Read Vaiphei KÂ LATE 4 Bible Online

KÂ LATE 4 - Vaiphei bible

KÂ LATE 4

¹Bangtidan ah sana chu mual a, sana thiangtho chu bangtidan ah danglam ziang ahi tam! Mun thiangtho pen ah kimang sek suang thiangthote chu, lamkâ thuam tin ah the’tha’n ahi tai.

²Zion chate, amau gik dan bûk sana thiangtho man jat ah lûlte chu, bêlsêkte khutsuak leibêl gual bep ah, ngai a hiziang tau em!

³Si-alte’n bawn a noteu a nawi uh, a chêpsak sek un; ka mite vang gamthip ah, Va sakol tawhbang ah gilo a hiu.

⁴Nau nawicheplaite lei chu dangchâk ziakin, a dangchawng un a bekden zo ta’n; naupangte chun an a ngêk un, kuama’n bangma a pia puau hi.

⁵An tui tak ah luaithe zingte chu, kotzing in a thigam tau in; puan sandup sil ah seiliante chun, vaivut a bâk tau hi.

⁶Ka mite zilgaina chu, Sodom khawte gawtna sâng in a huaisia zaw’n, zia khua kha vang a chung ah khut kitha lo ah, mitphet kâl sung bep ah, hi’mangthai a la hi ta’ngal a.

⁷A lal chateu chu vûk sâng ah thiang zaw, bawngnawi sâng ah vâm zaw a hiu a; a taksau chu tuipi nuai ah thil um te sâng in, a no zawi. A sam uh sapphir suang mantam a bang hi.

⁸Tu’hin vang a mêl uh gawtuai dawn thak muk vom sâng inle, a vom zaw tau in; kotzing inle hetkhen thei a hita puau hi. A vun uh a guu ah bekden in, thing gawtek a bang ziang tau.

⁹Chemjam ah dawtlup ziangte chu, gilkial ma ma ah thite, a loulai thâiga ne pha diak lo ah, a hinnau a lua’n kang zaw nung ah, thite sâng in a kipak zawu hi.

¹⁰Mi lungsiat thiam numeite khut in, amau chate sa a huan tau in; ka mite siatna tuak ni chun a an uh a hung hi tai.

¹¹LALPA‘n a lungnatna a subuting ta’n; a lungnatna tizat um tak chu a buntha’n, Zion ah mei a sêm ah, a suangphûm natiang in a kâng tum tai.

¹²Lei ah lengte leh mi zosia’n, Jerusalem kotpite ah mêlma dogâlte lut ding chu, a gingcha kha puau hi.

¹³A jawlneiteu gitlo ziak leh, a thiamputeu diklona ziakin, midikte thisan chu a khawpi sung ah sua ahi tai.

¹⁴Kotzing ah mitthûm gual in a vâkvai zo tau in, thisan ah kisubuak zo in, a nîk leh puanteu nasan, kua’ma sukkhak thei a hita puai.

¹⁵“Pawtdok in! Mi thianglo! Pawtdok in! Pawtdok in! Khoikha kin!” ti’n min a la kiko khum ui. Tichun, liangvai leh vâkvai in a um zo tau in; nam dangte chun, “I kiang un um ta kiu hen,” a tiu a.

¹⁶LALPA ma ma’n amau chu a thejak ah, ngaisak ta pua’n a; thiampute zana a um ta pua’n, upate’n le doisakna a chang ta puau hi.

¹⁷Panpi kinem ah thîlna’n ka mitteu a chau zo ta’n; ei hukdok thei lo ding, nam dangte lak ah kinem tak in I la thîl ui.

¹⁸I kotzing nasan un I nop nop ua, I vâk vêl theilona ding un, I kalsuan uh a chingsui un; I tawpna ding uh a nai tai; I hunteu hi tiam ahi; I tawpna ding uh a hung tung ta hilam.

¹⁹Ei delzuite hi van ah mupi sâng in, a chan-gang zawu ah; tâng ah chun ei delzui un, gamthip ah ei la chângguu a.

²⁰LALPA sathaunu’, I hinnau hu chu, a kawkhûk un a pui lût tau in; zia thu ah chun, “Ama lîm nuai in nam dang lak a, chêng ding I hiu,” I la tiu a.

²¹Aw Edom chanute, Uz gam ah chêngte haw, lim in kipak tau in, siatna no chu nang kiang le, hung tung ding ahi ngal a; zia chu dawn kham in, la puan lîp piak hi’n la.

²²Aw Zion chanu, la thulim lona ziak ah, gawtna a buting ta’n, sal in hun umsak sawt pua’n a; aw Edom chanu, nangma thulimlona ziakin hun gawt intin, la gitlonate tâklang ding ahi.