Read Vaiphei EZEKIEL 12 Bible Online

EZEKIEL 12 - Vaiphei bible

EZEKIEL 12

¹LALPA‘n ka kiang in thu a hun gen a:

²Mihing, thunung lo Inkuante, mit nei ngal ah muthei lo leh, bil nei ngal ah hetheilote lak ah chêng la hi;

³thunung lo Inkuan ahi ngal un. Ziaziakchun, mihing, sal ah tâng ding gual in la van siam inla; chuleh, sûnchang lai tak in, a mit muu in saltâng dingin pawtdok in; a mit muu ah mun khat ah kipat mun chuam ah um dingin chia in. Thunung lo Inkuan himaleu, a hiat thiam khâk ua leh.

⁴La van puak chu sunah a mit muu in pawdok inla, saltângte van puak ding gual in pua’n; chuleh, sal ah pui ah umte gual in, nitâk lam leh a mit muu in la puakdaw ding ahi.

⁵A mit muu in bâng phe hawm inla, zia hawm ah chun la van chu la puakdaw ding ahi.

⁶A mit muu in la van chu la liangko ah pua’n la, khawthim nuai in pawdok in; la chiana ding mu lo ah la chiatheina dingin, la mai puan in tuam in; Israel Inkuante â ding ah tepte’na ding ah ka hun bawl la hi’ngal ah, a tia.

⁷Thupiak ah ka um dungzui chun ka bawl ta’n. Saltângte van puak ding gual in sunchang lai in ka van chu ka pawdok ah, nitâk lam in bâng chu ka khut in ka phe hawm ta’n; thim lak ah mite mu in ka van chu ka liangko in ka pawdok tai.

⁸Jingkal phatin LALPA‘n ka kiang in:

⁹Mihing, Israel Inkuan, mi thukhel Inkuante’n la kiang ah: “Bang a hem la bawl?” a tiu hi.

¹⁰A kiang un: “LALPA PATHIAN in zia gual hin a gen hi: Zia thupi hi Jerusalem lal chate tawh, Israel Inkuante zosia chungchâng thu ahi.

¹¹Nang uh â ding ah tepte’na ka hi: Ka bawl gual gual hin a chung un bawl hi’ntin; suak leh sal ding ah chia in au,” ti’n gen in.

¹²A lak ua lal chapa um pen chun, a van chu thim lak in a liangko ah pua’n, chia ta’n a; bâng chu phe hawm intin, zia hawm ah chun pawtdok in a; chuleh, a chiana ding khua a mutheilo’na dingin a mai puan in tuam in a.

¹³Ka lên in khû ing ka tin, ka thâng in awk ta’n au; chuleh, Kaldaite gam, Babulon lam ah pui mang ing ka tin, ama’n vang bangma mu pua’n a; chuleh, zia chun thiden ta’n a.

¹⁴A kiang ah um zosia tawh, ama panpite leh a sepai zosia kil tin ah thejak ing ka tin; chuleh, a nung uh chemjam del zuisak nalai ding ka hi.

¹⁵Namtin lak ah, gam tin ah ka thejak phat leh, kei hi LALPA ka hi ti hun he ta’n au.

¹⁶Himaleh, a ki’dak um dan uh namtin lak ah a gendaw theina ding un, a lak ua khenkhat, mi tawmcha chemjam ah kipat suakcha’n au; zia phat chuleh, LALPA ka hi ti hun he ta’n au.

¹⁷LALPA‘n ka kiang in thu a gen a:

¹⁸Mihing, kithing kawm in la an ne’n la, lauthawng ah kilîng kawm in tui dawn in,

¹⁹chuleh, gam sung ah mipite kiang in: Israel gam ah Jerusalem khawpi chêngte kiang in, LALPA PATHIAN in zia gual hin a gen hi ti’n: Lau kawm in a an uh ne’n tiu in, a sung ah chêngte hiamngamna ziakin, a gam pumpi phiat nâm ding ka hiziak in, lauthawng kawm in an ne’n tiu in, lungdong tak in tui dawn ta’n au.

²⁰Mihing chênna khawpite chu suksiat ah um in, a gam pumpi le nutsia ah um ding ahi; chuleh, Keima hi LALPA ka hi ti hun he ta’n lau, ti in.

²¹LALPA‘n ei hun ho a:

²²Mihing, Israelte gam chungchâng ah la thuching gen uh, “A nite a sawt deu deu leh thil kimulawkte le a thawn a suak tai,” la tiu hi bang genna a hem? a tia.

²³Zia gual hin hil in: “LALPA PATHIAN in zia gual hin a gen hi: Zia thuching chu Israelte lak ah a mat kît tâklona ding un, hi’tawp ding ka hi tai,” a tii ti’n gen in. Himaleh, a kiang un, Thil kimu lawk zosia bukimna ding chu a nai tai.

²⁴Israel Inkuante lak in thil mulawkna lêm leh kipathian misakna um kit talo ding ahi ngala.

²⁵Himaleh, keima LALPA hin ka gen nop nop chu gen mai ing ka tin, ka gen dungzui chun subukim ngal ing ka. Sukvâigei bep hita pua’n a; aw nanghaw mi thukhelte Inkuan, nangmau hun sung ma ma in thu chu gen ing ka tin, subukim zui ngal ding ka hi, LALPA PATHIAN in a ti ahi, ti’n gen in, a tia.

²⁶Chuleh, LALPA‘n ka kiang in thu a hun gen a:

²⁷Mihing, Israel Inkuante’n zia gual hin a gen ui: “A thil mu lawkte chule kum tam tak nung lam ah tung ding thu ahi’n; gamla tak ah tung ding thute a gen lawk ahi,” a tiu hi.

²⁸Ziaziakchun, a kiang un: LALPA PATHIAN in zia gual hin a gen hi: Ka thugente khat le tun vaigeisak pua’ng ka; himaleh, ka thugen zosia chule hibukim ngal ing ka, LALPA PATHIAN in a tii, ti’n gen in, a tia.