Read Vaiphei EZEKIEL 13 Bible Online

EZEKIEL 13 - Vaiphei bible

EZEKIEL 13

¹LALPA‘n ka kiang in:

²Mihing, Israel jawlneite, amau ngaidan leh suangtuana mai ah thu gen, jawlneite kãl in zia gual hin vagen in: “LALPA thu hi ngai un,” ti’n la.

³LALPA PATHIAN in zia gual hin a gen hi: Bangma mulo ah, amau ngaituana bep zui jawlnei ngolte chung a gik na e!

⁴Aw Israel, la jawlneiteu chu khawpi sesa sung ah si-alte gual bep a hitau hi.

⁵LALPA ni guat kido’na hun ah, Israel Inkuan a pan zaw theina ding in, a bâng siatna mun vêng ding leh a siatna siampha nuam a um puau hi.

⁶Zuau thil a muu in, zuau thu a gen un, LALPA‘n a sawl lo pi’nle, “LALPA‘n a gen in,” a tiu a; a thugen uh guitunna a la ngâk nalai un!

⁷Bangma ka gen lo inle, “LALPA‘n a gen hi,” la tiu chu zuau thu bep mu’n, zuau thu bep gen hilo la hiu em?

⁸Ziaziakchun, LALPA PATHIAN in zia gual hin a gen hi: Bangma mulo in zuau thu bep la gen ziak un, ka hun kãl la hiu, LALPA PATHIAN in a ti ahi.

⁹Ka khut in jawlnei lêmte zuau thil mu, zuau thu gente hun do ding ka hi; ka mipite vaihawmna lak in pang pua’n tiu in, Israel Inkuante min ziklutna’nle pang pua’n tiu in, Israelte gam inle lût diak pua’n au; chuleh, LALPA PATHIAN ka hi’dan hun he ta’n lau.

¹⁰Muanna umlo in, “A gâl muang hi,” tia ka mipite a thep ziak uh leh, ka mipite’n kulbâng a sak lai un, zia jawlneite hin a la jikpawl tau in.

¹¹Kulbâng jikpawlte kiang in, kulbâng chu chim ding ahi ti vagen in. Gua nasa tak zu’n tin, gial lian tak kia’n tin, thigawpi hât tak in mutsia ding ahi.

¹²Bângte chu a chip phat leh, “La jikpawlnau khoilam tung zo ahi ta’m,” hun tilo ding a hiu em?

¹³Ziaziakchun, LALPA PATHIAN in zia gual hin a gen hi: Ka lungnatna thigawpi nunsak ing ka tin, ka hachangthakna tuisâng let intin, ka thangtawmna gial in sepsia ta’n a.

¹⁴La bâng zikpawl uh chu hi’chim ing ka tin, lei tual tawh kikimsak ing ka; a suangphûmte chu bangmalo suaksak ta’ng ka; a chip phat leh a sung ah nang le thiden ta’n la; chuleh, keima hi LALPA chu ka hi ti he ta’n la.

¹⁵Tichun, kulbâng chung ah ka thangtawmna leh, kulbâng jikpawlte chung ah ka thangtawmna buting ta’n ah; chuleh, la kiang un, kulbâng a um ta pua’n, a jikpawlte le a um ta puau hi;

¹⁶gâlmuanna umlo ah gâlmuanna mu ah, Jerusalem chungchâng ah thu genlawk, Israel jawlneite ngei chu, LALPA PATHIAN in a ti ahi.

¹⁷Nang mihing vang, amau ngaidan bep ah thugen, la mipite lak ah numeite kãl in kihei in; amau kãl in thu gen inla,

¹⁸a kiang un, LALPA PATHIAN in zia gual hin a gen hi: Mihingte a thuzaw’na ding uh matchâk, khutngawng ah bû ding leh, luchang ah khuk ding bawl piak numeite chung a gik hi! Ka mipite hinna la hisiat nung un, nuam tak ah um dingin la kigingchau ah a hem?

¹⁹Ka mipite lak ah barli bu khutdim khat leh an kam khat ah ei zuak thanghuai ah, zuau ah ka mipite la them zo un, a hing dingte that ah, a thidingte la hawi ui.

²⁰Ziaziakchun, LALPA PATHIAN in zia gual hin a gen hi: Mite hinna la sukgentheinau matchâkteu chu ka dodâl ahi; la khutbân ua la thil bûteu zosia susia’ng ka tin, vacha la mat gual ua, la mihing matteu tha’suak ding ka hi.

²¹La mai khûnau dialte chu bot thêk ing ka tin, ka mipite chu la khut ua kipat hukdok ing ka; la khut un tâng kit ta pua’n au; chuleh, keima LALPA ka hi ti he ta’n lau.

²²Keima’n hi’lungkia lo maleng, nang un diklo tak ah midikte la hi’lungkiak ziak uh leh, mi nunsiate a lampiu nusia lo ding ah la tîlkho un, la hukhin ziak un;

²³kilâkna zuauthei mu ta pua’n la tiu in, phunle sân ta pua’n lau; ka mipite la khut ua kipat hukdok ding ka hi’ngâl a. Ziaphat chuleh, keima hi LALPA ka hi ti hun he ta’n lau.