Read Vaiphei EZEKIEL 1 Bible Online

EZEKIEL 1 - Vaiphei bible

EZEKIEL 1

¹A kum sawmthumna, tha li’na, zia tha ni nga a tin ni chun, Khebar lui pang ah saltângte lakah ka um pet in, van a hung kihong ah, Pathian kilâknate chu ka mu ta’n.

²Zia tha, ni nga tin ni chun (Lengpa Jehoiakhin saltân kum nga tin ni ahi’n,)

³Kaldaite gam ah Khebar lui pang ah um, Buzi chapa thiampu Ezekiel kiang in LALPA‘n thu a hun gen a; zia tak ah chun LALPA khut a chung in a um ta’n.

⁴Ka et leh, mallam ah kipat in thigawpi a hung hâng ah; sûmpi nasa tak, a kîmvêl vâk in a tuam leh, meikuang zul zul, chuleh meikuang lailung ah mei âm pem pum tawh bang khat a um a.

⁵A lailung in thil bang a hem, thilhing pali a um un. A kilat dan uh chu mihing mêl a puu a.

⁶Maichang pali leh thâ pali a nei chiat ui.

⁷A kengteu chu a thuanzang un, a kengpêk uh chu bawngno keng a bang ah; sum-eng kinawtval tak gual in a te set set a.

⁸A sîk paliu ah, a tha nuai un mihing khut gual a nei chiat ui. A paliu in zia gual chun maichang leh thate a nei chiat un;

⁹a thau chu a kisumat chiat in; ma lam zuan in a chiau ah, kiheilo in a chia pek ui.

¹⁰A maichang uh chu a paliu in mihing mêl a pu chiat un, a changlam un sakeibaknei mêl a pu chiat un, a veilam sîk un bawngchal mêl leh mupi mêl a pu chiat ui;

¹¹zia gual mêlpu chiat chu a hiu. A tha’teu chu a chung un a jak chiat un; thilhingte chun tha pani chiat a nei un, a thau sutua chiat in, a thau panite chun a taksau a tuam chiat ui.

¹²Malam zuan in a chiau a; thagau chiana ding lam taphot in a chiau ah; a chia unle a kihei diak puau hi.

¹³Thilhingte lailung ah chun, suangmeihol kitik kuang gual ah, meikuang tawhbang thilhingte lak ah vâk tawl tawl a um ah, mei kuang chu a vâk ma ma ah; chuleh, meikuang lak ah kipat chun kawlphe le a pawt a.

¹⁴Thilhingte chu kawlphe gual in a tai vêl vêl ui.

¹⁵Thilhingte chu ka et zing lai in, thilhing palite’n khat chiat ah a chan ding un, lei tual ah kipat kângtalai keng, a kiang chiat un a hung pawtdok a.

¹⁶Kângtalai kengte kilat dan leh a kisiam dan uh chu: Beril suang mantam gual in a te set set ah; a pali un a kibang chiat leh, kângtalai keng a kithua ah kisiam a bang hi.

¹⁷A chia phat uh leh amau kihei lo in, a nopna lam lam uh a zuan thei ui.

¹⁸A keng peite chu a paliu in mit ngen ah dim, sâng tak ahiziak in, tizat a um ma ma hi.

¹⁹Thilhingte chiana lam lam in a kângtalai kengte chule a sîk un a kitawl pek un; thilhingte chu lei tual ah kipat a kipatdawu leh, a kângtalai kengte chule a kipandok sek ui.

²⁰Thilhingte thagau chu kângtalai kengte ah um a hiziak un, thagau chiana ding taphot in a chiau ah, kângtalai kengte chule a kiang un a kipandok ngal sek ui.

²¹Thilhingte thagau chu kângtalai kengte ah um ahiziak in, amau a chiau leh kângtalaite chule a chiau ah; khatte a din leh a dangte le a ding un; lei tual ah kipat a kipatdawu leh kângtalai kengte chunle a zui ngal ui.

²²Thilhingte luchung ah chun krustal suang mantam gual ah val, belkuang tawhbang khat, a luchang uh hun khû suk a um a.

²³Belkuang gual ah khû suk nuai ah kipat chun a tha’teu kisuntua chiat in a jakdok tau a; thilhingte chun amau tuamna ding ah tha pani chiat le a nei un.

²⁴A kipat daw phat ua leh a tha jap git uh, tui tam tak gi tawhbang leh, Bangkim Hitheipa aw gual ah gi leh, sepai hon husa gual in ka he hen; a kichol phat un a tha’teu chu a khaitha chiat tau a.

²⁵Chuleh, a luchung ua belkuang gual ah khûsuk chung lam ah kipat chun aw a hung pawt ah; a kichol phat un a tha’teu chu a khaitha chiat tau a.

²⁶Chun, a luchung ua belkuang gual ah khû suk chung ah chun lallukhuk tawhbang, sapphir suangmantam gual ah kilang khat le a um ah; zia lalchutpha tawhbang chung ah chun mihing mêlpu khat a kitung a.

²⁷Mihing hileh kilawm ka mupa kawng ah kipat chung lam chu mei âm tak gual, meikuang pem pum in a kîmvêl a tuam gual in ka mu’n; chuleh, ka mupa kawng ah kipat a nuai lam sia chu meikuang tawh bang leh, vâk in a kîmvêl salvâk pem pum in ka mui.

²⁸A kîmvêl ah vâk chu, gawzuk ni sûm ah uizo in a sal gual ahi. LALPA lopina chu zia gual chun a kilang a. Ka mu phât in, ka mai ah leitual si’n ka pûk ta’n; ziaphatchun, mi pakhat in ei hun ho git ka he tai.