³A thalbawm ah thalchangte chu ka taksa ah thûk tak in a kâp lut in;

¹⁴ka mite zosia â ding ah nuizatbûk ka hung hita’n; sûn nitum tum in a engho nau, La ka hung hi tai.

¹⁵Khâtna’n ei hi’dim in, gamsai ei dawnsak hi.

¹⁶Ka ha hi suangchang a pe’sak in, vut lak ah ka bok in ei vâksak a;

¹⁷ka thagau in muanna a mu pua’n; a nuam kiti him him bang gual a hile ka hemil tai;

¹⁸“LALPA chung ah ka kinepna zosia leh, ka lopina a bei zo tai,” ka ti’n.

¹⁹Ka genthei dan leh ka In leh, lou bei dante ngaitua mai hile, gamsai leh thinkha tui a bang hi!

²⁰Ka thagau in ziate chu a ngaitua zing ziakin, ka sung in a bokden ta ahi.

²¹Ahi’n, zia hi ka hetdaw tâk ziakin, kinepna ka nei hi:

²²LALPA ngilnei hepina chun tawp ni a nei pua’n, a ja’ngaina chunle tawp hun a nei diak puai;

²³jingkal si’n in a thak zing in; la ginumna chu a nasa na e!

²⁴“LALPA chu ka chanvo ahiziak in, ama ah chun kinem ing ka,” ka thagau in a ti tai.

²⁵A ma ngâkte leh ama hawlte thagau â dingin, LALPA chu a pha ma ma hi.

²⁶Min LALPA hukdamna chu, ngâk hiat hiat leh a pha’i.

²⁷Min khangdawng ahi lai in, ngawngkol a puak leh a pha’i.

²⁸LALPA‘n a chung ah a ngak tâk ziakin, thip bek in paw hiat hiat mai hen;

²⁹kinepna a um khâk leh, kam ah leivui lut hial ah bawkhup mai zawk ah,

³⁰a bêngte kiang ah ngeibiang daw ah, zachakna a thok mai ding ahi.

³¹LALPA‘n kumkhua’n pâmpai lo ding ahi.

³²Hi’lungngai maleh, a ja’ngaina nasa tak dungzui in, lainatna hun nei ding ahi ngal a;

³³mihing suknat leh suklungkham chu, a thatnop lam ahi diak puai.

³⁴Gam sung ah saltâng zosia chotden ahi’phat leh,

³⁵Chungnung pen Pa âng ah, mihingte pawngbawl ahi’phat uh leh,

³⁶a dikte maw chansak a hiu chu, LALPA‘n mulo ding a hem?

³⁷LALPA guatsa ahilo chun, kua’n thu pia’n, bawlthei ding a hem?

³⁸A pha leh a sia hi Chungnung pen Pa, kam ah kipat hung pawt hilo maw?

³⁹Bang ziakin em a gitlo ziak ua, gawtna tuak a phunchiak thei ding?

⁴⁰I um danteu ki-enchian in, LALPA lam ah kile’kit hitiu.

⁴¹Van ah Pathian lam in I khutteu jak in, I lungthimteu in nga’to hitiu.

⁴²Ka bawtsia tau ah, ka hel tau hi, ahi’n, lei ngaidam ta puai.

⁴³Lungnatna la kithuam in, lei delzui a; lainatna panglo in lei that in,

⁴⁴ka pauchapnau in a hawthen theilo ding, sûmpi’n la kithuam tai.

⁴⁵Nam tin lak ah buaksia leh, ki’dak um in lei siam tai.

⁴⁶Ka mêlhuatteu zosia’n ei gensia tau a;

⁴⁷dipdapna leh kawkhûk in ei tuam ta’n; châkvaina tawh siatna tawh le.

⁴⁸Ka mipite suksiatna ziakin, ka mitthi lui tui gual in a luang hi.

⁴⁹Ka mitthi luang zing intin, chawlnga pua’n a.

⁵⁰Van ah kipat LALPA‘n a hun etsuk ah a mu ma sia’n.

⁵¹Ka khawpi sung ah nungakte vangsiat dan ka mu in, ei sulungngai ma ma hi.

⁵²Ka mêlmate’n a ziak bei in, vacha gual in ei delzui un;

⁵³ka hingsan in kawkhûk ah ei sep lut un; suang ei delkhumsak un,

⁵⁴ka luvûm tiang tui in ei chup tâk ziakin, “Ka thi tai,” ka ti’n.

⁵⁵Aw LALPA, kawkhûk thûk tak ah, kipat in la min ka hun ko hi;

⁵⁶ka patau aw la hia’n, “Panpi ka dotna hin la bil hum kin la, ei panpi in!”.

⁵⁷La min ka hun ko phat leh, nang in lei nai sek a, “Lau kin,” lei ti ta’n.

⁵⁸Aw LALPA, ka chung thu lei ngaitua piak ah, ka hinna la hukhing tai.

⁵⁹Aw LALPA, ka chung ah siatna kibawl la mu ta’n, ka chung thu hun tan in.

⁶⁰Ei huat danteu leh ei hi’siat guat danteu la mu tai.

⁶¹Aw LALPA, nang in ei elho’na teu leh, ei suksiat guat danteu la mu tai.

⁶²Ni tum ah ei gawtte kihogûkna leh phunna zosia chu, ka siatna ding thu ngen ahi.

⁶³A chut unle, a din unle, entia, a elho’nau La chu ka hi.

⁶⁴Aw LALPA, a thilbawl gûn uh, a khut ngei ua a bawl dungzui un, a chung un thuk in!

⁶⁵A lungthim uh beidon sak inla, la sapsiatna a chung un chu ta hen!

⁶⁶Lung natna’n delzui inla, LALPA van nuai ah kipat in; amau chu hi’mangthai in.