Read Vaiphei EZEKIEL 11 Bible Online

EZEKIEL 11 - Vaiphei bible

EZEKIEL 11

¹Thagau in ei domkâng ah, LALPA In sualam kotpi, sualam nga pen chun ei nga ta’n. A kotpi lûtna bul tak ah chun pawsal sawmni leh nga a la um un; mi sawmni leh ngate lak ah chun, Azzur chapa Jaazaniah tawh, Benaiah chapa Pelatiah tawh, mipite lak ah hotute hawle ka mu’n.

²Ama’n ka kiang in, “Mihing, ziate hi a hiu hilam khawpi sung ah thil phalo guanggal ah, nunsiatna lampi hilte chu,

³amau in, ‘I In ding uh kisak hun a hinai tadi pua’n; zia khawpi hi sahuanna bêl ahi’n, ei haw hi sa, huan ding ah um chu I hiu,’ a tiu hi.

⁴Zaziakchun, Aw mihing, thu gen inla, amau kãl in thu gen in,” a hun ti tai.

⁵Ziaphatchun, LALPA thagau in ei hun thuam ah, ka kiang in, LALPA‘n zia gual hin a gen hi, ti’n la: “Aw Israel Inkuante haw, la lungthim ua la ngaituanau chu ka hia’i.

⁶Zia khawpi hin mi tam tak la that un, a kotzingte mithiluang la sia dim tau hi.

⁷Zaziakchun, LALPA PATHIAN in zia gual hin a gen hi: Khawpi sung ah mithiluang la koi uh haw chu a sa hi’n tin; chuleh, zia khawpi hi a sahuanna bêl chu ahi; himaleh, zia kipat chun lak daw in um in lau.

⁸Chemjam la ki’chau a; ahi’n la, chemjam hun thâsak ding ka hi, LALPA PATHIAN in a tii.

⁹A sung ah kipat hun ladok ing ka tin, gam dang mite khut ah hun pia’ng ka tin, amau in la chung un vaihawm in au.

¹⁰Chemjam in thi’n la tiu in, Israel gamgi bul tiang in vaihawm ding ka hi. Tichun, keima hi LALPA ka hi ti hun he ta’n lau.

¹¹Zia khawpi hi sabêl hipua’n tin, nanghaw le a sung ah sa chu hidiak pua’n lau; Israel gamgi bul tiang in vaihawm ding ka hi.

¹²Ziaphat chuleh, a thuguatte la zui lo uh, a vaihawmna dan la bawsiat uh leh, la kîmvêl ua nam dangte thu gêl dan la zui san uh LALPA chu ka hi ti hun he ta’n lau,” ti’n a gen a.

¹³Zia thu chu ka gen lai in, Benaiah chapa Pelatiah chu a thi ta mai a. Ziaphatchun, ka mâichang ah lei tual si’n ka bokkhup ah, aw ngai tak in ka kap ah, “Katei LALPA PATHIAN! Israelte lak ah a um nalai sunte that gam mai ding la hem?” ka ti tai.

¹⁴Ziaphatchun, LALPA‘n ka kiang in:

¹⁵Mihing, “LALPA a nusia gamla tau in, ei haw â dingin zia gam hi I gochan ding ua piak I hitau,” a la tite kha la chanaute, la Insung mite leh la saltânpite ma ma, Israel Inkuan ah mite zosia kha a hiu.

¹⁶Ziaziakchun, a kiang un: LALPA PATHIAN in zia gual hin a gen hi: Amau chu nam dangte lak ah gamla tak in a koimang in, gam tin ah a la thejak ziang ta malengle, a chianau gam taphot ah, amau â dingin chom khat a mun thiangtho uh a la hi pek ding ka hi.

¹⁷Ziaziakchun, a kiang un: LALPA PATHIAN in zia gual hin a gen hi, ti’n gen in: “Namtin lak ah kipat in hun pui khawm kit ing ka tin, la kithejaknau gam tin ah kipat hun pui khawm in, Israelte gam hi la kiang un pia kit ding ka hi.

¹⁸Zia tak ah chu a hung khawm phat ua leh, a lak ua luaksuak um leh ki’dak um zosia chu paitha ta’n au.

¹⁹Lungthim thak pia’ng ka tin, a lunggil un thagau thak pakhat koi ta’ng ka; suang tawhbang ah tâk a taksau ah kipat lungchang chu ladok in, taksaphe gual ah nêm lungchang chu pia ta’ng ka tin;

²⁰tichun, ka dan thuguatte leh ka thuthungte chu zui in mang ta’n au. Ziaphat chuleh, ka mite hita’n tiu in, keile a Pathian uh hita’ng ka.

²¹Himaleh, a luaksuak umnau leh a ki’dak umnau lunggul zing nalaite chu, a thilbawl dungzui un a luchung un tunsak ta’ng ka, LALPA PATHIAN in a tii, ti’n gen in,” a tia.

²²Ziaphatchun, a kiang ua kângtalai keng peite lak ah chun, cherubte’n a tha’teu a jakdok tau a; chuleh, Israelte Pathian lopina chu a chung jawn un a um a.

²³Chuleh, khawpi lailung chung jawn ah chun LALPA lopina chu a kal to ah; chuleh, khawpi sualam kâi ah tâng chung in a kichawl tai.

²⁴Thagau in ei domkâng ah, ka gau lam in Pathian thagau in Kaldai gam ah saltângte kiang in ei pui tai. Ziaphatchun, ka thil mu chun ei nusia tai.

²⁵Chun, saltângte kiang in LALPA‘n ei etsak zosia chu ka gen tai.