Read Vaiphei EZEKIEL 10 Bible Online

EZEKIEL 10 - Vaiphei bible

EZEKIEL 10

¹Chuleh, ka vak et leh, cherubte luchung a bêlkuang tawhbang ah khu’suk chung ah chun, sapphir suang mantam gual ah kilang, lalchutpha mêlpu khat a um a.

²Puan malngat ah kithuampa kiang ah chun, “Cherubte kiang ah kângtalai kengte lak ah chun chia in; cherubte lak ah meiâm chu la khut dim in vaham inla, khawpi sung ah thejak in,” a hun tia. Ka et zing leh ama le a chia ngala.

³Tichun, zia mipa chu a lût phatin, cherubte chu In mallam pang ah chun a la ding zing un; chuleh, huang sungnung zaw chu sûmpi’n a dim tai.

⁴In mai tualjawl ah cherubte chung ah kipat chun LALPA lopina chu a kipandok ta’n; chuleh, tempul chu meikhu’n a dim ah, a huang sung chule LALPA lopina vâk in a dim tai.

⁵Cherubte thajap git chu a huang pawnung zaw tiang in a hetthei ah, a pau gitle Bangkim Hi’thei Pathian aw a bang hi.

⁶Puan malngat ah kithuampa kiang ah chun, “Cherubte kiang ah kângtalai kengte lak ah kipat in meiâm vala’n,” ti ah thu a piak zaw phatin, a valût ah, kângtalai kengte kiang ah chun a vading ta’n.

⁷Chuleh, cherubte lak ah pakhat in a khut a thadok ah, cherubte lak ah meiâm bang jat a hem a hun lâ, puan malngat ah kithuampa khut in a pia, ama’nle a lâk zaw in a chiadok ngal tai.

⁸Cherubte chun a tha nuai un, mihing khut tawhbang a nei chiat ui.

⁹Ka et leh, cherubte sîk ah chun kângtalai keng pali a um ah, cherub pakhat kiang in pakhat chiat a um a; chuleh, zia kângtalai kengte chu beril suang mantam gual in a te sil sel un.

¹⁰A pali un a mêl uh a kibang chiat ah, kângtalai keng pakhat sung ah a le’lam zuan ah a dang pakhat um gual ahi.

¹¹A kitawl phat leh, kihei ngai lo ah a nopna lam lam zuan ziang thei a hiu a; khoilam zuan ziangleu le a zotna lam nga a keng a um ziakin a kihei a ngai puai.

¹²A pum un, a kengpeite, a laikamte, a tha’teu leh a kengpeite — a paliu ah a kengpeiteu chu mit ngen in a dim hi.

¹³A kângtalai kengte chu, “Keng kipei tawl tawl thei ahi,” a tiu le ka hia’i.

¹⁴A leng un maichang pali a nei chiat un: a masa pen chu cherub mêlpu ahi’n, a pani’na chu mihing mêlpu ahi’n, a pathumna chu sakeibaknei mêlpu ahi’n, a pali’na chu mupi mêlpu ahi.

¹⁵Cherubte chu a kipandok tau a. Zia thilhingte hi Khebar lui pang ah ka la musa kha a hiu a.

¹⁶Cherubte a chiau leh a kengpeitele a pang un a kitawl ngal un; chuleh, cherubte’n lei tual ah kipandok ding ah a tha’teu a jak phat ua leh, a pang ua a keng peite chu a kihei ngai puau a.

¹⁷Cherubte a chol ua leh a keng peite le a kichawl un, cherubte a kipatdawu leh a dangte chun amau zui in a kipan ngal sek ui; ziate ah chun thilhingte thagau chu a um ziak ahi.

¹⁸Ziaphatchun, tempul In mai tual ah kipat chun LALPA lopina a kipandok ah, cherubte chung jawn ah chun a kichawl ta’n.

¹⁹Cherubte chun a thau a jakdok un, ka mu zing lai in a kiang un kângtalai keng chu tawh lei tual ah kipat in a kal to un, a chia tau a. LALPA In lutna sualam kotpi bul in a chawl tau a; chuleh, Israelte Pathian lopina chu a chung jawn un a um tai.

²⁰Khebar lui pang ah, Israelte Pathian nuai ah thilhing ka mute chu ziate chu a hiu a; chuleh, cherubte a hiu tile ka hun he ngal tai.

²¹Maichang pali a nei un, thale pali chiat a nei ui; chuleh, a tha nuai un mihing khut tawhbang a nei chiat un.

²²A mêl putdan uh chu, Khebar lui pang ah ka mu masakte gual kha a hiu a. A majawn chiat un zang tak in a chia tau hi.